ಸ್ಮೃತಿ-ಪ್ರತಿಕಾ ಬರೆದ ದಾಖಲೆಗಳ ಪಟ್ಟಿ

ಮಹಿಳಾ ಏಕದಿನ ವಿಶ್ವಕಪ್‌ನಲ್ಲಿ ಭಾರತ ಸೆಮಿಫೈನಲ್‌ಗೆ ಪ್ರವೇಶಿಸಿದೆ. ಗುರುವಾರ ನಡೆದ ಮಹತ್ವದ ಪಂದ್ಯದಲ್ಲಿ ಟೀಮ್ ಇಂಡಿಯಾ 53 ರನ್‌ಗಳಿಂದ ನ್ಯೂಜಿಲೆಂಡ್ ತಂಡವನ್ನು ಮಣಿಸಿ ಉಪಾಂತ್ಯವನ್ನು ಪ್ರವೇಶಿಸಿತು. ಈ ಪಂದ್ಯದಲ್ಲಿ ಟೀಮ್ ಇಂಡಿಯಾದ ಸ್ಟಾರ್ ಆಟಗಾರ್ತಿಯರು ಅಮೋಘ ಬ್ಯಾಟಿಂಗ್ ಪ್ರದರ್ಶನ ನೀಡಿ ತಂಡಕ್ಕೆ ನೆರವಾದರು. ಈ ವೇಳೆ ಆರಂಭಿಕ ಆಟಗಾರ್ತಿ ಪ್ರತಿಕಾ ರಾವಲ್‌ ಹಾಗೂ ಸ್ಮೃತಿ ಮಂಧಾನ ಜೋಡಿ ಹಲವು ದಾಖಲೆಗಳನ್ನು ಬರೆಯಿತು. ಭಾರತದ ಭರವಸೆಯ ಆರಂಭಿಕ ಜೋಡಿ ಬರೆದ ದಾಖಲೆಗಳ ಪಟ್ಟಿ ಇಲ್ಲಿದೆ.

343/3- ಮಹಿಳಾ ಏಕದಿನ ವಿಶ್ವಕಪ್‌ನಲ್ಲಿ ಭಾರತ ಕಲೆ ಹಾಕಿದ ಅತಿ ಗರಿಷ್ಠ ಮೊತ್ತವಾಗಿದೆ. ಇದೇ ವಿಶ್ವಕಪ್‌ನಲ್ಲಿ ಆಸ್ಟ್ರೇಲಿಯಾ ವಿರುದ್ಧ ವಿಶಾಖಪಟ್ಟಣಂ 330 ರನ್‌ ಗಳಿಸಿದ ದಾಖಲೆ ಅಳಿಸಿ ಹಾಕಿದೆ.

14- ಏಕದಿನ ಕ್ರಿಕೆಟ್‌ ಇತಿಹಾಸದಲ್ಲಿ ಬಾರಿಸಿದ ಎರಡನೇ ಗರಿಷ್ಠ ಶತಕದ ಸಂಖ್ಯೆ. ಈ ಮೂಲಕ ಸ್ಮೃತಿ ವಿಶ್ವ ಕ್ರಿಕೆಟ್‌ನಲ್ಲಿ ಅತಿ ಹೆಚ್ಚು ಶತಕ ಬಾರಿಸಿದ ಎರಡನೇ ಬ್ಯಾಟರ್‌ ಎಂಬ ಹಿರಿಮೆ ತಮ್ಮದಾಗಿಸಿಕೊಂಡರು. ಇವರಿಗಿಂತ ಮೊದಲು ಮೆಗ್‌ ಲ್ಯಾನಿಂಗ್‌ 15 ಶತಕ ಸಿಡಿಸಿದ್ದರು.

17- ಅಂತಾರಾಷ್ಟ್ರೀಯ ಕ್ರಿಕೆಟ್‌ನ ಮೂರು ಸ್ವರೂಪದಲ್ಲಿ ಮೆಗ್‌ ಲ್ಯಾನಿಂಗ್ ಬಾರಿಸಿದ ಶತಕದ ಸಂಖ್ಯೆ. ಈ ದಾಖಲೆಯ ಶತಕದ ಸಮಕ್ಕೆ ಸ್ಮೃತಿ ಮಂಧಾನ ನಿಂತಿದ್ದಾರೆ.

