ನೆಟ್ಸ್‌ನಲ್ಲಿ ಬ್ಯಾಟಿಂಗ್ ಅಭ್ಯಾಸ ಆರಂಭಿಸಿದ ಸುರೇಶ್ ರೈನಾ ಪುತ್ರ ರಿಯೊ; ವಿಡಿಯೋ ವೈರಲ್

ಭಾರತ ಹಾಗೂ ಸಿಎಸ್‌ಕೆ ತಂಡದ ಮಾಜಿ ಆಟಗಾರ ಸುರೇಶ್ ರೈನಾ ಅವರು ತಮ್ಮ ಅಧಿಕೃತ ಇನ್‌ಸ್ಟಾಗ್ರಾಮ್ ಖಾತೆಯಲ್ಲಿ ಹೃದಯಸ್ಪರ್ಶಿ ವಿಡಿಯೋವನ್ನು ಹಂಚಿಕೊಳ್ಳುವ ಮೂಲಕ ತಮ್ಮ ಅಭಿಮಾನಿಗಳನ್ನು ಸಂತೋಷಪಡಿಸಿದ್ದಾರೆ.

ಈ ವಿಡಿಯೋದಲ್ಲಿ, ಸುರೇಶ್ ರೈನಾ ಅವರು ಮಾರ್ಚ್ 2020ರಲ್ಲಿ ಜನಿಸಿದ ತಮ್ಮ ಚಿಕ್ಕ ಮಗ ರಿಯೊ ಅವರೊಂದಿಗೆ ಕ್ರಿಕೆಟ್ ಅಭ್ಯಾಸವನ್ನು ಆನಂದಿಸುತ್ತಿದ್ದಾರೆ.

ಮಗ ರಿಯೊ ಜೊತೆಗೆ, ಮಗಳು ಗ್ರೇಸಿಯಾ ಕೂಡ ನೆಟ್ಸ್‌ನಲ್ಲಿ ಕಂಡುಬಂದಳು. ರಿಯೊ ದೊಡ್ಡ ಗಾತ್ರದ ಬ್ಯಾಟ್‌ನಿಂದ ಕೆಲವು ಶಾಟ್‌ಗಳನ್ನು ಹೊಡೆಯುವುದನ್ನು ಸುರೇಶ್ ರೈನಾ ಹಿಂದೆ ನಿಂತು ನೋಡುತ್ತಿರುವುದು ಕಾಣಬಹುದು.

ಸೋಮವಾರ, ಫೆಬ್ರವರಿ 19ರಂದು ಸುರೇಶ್ ರೈನಾ ತಮ್ಮ ನೆಟ್ಸ್‌ನಲ್ಲಿ ಕ್ರಿಕೆಟ್ ಸೆಷನ್‌ನ ಮುದ್ದಾದ ಕ್ಲಿಪ್ ಅನ್ನು ಇನ್‌ಸ್ಟಾಗ್ರಾಮ್‌ನಲ್ಲಿ ಪೋಸ್ಟ್ ಮಾಡಿದ್ದಾರೆ. ಈ ವಿಡಿಯೋ ಜೊತೆಗೆ ಶೀರ್ಷಿಕೆಯು ತಂದೆ-ಮಗನ ಬಾಂಧವ್ಯದ ಕ್ಷಣಕ್ಕೆ ಸಿಹಿ ಸ್ಪರ್ಶವನ್ನು ಸೇರಿಸಿದೆ.

"ಬ್ಯಾಕ್ ಆನ್ ನೆಟ್ಸ್, ಮುಂಬರುವ ಲೀಗ್‌ಗೆ ಸಜ್ಜಾಗುತ್ತಿದ್ದೆ. ಮತ್ತೆ ಬ್ಯಾಟ್ ಹಿಡಿದಿರುವ ಭಾವನೆಯು ಸಾಟಿಯಿಲ್ಲ ಮತ್ತು ನನ್ನ ಸೂಪರ್ ಸಪೋರ್ಟ್ ಸಿಸ್ಟಮ್ ರಿಯೊನನ್ನು ನನ್ನ ಪಕ್ಕದಲ್ಲಿ ಹೊಂದಿದ್ದು, ಅದನ್ನು ಇನ್ನಷ್ಟು ಉತ್ತಮಗೊಳಿಸುತ್ತದೆ. ಪ್ರಾಕ್ಟೀಸ್ ಮೇಕ್ಸ್ ಪರ್ಫೆಕ್ಟ್, ಕ್ರಿಕೆಟ್ ಸೆಷನ್, ಟೀಮ್ ಸ್ಪಿರಿಟ್," ಎಂದು ಬರೆದುಕೊಂಡಿದ್ದಾರೆ.

