ಸೈಯದ್ ಮುಷ್ತಾಕ್ ಅಲಿ ಟ್ರೋಫಿ 2023: ಯುವರಾಜ್ ಸಿಂಗ್‌ರ ವೇಗದ ಅರ್ಧಶತಕದ ದಾಖಲೆ ಮುರಿದ ಅಶುತೋಷ್ ಶರ್ಮಾ

ರೈಲ್ವೇಸ್ ತಂಡದ ಸ್ಫೋಟಕ ಬ್ಯಾಟರ್ ಅಶುತೋಷ್ ಶರ್ಮಾ ಅವರು ಭಾರತದ ಮಾಜಿ ಆಲ್‌ರೌಂಡರ್ ಯುವರಾಜ್ ಸಿಂಗ್ ಅವರ ಭಾರತೀಯ ಆಟಗಾರನ ವೇಗದ ಅರ್ಧಶತಕದ ದಾಖಲೆಯನ್ನು ಮುರಿದಿದ್ದಾರೆ.

2023ರ ಸೈಯದ್ ಮುಷ್ತಾಕ್ ಅಲಿ ಟ್ರೋಫಿ ಪಂದ್ಯಾವಳಿಯ ರಾಂಚಿಯಲ್ಲಿ ನಡೆದ ಸಿ ಗುಂಪಿನ ಪಂದ್ಯದಲ್ಲಿ ಅರುಣಾಚಲ ಪ್ರದೇಶ ವಿರುದ್ಧ ರೈಲ್ವೇಸ್ ತಂಡದ ಮಧ್ಯಮ ಕ್ರಮಾಂಕದ ಬ್ಯಾಟರ್ ಅಶುತೋಷ್ ಶರ್ಮಾ ಈ ಸಾಧನೆ ಮಾಡಿದರು. ಕೇವಲ 11 ಎಸೆತಗಳಲ್ಲಿ ಅರ್ಧಶತಕ ದಾಟಿದರು.

ಇನ್ನು ರೈಲ್ವೇಸ್ ತಂಡದ ಬ್ಯಾಟಿಂಗ್ ಇನ್ನಿಂಗ್ಸ್‌ನಲ್ಲಿ ಐದು ಓವರ್‌ಗಳು ಮಾತ್ರ ಬಾಕಿ ಇರುವಾಗ ತಂಡದ ಮೊತ್ತ 4 ವಿಕೆಟ್‌ಗೆ 131 ರನ್ ಆಗಿತ್ತು. ಈ ವೇಳೆ ಅಶುತೋಷ್ ಶರ್ಮಾ ಬ್ಯಾಟಿಂಗ್‌ಗೆ ಆಗಮಿಸಿದರು. ನಂತರ ಅವರು 12 ಎಸೆತಗಳಲ್ಲಿ ಒಂದು ಬೌಂಡರಿ ಮತ್ತು 8 ಸಿಕ್ಸರ್‌ಗಳನ್ನು ಒಳಗೊಂಡಂತೆ 53 ರನ್ ಬಾರಿಸಿ ಔಟಾದರು.

ರೈಲ್ವೇಸ್ ಬ್ಯಾಟರ್ ಅಶುತೋಷ್ ಶರ್ಮಾ ಅವರ ದಾಖಲೆಯ ಅರ್ಧಶತಕವನ್ನು ಬಾರಿಸಿದ ನಂತರದ ಎಸೆತದಲ್ಲಿ ಔಟಾದರು ಮತ್ತು 441.66ರ ಅದ್ಭುತ ಸ್ಟ್ರೈಕ್ ರೇಟ್‌ನೊಂದಿಗೆ ಪೆವಿಲಿಯನ್‌ಗೆ ಮರಳಿದರು.

ಅಶುತೋಷ್ ಅವರ 4 ಸಿಕ್ಸರ್‌ಗಳು ಕವರ್ಸ್ ಮತ್ತು ಲಾಂಗ್-ಆಫ್ ಪ್ರದೇಶದ ಮೇಲೆ ಹಾರಿದರೆ, ಎರಡು ಲಾಂಗ್-ಆನ್ ಕಡೆ ತೆರವುಗೊಳಿಸಿದರು. ಇನ್ನೆರಡು ಸ್ಕ್ವೇರ್‌ನ ಹಿಂದೆ ಲೆಗ್-ಸೈಡ್‌ನತ್ತ ಸಿಕ್ಸರ್‌ಗೆ ಹಾರಿದವು.