ದಾಖಲೆಗಳ ಸುರಿಮಳೆ

23- ಟೀಮ್ ಇಂಡಿಯಾದ ಭರವಸೆಯ ಬ್ಯಾಟರ್ ಪ್ರತಿಕಾ ರಾವಲ್‌ 23 ಇನಿಂಗ್ಸ್‌ಗಳಲ್ಲಿ 1000 ರನ್‌ ಪೂರೈಸಿದರು.

5194- ಸ್ಮೃತಿ ಮಂಧಾನ ಆರಂಭಿಕ ಆಟಗಾರ್ತಿಯಾಗಿ ಗರಿಷ್ಠ ರನ್‌ ಕಲೆ ಹಾಕಿದ ಕೀರ್ತಿಯನ್ನು ತಮ್ಮದಾಗಿಸಿಕೊಂಡರು. ಈ ಮೂಲಕ ಸ್ಮೃತಿ ಸೂಜಿ ಬೇಟ್ಸ್‌ ಅವರ 5088 ರನ್ ದಾಖಲೆಯನ್ನು ಅಳಿಸಿ ಹಾಕಿದರು.

212- ಭಾರತದ ಪರ ಸ್ಮೃತಿ ಹಾಗೂ ಪ್ರತಿಕಾ ಏಕದಿನ ಮಹಿಳಾ ವಿಶ್ವಕಪ್‌ನಲ್ಲಿ ದಾಖಲಾದ ಗರಿಷ್ಠ ರನ್‌. ಇದಕ್ಕೂ ಮೊದಲು 2022ರಲ್ಲಿ ಹರ್ಮನ್ ಪ್ರೀತ್ ಹಾಗೂ ಸ್ಮೃತಿ 184 ರನ್ ಬಾರಿಸಿದ್ದರು.

3- ಮಹಿಳಾ ಏಕದಿನ ವಿಶ್ವಕಪ್‌ನಲ್ಲಿ ಆರಂಭಿಕ ಆಟಗಾರ್ತಿಯರು ಇದು ಮೂರನೇ ಬಾರಿಗೆ ಸೆಂಚೂರಿ ಸಿಡಿಸಿದ ದಾಖಲೆ ಬರೆದರು.

5- ಸ್ಮೃತಿ ಮಂಧನಾ ಪ್ರಸಕ್ತ ವರ್ಷ ಬಾರಿಸಿದ ಶತಕದ ಸಂಖ್ಯೆ 5. ಈ ಮೂಲಕ ಸ್ಮೃತಿ ದಕ್ಷಿಣ ಆಫ್ರಿಕಾದ ತಜ್ಮಿನ್‌ ಬ್ರಿಟ್ಸ್‌ ಅವರ ದಾಖಲೆಯ ಸಮಕ್ಕೆ ನಿಂತರು.

7- ಭಾರತದ ಪರ ಆರಂಭಿಕ ಆಟಗಾರ್ತಿಯರಾದ ಸ್ಮೃತಿ ಮಂಧಾನ ಹಾಗೂ ಪ್ರತಿಕಾ ರಾವಲ್‌ 7 ಶತಕಗಳ ಜೊತೆಯಾಟದ ಕಾಣಿಕೆ ನೀಡಿದರು.

4- ಮಹಿಳಾ ಏಕದಿನ ಕ್ರಿಕೆಟ್‌ನಲ್ಲಿ ಸ್ಮೃತಿ ಹಾಗೂ ಪ್ರತಿಕಾ 4 ಬಾರಿ 150ಕ್ಕೂ ಹೆಚ್ಚು ರನ್‌ ಕಲೆ ಹಾಕಿದ ಸಾಧನೆ ಮಾಡಿದರು.

ಭಾರತ ತನ್ನ ಲೀಗ್‌ ಹಂತದ ಕೊನೆಯ ಪಂದ್ಯವನ್ನು ಭಾನುವಾರ ಬಾಂಗ್ಲಾದೇಶದ ವಿರುದ್ಧ ಆಡಲಿದೆ. ಈ ಪಂದ್ಯದಲ್ಲಿ ಇದೇ ರೀತಿ ಪ್ರದರ್ಶನದ ಕನಸನ್ನು ಆಟಗಾರ್ತಿಯರು ಹೊಂದಿದ್ದಾರೆ.