ರೋಹಿತ್ ತಂಡದಿಂದ ಹೊರಗುಳಿದು ಬೇರೆಯವರು ನಾಯಕರಾದರೆ ಅನುಕೂಲವಿದೆ ಎಂದ ಗಂಗೂಲಿ!

ನಾಯಕರ ಬದಲಾವಣೆ ಬಗ್ಗೆ ಮನಬಿಚ್ಚಿ ಮಾತನಾಡಿದ ಗಂಗೂಲಿ

ರೋಹಿತ್ ಶರ್ಮಾ ಭಾರತ ತಂಡದ ಪೂರ್ಣಾವಧಿ ನಾಯಕನಾಗಿದ್ದು, ಸಾಲು ಸಾಲು ಪಂದ್ಯಗಳಲ್ಲಿ ಆಡುವುದರಿಂದ ಗಾಯದ ಸಮಸ್ಯೆಗೊಳಗಾಗುವುದು ಸಹಜ ಹಾಗೂ ಇದರಿಂದ ಕಡ್ಡಾಯವಾಗಿ ವಿಶ್ರಾಂತಿಯ ವಿರಾಮವನ್ನು ತೆಗೆದುಕೊಳ್ಳಲೇಬೇಕಾಗುತ್ತದೆ. ಹಾಗೂ ಇದು ಹೊಸ ಆಟಗಾರರಿಗೆ ತಂಡ ಸೇರಲು ಹಾಗೂ ಹೊಸ ನಾಯಕರು ತಂಡವನ್ನು ಮುನ್ನಡೆಸಲು ಅನುಕೂಲ ನೀಡಲಿದ್ದು, ಭಾರತ ಈ ನೂತನ ನಾಯಕರು ಮತ್ತು ಯುವ ಆಟಗಾರರ ಅಡಿಯಲ್ಲಿ ವೆಸ್ಟ್ ಇಂಡೀಸ್ ಹಾಗೂ ಇಂಗ್ಲೆಂಡ್ ನೆಲದಲ್ಲಿ ಸರಣಿ ಗೆದ್ದಿದೆ, ಸದ್ಯ ಭಾರತ ಕ್ರಿಕೆಟ್ ತಂಡದಲ್ಲಿ 30 ಆಟಗಾರರಿದ್ದು, ಯಾವುದೇ ತಂಡದ ವಿರುದ್ಧ ಯಾವುದೇ ಸಮಯದಲ್ಲಿ ಬೇಕಾದರೂ ಸೆಣಸಾಡಬಹುದು ಎಂದು ಸೌರವ್ ಗಂಗೂಲಿ ಹೇಳಿಕೆ ನೀಡಿದ್ದಾರೆ. ಈ ಮೂಲಕ ಗಾಯದ ಸಮಸ್ಯೆಯಿಂದ ಹೊರ ಉಳಿದಾಗಲೆಲ್ಲಾ ನೂತನ ನಾಯಕನ ಉಗಮವಾಗಿದೆ ಹಾಗೂ ಇದರಿಂದ ತಂಡಕ್ಕೆ ಅನುಕೂಲವಾಗಿದೆ ಎಂಬರ್ಥದಲ್ಲಿ ಗಂಗೂಲಿ ಹೇಳಿಕೆ ನೀಡಿದ್ದಾರೆ.

ಕಳೆದ ಜುಲೈನಿಂದ ಈ ಜುಲೈವರೆಗೆ ಒಟ್ಟು ಎಂಟು ನಾಯಕರು

ಕಳೆದ ವರ್ಷದ ಜುಲೈ ತಿಂಗಳಿನಿಂದ ಈ ವರ್ಷದ ಜುಲೈ ತಿಂಗಳಿನವರೆಗೆ ಟೀಮ್ ಇಂಡಿಯಾದ ನಾಯಕನಾಗಿ ತಂಡವನ್ನು ಪ್ರತಿನಿಧಿಸಿರುವ ಆಟಗಾರರ ಪಟ್ಟಿ ಕೆಳಕಂಡಂತಿದೆ.
1. ಜುಲೈ 2021, ಭಾರತ vs ಶ್ರೀಲಂಕಾ ಸರಣಿ - ಶಿಖರ್ ಧವನ್

2. ಆಗಸ್ಟ್ 2021, ಭಾರತ vs ಇಂಗ್ಲೆಂಡ್ ಟೆಸ್ಟ್ ಸರಣಿ - ವಿರಾಟ್ ಕೊಹ್ಲಿ

3. ನವೆಂಬರ್ 2021, ಭಾರತ vs ನ್ಯೂಜಿಲೆಂಡ್ ಸೀಮಿತ ಓವರ್ ಸರಣಿ - ರೋಹಿತ್ ಶರ್ಮಾ

4. ನವೆಂಬರ್ 2021, ಭಾರತ vs ನ್ಯೂಜಿಲೆಂಡ್ ಟೆಸ್ಟ್ - ಅಜಿಂಕ್ಯಾ ರಹಾನೆ

5. ಜನವರಿ 2022, ಭಾರತ vs ದಕ್ಷಿಣ ಆಫ್ರಿಕಾ ಏಕದಿನ ಸರಣಿ - ಕೆಎಲ್ ರಾಹುಲ್

6. ಜೂನ್ 2022, ಭಾರತ vs ದಕ್ಷಿಣ ಆಫ್ರಿಕಾ ಟಿ ಟ್ವೆಂಟಿ ಸರಣಿ - ರಿಷಭ್ ಪಂತ್

7. ಜೂನ್ 2022, ಭಾರತ vs ಐರ್ಲೆಂಡ್ ಟಿ ಟ್ವೆಂಟಿ ಸರಣಿ - ಹಾರ್ದಿಕ್ ಪಾಂಡ್ಯ

8. ಜುಲೈ 2022, ಭಾರತ vs ಇಂಗ್ಲೆಂಡ್ ಟೆಸ್ಟ್ ಸರಣಿ - ಜಸ್ಪ್ರಿತ್ ಬುಮ್ರಾ

ರೋಹಿತ್ ಶರ್ಮಾ ನಾಯನಾಗಿ ಮುನ್ನಡೆಸಿದ ಸರಣಿಗಳಲ್ಲೆಲ್ಲಾ ಗೆಲುವು

ಇನ್ನು ರೋಹಿತ್ ಶರ್ಮಾ ಪೂರ್ಣಾವಧಿ ನಾಯಕನಾಗಿ ನೇಮಕವಾದ ನಂತರ ಟೀಮ್ ಇಂಡಿಯಾವನ್ನು ಮುನ್ನಡೆಸಿರುವ ಎಲ್ಲಾ ಸರಣಿಗಳಲ್ಲಿಯೂ ತಂಡ ಗೆದ್ದು ಬೀಗಿದೆ. ಈ ಮೂಲಕ ರೋಹಿತ್ ಶರ್ಮಾ ಸದ್ಯ ಸೋಲಿಲ್ಲದ ಸರದಾರನಾಗಿ ಮಿಂಚುತ್ತಿದ್ದಾರೆ.