ಇಂಡಿಯನ್ ವೆಟರನ್ ಪ್ರೀಮಿಯರ್ ಲೀಗ್‌ನ (ಐವಿಪಿಎಲ್) ಮೊದಲ ಆವೃತ್ತಿಯು ಮೂಲತಃ ಡೆಹ್ರಾಡೂನ್‌ನಲ್ಲಿ ನಡೆಯಬೇಕಿತ್ತು. ಇದೀಗ ಉತ್ತರಪ್ರದೇಶದ ಗ್ರೇಟರ್ ನೋಯ್ಡಾದಲ್ಲಿರುವ ಶಹೀದ್ ವಿಜಯ್ ಸಿಂಗ್ ಪಥಿಕ್ ಸ್ಪೋರ್ಟ್ಸ್ ಕಾಂಪ್ಲೆಕ್ಸ್‌ನಲ್ಲಿ ಫೆಬ್ರವರಿ 23ರಿಂದ ಮಾರ್ಚ್ 3ರವರೆಗೆ ಆಯೋಜಿಸಲಾಗಿದೆ.

ಭಾರತೀಯ ಹಿರಿಯ ಕ್ರಿಕೆಟ್ ಮಂಡಳಿಯ ಹಂಗಾಮಿ ಅಧ್ಯಕ್ಷ ಪ್ರವೀಣ್ ತ್ಯಾಗಿ ಮತ್ತು ಭಾರತೀಯ ಅನುಭವಿ ಕ್ರಿಕೆಟ್ ಮಂಡಳಿಯ ಕಾರ್ಯದರ್ಶಿ ಸುಧೀರ್ ಕುಲಕರ್ಣಿ ಅವರು ಸುದ್ದಿಗೋಷ್ಠಿಯಲ್ಲಿ ಈ ವಿಷಯವನ್ನು ಪ್ರಕಟಿಸಿದರು. ಇದನ್ನು ಬೋರ್ಡ್ ಫಾರ್ ವೆಟರನ್ ಕ್ರಿಕೆಟ್ ಇನ್ ಇಂಡಿಯಾ (ಬಿವಿಸಿಐ) ಆಯೋಜಿಸಿದೆ ಮತ್ತು 100 ಸ್ಪೋರ್ಟ್ಸ್ ನಿರ್ವಹಿಸುತ್ತದೆ.

ಇಂಡಿಯನ್ ವೆಟರನ್ ಪ್ರೀಮಿಯರ್ ಲೀಗ್‌ಗೆ ಹೊಸ ಸ್ಥಳವನ್ನು ಘೋಷಿಸಲು ಸಂತೋಷವಾಗುತ್ತಿದೆ ಎಂದು ಬಿವಿಸಿಐನ ಹಂಗಾಮಿ ಅಧ್ಯಕ್ಷ ಮತ್ತು ಐವಿಪಿಎಲ್ ಅಧ್ಯಕ್ಷ ಪ್ರವೀಣ್ ತ್ಯಾಗಿ ಹೇಳಿದ್ದಾರೆ.

"ಈ ನಿರ್ಧಾರವು ಆಟಗಾರರು ಮತ್ತು ಅಭಿಮಾನಿಗಳಿಗೆ ಅತ್ಯುತ್ತಮ ಅನುಭವವನ್ನು ಒದಗಿಸುವ ಮೂಲಕ ತಡೆರಹಿತ ವೇದಿಕೆ ಮತ್ತು ಲೀಗ್‌ನ ಸುಗಮ ನಿರ್ವಹಣೆಯನ್ನು ಖಚಿತಪಡಿಸಿಕೊಳ್ಳುವ ಗುರಿಯನ್ನು ಹೊಂದಿದೆ," ಎಂದು ಪ್ರವೀಣ್ ತ್ಯಾಗಿ ತಿಳಿಸಿದ್ದಾರೆ.

