ಗಬ್ಬಾ ಪಿಚ್‌ಗೆ ಎಷ್ಟು ಡಿಮೆರಿಟ್ ಅಂಕ ನೀಡಿದ್ದೀರಾ? ಐಸಿಸಿ ವಿರುದ್ಧ ಸುನಿಲ್ ಗವಾಸ್ಕರ್ ಕಿಡಿ

ಮೂರು ಡಿಮೆರಿಟ್ ಅಂಕ ನೀಡಿದ ಐಸಿಸಿ

ಇಂದೋರ್ ಪಿಚ್ ಅನ್ನು ಕಳಪೆ ಎಂದು ಪರಿಗಣಿಸಿದ ಐಸಿಸಿ ಮೂರು ಡಿಮೆರಿಟ್ ಅಂಕ ನೀಡಿದೆ. ಪಿಚ್‌ನಲ್ಲಿ ಮಾತನಾಡಿದ ಐಸಿಸಿ ಮ್ಯಾಚ್ ರೆಫರಿ ಕ್ರಿಸ್ ಬ್ರಾಡ್, "ಪಿಚ್ ತುಂಬಾ ಶುಷ್ಕವಾಗಿತ್ತು, ಬ್ಯಾಟ್ ಮತ್ತು ಬಾಲ್‌ಗೆ ಸಮನಾದ ಸಹಕಾರ ನೀಡಲಿಲ್ಲ. ಆರಂಭದಿಂದಲೂ ಸ್ಪಿನ್ನರ್‌ಗಳಿಗೆ ಅನುಕೂಲಕರವಾಗಿತ್ತು. ವೇಗಿಗಳಿಗೆ ಪಿಚ್ ಯಾವುದೇ ನೆರವು ನೀಡಲಿಲ್ಲ. ಪಂದ್ಯದುದ್ದಕ್ಕೂ ಅಸಮವಾದ ಬೌನ್ಸ್ ಇತ್ತು" ಎಂದು ಹೇಳಿದರು.

ಐಸಿಸಿ ವಿರುದ್ಧ ಸುನಿಲ್ ಗವಾಸ್ಕರ್ ಟೀಕೆ

ಇಂಡಿಯಾ ಟುಡೆ ಜೊತೆ ಮಾತನಾಡಿದ ಗವಾಸ್ಕರ್, ಗಬ್ಬಾ ಅಂಗಳದಲ್ಲಿ ಎರಡೇ ದಿನಕ್ಕೆ ಮುಕ್ತಾಯವಾದ ದಕ್ಷಿಣ ಆಫ್ರಿಕಾ ಮತ್ತು ಆಸ್ಟ್ರೇಲಿಯಾ ನಡುವಿನ ಟೆಸ್ಟ್ ಪಂದ್ಯವನ್ನು ನೆನಪಿಸಿಕೊಂಡರು.

"ನವೆಂಬರ್‌ನಲ್ಲಿ ಬ್ರಿಸ್ಬೇನ್ ಗಬ್ಬಾದಲ್ಲಿ ಟೆಸ್ಟ್ ಪಂದ್ಯ ನಡೆಯಿತು. ಆ ಪಂದ್ಯ ಎರಡೇ ದಿನಕ್ಕೆ ಮುಕ್ತಾಯವಾಗಿತ್ತು. ಆ ಪಿಚ್‌ಗೆ ಐಸಿಸಿ ಎಷ್ಟು ಡಿಮೆರಿಟ್ ಅಂಕ ನೀಡಿದೆ, ಮತ್ತು ಅಲ್ಲಿ ಮ್ಯಾಚ್ ರೆಫರಿ ಯಾರು?" ಎಂದು ಪ್ರಶ್ನೆ ಮಾಡಿದರು.

ಇಂದೋರ್ ಪಿಚ್‌ಗೆ ಮೂರು ಡಿಮೆರಿಟ್ ಅಂಕಗಳನ್ನು ನೀಡಿರುವುದು ಕಠಿಣ ನಿರ್ಧಾರ ಎಂದು ಅವರು ಹೇಳಿದರು. ಈ ಪಿಚ್‌ನಲ್ಲಿ, ಹೌದು ಚೆಂಡು ತಿರುಗಿತು, ಆದರೆ ಅದು ಅಪಾಯಕಾರಿ ಅಲ್ಲ. ಆಸ್ಟ್ರೇಲಿಯ ಒಂದು ವಿಕೆಟ್ ನಷ್ಟಕ್ಕೆ 77 ರನ್ ಗಳಿಸಿದಾಗ ಪಿಚ್ ಉತ್ತಮವಾಗಿ ಎಂದು ಅರ್ಥವಲ್ಲವೇ ಎಂದು ಪ್ರಶ್ನಿಸಿದ್ದಾರೆ.

ಗಬ್ಬಾ ಪಿಚ್‌ ಬಗ್ಗೆ ಟೀಕೆ

ದಕ್ಷಿಣ ಆಫ್ರಿಕಾ ಟೆಸ್ಟ್ ತಂಡದ ನಾಯಕ ಡೀನ್ ಎಲ್ಗರ್ ಸೇರಿದಂತೆ ಹಲವರಿಂದ ಟೀಕೆಗೆ ಗುರಿಯಾಗಿದ್ದ ಗಬ್ಬಾ ಪಿಚ್‌ಗೆ ಐಸಿಸಿಯಿಂದ ಸರಾಸರಿಗಿಂತ ಕಡಿಮೆ ರೇಟಿಂಗ್ ಪಡೆದಿತ್ತು. ಐಸಿಸಿ ಎಲೈಟ್ ಪ್ಯಾನೆಲ್ ಆಫ್ ಮ್ಯಾಚ್ ರೆಫರೀಸ್ ಸದಸ್ಯ ರಿಚಿ ರಿಚರ್ಡ್‌ಸನ್ ಗಬ್ಬಾ ಪಿಚ್‌ ಬಗ್ಗೆ ಮಾತನಾಡಿ, "ಗಬ್ಬಾ ಪಿಚ್ ಬೌಲರ್‌ಗಳಿಗೆ ಹೆಚ್ಚಿನ ನೆರವು ನೀಡುತ್ತಿತ್ತು. ಹೆಚ್ಚುವರಿ ಬೌನ್ಸ್ ಮತ್ತು ಸಾಂದರ್ಭಿಕ ಅತಿಯಾದ ಸೀಮ್ ಚಲನೆ ಇತ್ತು. ಬ್ಯಾಟಿಂಗ್ ಮಾಡಲು ಇದು ಕಷ್ಟಕರವಾದ ಪಿಚ್ ಆಗಿತ್ತು. ಐಸಿಸಿ ಮಾರ್ಗಸೂಚಿಗಳ ಪ್ರಕಾರ ಪಿಚ್ ಸರಾಸರಿಗಿಂತ ಕಡಿಮೆಯಾಗಿದೆ" ಎಂದು ಹೇಳಿದ್ದಾರೆ.