ಗಮನಾರ್ಹವಾಗಿ, ರೈಲ್ವೇಸ್ ತಂಡವು ಅಂತಿಮ ಐದು ಓವರ್‌ಗಳಲ್ಲಿ 115 ರನ್‌ಗಳನ್ನು ಕಲೆಹಾಕಿದ ನಂತರ 20 ಓವರ್‌ಗಳಲ್ಲಿ 5 ವಿಕೆಟ್‌ಗೆ 246 ರನ್ ಪೇರಿಸಿತು.

25 ವರ್ಷದ ಅಶುತೋಷ್ ಶರ್ಮಾ ರೈಲ್ವೇಸ್ ತಂಡಕ್ಕಾಗಿ ತಮ್ಮ ಒಟ್ಟಾರೆ 10ನೇ ಮತ್ತು ಎರಡನೇ ಟಿ20 ಪಂದ್ಯದಲ್ಲಿ ಆಡುತ್ತಿದ್ದಾರೆ. ಅವರು 12 ಜನವರಿ 2018ರಂದು 2017-18 ವಲಯ ಟಿ20 ಲೀಗ್‌ನಲ್ಲಿ ಮಧ್ಯಪ್ರದೇಶ ತಂಡಕ್ಕಾಗಿ ಟಿ20 ಕ್ರಿಕೆಟ್‌ಗೆ ಪದಾರ್ಪಣೆ ಮಾಡಿದರು ಮತ್ತು ಕೊನೆಯದಾಗಿ 2019ರಲ್ಲಿ ಈ ಸ್ವರೂಪದಲ್ಲಿ ಆಡಿದ್ದರು.

ಇದೇ ವೇಳೆ ಅಶುತೋಷ್ ಶರ್ಮಾ 2019ರಲ್ಲಿ ಮಧ್ಯಪ್ರದೇಶ ತಂಡಕ್ಕಾಗಿ ಕೇವಲ ಒಂದು 50-ಓವರ್‌ಗಳ ಪಂದ್ಯದಲ್ಲಿ ಆಡಿದ್ದಾರೆ ಮತ್ತು ಇನ್ನೂ ಪ್ರಥಮ ದರ್ಜೆ ಪಂದ್ಯದಲ್ಲಿ ಪದಾರ್ಪಣೆ ಮಾಡಿಲ್ಲ.

ಈವರೆಗೆ ಯುವರಾಜ್ ಸಿಂಗ್ 16 ವರ್ಷಗಳ ಕಾಲ ಒಟ್ಟಾರೆ ಟಿ20 ಕ್ರಿಕೆಟ್‌ನಲ್ಲಿ ವೇಗದ ಅರ್ಧಶತಕದ ದಾಖಲೆಯನ್ನು ಹೊಂದಿದ್ದರು. ಕಳೆದ ತಿಂಗಳು ಹ್ಯಾಂಗ್‌ಝೌನಲ್ಲಿ ನಡೆದ ಏಷ್ಯನ್ ಗೇಮ್ಸ್‌ನಲ್ಲಿ ಮಂಗೋಲಿಯಾ ವಿರುದ್ಧ ನೇಪಾಳದ ದೀಪೇಂದ್ರ ಸಿಂಗ್ ಐರಿ 9 ಎಸೆತಗಳಲ್ಲಿ ಅರ್ಧಶತಕ ಬಾರಿಸುವ ಮೂಲಕ ದಾಖಲೆ ಮುರಿದರು.

ಯುವರಾಜ್ ಸಿಂಗ್ 2007ರಲ್ಲಿ ಪುರುಷರ ಟಿ20 ವಿಶ್ವಕಪ್‌ನ ಉದ್ಘಾಟನಾ ಆವೃತ್ತಿಯಲ್ಲಿ ಇಂಗ್ಲೆಂಡ್ ವಿರುದ್ಧ 12 ಎಸೆತಗಳಲ್ಲಿ ಅರ್ಧಶತಕವನ್ನು ಬಾರಿಸಿದರು. ಸದ್ಯ 41 ವರ್ಷದ ಇಂಗ್ಲೆಂಡ್‌ನ ಸ್ಟುವರ್ಟ್ ಬ್ರಾಡ್ ಅವರ ಒಂದೇ ಓವರ್‌ನಲ್ಲಿ ಆರು ಸಿಕ್ಸರ್‌ಗಳನ್ನು ಬಾರಿಸಿ ದಾಖಲೆ ಬರೆದಿದ್ದರು.