ಉತ್ತರಪ್ರದೇಶದ ಗ್ರೇಟರ್ ನೋಯ್ಡಾದ ಶಹೀದ್ ವಿಜಯ್ ಸಿಂಗ್ ಪಥಿಕ್ ಸ್ಪೋರ್ಟ್ಸ್ ಕಾಂಪ್ಲೆಕ್ಸ್‌, ಕೆಲ ವರ್ಷಗಳ ಹಿಂದೆ ಅಫ್ಘಾನಿಸ್ತಾನ ಕ್ರಿಕೆಟ್ ತಂಡದ ತವರು ಮೈದಾನವಾಗಿತ್ತು.

"ಇಂಡಿಯನ್ ವೆಟರನ್ ಪ್ರೀಮಿಯರ್ ಲೀಗ್‌ನ ಮೊದಲ ಆವೃತ್ತಿಗೆ ನಾವು ಉತ್ಸುಕರಾಗಿದ್ದೇವೆ. ಭಾರತದ ಅನುಭವಿ ಕ್ರಿಕೆಟ್ ಮಂಡಳಿಯ ಕಾರ್ಯದರ್ಶಿಯಾಗಿ, ಭವಿಷ್ಯದ ತಾರೆಗಳಿಗೆ ಸ್ಫೂರ್ತಿ ನೀಡುವುದರೊಂದಿಗೆ ಹಿಂದಿನ ಅನುಭವಿಗಳನ್ನು ಗೌರವಿಸುವುದರಲ್ಲಿ ನಾನು ನಂಬುತ್ತೇನೆ. ಇಂದು ನಾವು ಇಲ್ಲಿ ಕೇವಲ ಕೌಶಲ್ಯ ಮಾತ್ರವಲ್ಲ, ನಮ್ಮ ಕ್ರಿಕೆಟ್ ದಿಗ್ಗಜರನ್ನು ವ್ಯಾಖ್ಯಾನಿಸುವ ಸಹಿಷ್ಣು ಮನೋಭಾವವನ್ನು ಆಚರಿಸಲು ಬಂದಿದ್ದೇವೆ," ಎಂದು ಸುಧೀರ್ ಕುಲಕರ್ಣಿ ಹೇಳಿದರು.

ವೀರೇಂದ್ರ ಸೆಹ್ವಾಗ್, ಸುರೇಶ್ ರೈನಾ, ಕ್ರಿಸ್ ಗೇಲ್, ಪ್ರವೀಣ್ ಕುಮಾರ್, ಹರ್ಷಲ್ ಗಿಬ್ಸ್, ರಜತ್ ಭಾಟಿಯಾ ಮತ್ತು ಇನ್ನೂ ಅನೇಕ ಅನುಭವಿಗಳನ್ನು ಒಟ್ಟುಗೂಡಿಸಿ ಪ್ರತಿಭೆಯನ್ನು ಪ್ರದರ್ಶಿಸುವ ಭರವಸೆಯನ್ನು ಐವಿಪಿಎಲ್ ಹೊಂದಿದೆ. ಗ್ರೇಟರ್ ನೋಯ್ಡಾದಲ್ಲಿ ನಡೆಯಲಿರುವ ಲೀಗ್‌ನಲ್ಲಿ ಆಟಗಾರರು ಉತ್ಸುಕರಾಗಿದ್ದಾರೆ.

ಐವಿಪಿಎಲ್ ಟೂರ್ನಿಯಲ್ಲಿ ವಿವಿಐಪಿ ಉತ್ತರಪ್ರದೇಶ, ರಾಜಸ್ಥಾನ ಲೆಜೆಂಡ್ಸ್, ರೆಡ್ ಕಾರ್ಪೆಟ್ ದೆಹಲಿ, ಛತ್ತೀಸ್‌ಗಢ ವಾರಿಯರ್ಸ್, ತೆಲಂಗ್ ಸೇರಿದಂತೆ ಆರು ತಂಡಗಳ ನಡುವೆ ಸ್ಪರ್ಧೆಗೆ ಸಾಕ್ಷಿಯಾಗಲಿದೆ.