ಪಂದ್ಯ ನ್ಯೂಜಿಲೆಂಡ್ vs ಪಾಕಿಸ್ತಾನ, ಟ್ರೋಲ್ ಆಗಿದ್ದು ಮಾತ್ರ ಸ್ಟೀವ್ ಸ್ಮಿತ್!

ಟ್ರೋಲ್ ಆದ ಸ್ಟೀವ್ ಸ್ಮಿತ್

ಪಾಕ್ ಹಾಗೂ ನ್ಯೂಜಿಲೆಂಡ್ ತಂಡಗಳ ನಡುವಿನ ಪಂದ್ಯವನ್ನು ವೀಕ್ಷಿಸಲು ಬಂದ ಮಹಿಳೆ ಈ ರೀತಿ ಟ್ರೋಲ್ ಮಾಡಿದ್ದು ಬೇರೆ ಯಾರನ್ನೂ ಅಲ್ಲ. ಪ್ರಸಕ್ತ ಟೆಸ್ಟ್ ಕ್ರಿಕೆಟ್‌ನ ಶ್ರೇಷ್ಠ ಆಟಗಾರ ಎಂದು ಕರೆಸಿಕೊಳ್ಳುವ ಆಸ್ಟ್ರೇಲಿಯಾದ ಸ್ಟೀವ್ ಸ್ಮಿತ್ ಹಾಗೂ ಆಸಿಸ್ ತಂಡದ ಆರಂಭಿಕ ಆಟಗಾರ ಜೋ ಬರ್ನ್ಸ್‌ ಬಗ್ಗೆ.

ಭಾರತದ ವಿರುದ್ಧ ನೀರಸ ಪ್ರದರ್ಶನ

ಭಾರತದ ವಿರುದ್ಧದ ಪಂದ್ಯಗಳಲ್ಲಿ ಸದಾ ಅಬ್ಬರಿಸುವ ಸ್ಟೀವ್ ಸ್ಮಿತ್ ಟೀಮ್ ಇಂಡಿಯಾ ವಿರುದ್ಧದ ಮೊದಲ ಎರಡು ಟೆಸ್ಟ್ ಪಂದ್ಯಗಳಲ್ಲಿ ಹೀನಾಯ ಪ್ರದರ್ಶನವನ್ನು ನೀಡಿದ್ದಾರೆ. ಸ್ಟೀವ್ ಸ್ಮಿತ್ ನಾಲ್ಕು ಇನ್ನಿಂಗ್ಸ್‌ಗಳಲ್ಲಿ ಎರಡಂಕಿ ಸಾಧನೆ ಮಾಡುವಲ್ಲಿಯೂ ವಿಫಲರಾಗಿದ್ದಾರೆ. ಮತ್ತೊಂದೆಡೆ ಆಸಿಸ್ ತಂಡದ ಆರಂಭಿಕ ಆಟಗಾರ ಜೋ ಬರ್ನ್ಸ್‌ ಕೂಡ ನೀರಸ ಪ್ರದರ್ಶನವನ್ನು ನೀಡುವ ಮೂಲಕ ಆಸಿಸ್ ತಂಡದ ಅಭಿಮಾನಿಗಳಿಗೆ ಆಘಾತವನ್ನು ನೀಡಿದ್ದಾರೆ.

ಕ್ರಿಕೆಟ್ ಬ್ಯಾಟ್‌ಗಳು ಮಾರಾಟಕ್ಕಿದೆ

ಇದನ್ನು ದೃಷ್ಟಿಯಲ್ಲಿಟ್ಟುಕೊಂಡ ನ್ಯೂಜಿಲೆಂಡ್ ಕ್ರಿಕೆಟ್ ಅಭಿಮಾನಿ ಮೈದಾನದಲ್ಲಿ ಟ್ರೋಲ್ ಮಾಡಿದ್ದಾರೆ. ಕೈಯ್ಯಲ್ಲಿ ಹಿಡಿದಿರುವ ಬೋರ್ಡ್‌ನಲ್ಲಿ "ಕ್ರಿಕೆಟ್ ಬ್ಯಾಟ್‌ಗಳು ಮಾರಾಟಕ್ಕಿವೆ. ಕಡಿಮೆ ಬಳಕೆಯಾಗಿದೆ. ಕರೆ ಮಾಡಿ: ಸ್ಟೀವ್ ಸ್ಮಿತ್ ಹಾಗೂ ಜೋ ಬರ್ನ್ಸ್‌. ಕ್ರಿಕೆಟ್ ಆಸ್ಟ್ರೇಲಿಯಾ" ಎಂದು ಆ ಮಹಿಳೆ ಟ್ರೋಲ್ ಮಾಡಿದ್ದಾರೆ. ಇದು ಕ್ರಿಕೆಟ್ ವಲಯದಲ್ಲಿ ಸಾಕಷ್ಟು ಸದ್ದು ಮಾಡುತ್ತಿದೆ.

4 ಇನ್ನಿಂಗ್ಸ್‌ನಲ್ಲಿ 10 ರನ್

ಸ್ಟೀವ್ ಸ್ಮಿತ್ ಸೀಮಿತ ಓವರ್‌ಗಳ ಸರಣಿಯಲ್ಲಿ ಭಾರತದ ವಿರುದ್ಧ ಅದ್ಭುತ ಪ್ರದರ್ಶನವನ್ನು ನೀಡಿದ್ದರು. ಆದರೆ ಟೆಸ್ಟ್ ಕ್ರಿಕೆಟ್‌ನಲ್ಲಿ ಭಾರತೀಯ ಬೌಲರ್‌ಗಳ ವಿರುದ್ಧ ಸ್ಮಿತ್ ಆಟ ಮೊದಲ ಎರಡು ಪಮದ್ಯಗಳಲ್ಲಿ ನಡೆದಿಲ್ಲ. ಸ್ಮಿತ್ ಮೊದಲ ಎರಡು ಪಂದ್ಯಗಳ ನಾಲ್ಕು ಇನ್ನಿಂಗ್ಸ್‌ಗಳಲ್ಲಿ ಒಟ್ಟು ಗಳಿಸಿದ್ದು ಕೇವಲ 10 ರನ್ ಮಾತ್ರ. 1, 1*, 8 ಹಾಗೂ 0 ಸ್ಮಿತ್ ಗಳಿಸಿದ ಸ್ಕೋರ್ ಆಗಿದೆ.