ದಕ್ಷಿಣ ಆಫ್ರಿಕಾ ಕ್ರಿಕೆಟ್ ಮಾಧ್ಯಮ ಹಕ್ಕುಗಳನ್ನು ಪಡೆದ ಸ್ಟಾರ್ ಇಂಡಿಯಾ

ನವದೆಹಲಿ: ದಕ್ಷಿಣ ಆಫ್ರಿಕಾದ ಮಾಧ್ಯಮ ಹಕ್ಕುಗಳನ್ನು ಸ್ಟಾರ್ ಇಂಡಿಯಾ ಪಡೆದುಕೊಂಡಿದೆ. 2023/24ರ ಸೀಸನ್ ಕೊನೆಯಾಗುವವವರೆಗೆ ದಕ್ಷಿಣ ಆಫ್ರಿಕಾ ಕ್ರಿಕೆಟ್‌ನ ಹಕ್ಕುಗಳು ಸ್ಟಾರ್ ಇಂಡಿಯಾದ ಜೊತೆಯಲ್ಲಿರಲಿದೆ. ಏಷ್ಯಾ, ಮಧ್ಯಪ್ರಾಚ್ಯ ಮತ್ತು ಉತ್ತರ ಆಫ್ರಿಕಾದಾದ್ಯಂತ ಪಂದ್ಯಗಳನ್ನು ಪ್ರಸಾರಿಸುವ ಹಕ್ಕುಗಳು ಸ್ಟಾರ್ ಇಂಡಿಯಾ ಬಳಿ ಇರಲಿದೆ.

ಡಿಜಿಟಲ್ ಮಾಧ್ಯಮವೂ ಸೇರಿ, ಭಾರತ ತಂಡದ ದಕ್ಷಿಣ ಆಫ್ರಿಕಾ ಪ್ರವಾಸ ಸರಣಿಗಳನ್ನೂ ಸೇರಿ ಸ್ಟಾರ್ ಇಂಡಿಯಾ ವಿಶೇಷ ಹಕ್ಕುಗಳನ್ನು ಪಡೆದುಕೊಂಡಿದೆ. ಮುಂದಿನ ನವೆಂಬರ್‌ 27ರಿಂದ ದಕ್ಷಿಣ ಆಫ್ರಿಕಾದ ಇಂಗ್ಲೆಂಡ್ ಪ್ರವಾಸ ಸರಣಿಯಿಂದಲೇ ಹಕ್ಕುಗಳನ್ನು ಸ್ಟಾರ್ ಇಂಡಿಯಾ ಬಳಸಿಕೊಳ್ಳಲಿದೆ.

ಇಂಡಿಯನ್ ಪ್ರೀಮಿಯರ್ ಲೀಗ್‌ ಹಕ್ಕುಗಳನ್ನು ಸ್ಟಾರ್ ಸ್ಪೋರ್ಟ್ಸ್ ನೆಟ್ವರ್ಕ್ಸ್ ಗೆದ್ದಿತ್ತು. ಅದಾದ ಬಳಿಕ ಸ್ಟಾರ್ ಇಂಡಿಯಾಕ್ಕೆ ಲಭಿಸುತ್ತಿರುವ ದೊಡ್ಡ ಮಟ್ಟಿನ ಟೂರ್ನಿ ಹಕ್ಕುಗಳೆಂದರೆ ಅದು ದಕ್ಷಿಣ ಆಫ್ರಿಕಾ ಕ್ರಿಕೆಟ್‌ಗೆ ಸಂಬಂಧಿಸಿದ ಹಕ್ಕುಗಳೆ.

ಇಂಟರ್‌ ನ್ಯಾಷನಲ್ ಕ್ರಿಕೆಟ್ ಕೌನ್ಸಿಲ್, ಬೋರ್ಡ್ ಆಫ್ ಕಂಟ್ರೋಲ್ ಫಾರ್ ಕ್ರಿಕೆಟ್ ಇನ್ ಇಂಡಿಯಾ ಮತ್ತು ಐಪಿಎಲ್ ಜಾಗತಿಕ ಹಕ್ಕುಗಳನ್ನು ಈಗಾಗಲೇ ಸ್ಟಾರ್ ಇಂಡಿಯಾ ಪಡೆದುಕೊಂಡಿದೆ. 'ಕ್ರಿಕೆಟ್ ದಕ್ಷಿಣ ಆಫ್ರಿಕಾದೊಂದಿಗೆ ಸಹಕರಿಸಲು ನಾವು ಸಂತೋಷಪಡುತ್ತೇವೆ,' ಎಂದು ಸ್ಟಾರ್ ಇಂಡಿಯಾ ಸ್ಪೋರ್ಟ್ಸ್‌ನ ಸಿಇಒ ಸಂಜೋಗ್ ಗುಪ್ತಾ ಹೇಳಿದ್ದಾರೆ.