SMAT: ಕೊನೆಯ ಎಸೆತದಲ್ಲಿ ಸಿಕ್ಸ್‌ ಸಿಡಿಸಿ ಬರೋಡಾವನ್ನು ಸೆಮಿಫೈನಲ್‌ಗೇರಿಸಿದ ವಿಷ್ಣು ಸೋಲಂಕಿ

ಹೆಲಿಕಾಪ್ಟರ್ ಶಾಟ್ ಹೊಡೆದು ಗೆಲುವು

ಅಂತಿಮ ಎಸೆತದಲ್ಲಿ ಬರೋಡಾ ಗೆಲ್ಲಬೇಕಾದರೆ 5 ರನ್‌ಗಳ ಅಗತ್ಯವಿತ್ತು. ಸುಮಿತ್ ಕುಮಾರ್ ಎಸೆದ ಎಸೆತವನ್ನು ವಿಷ್ಣು ಮಾಜಿ ನಾಯಕ ಎಂಎಸ್ ಧೋನಿ ಶೈಲಿಯಲ್ಲಿ ಹೆಲಿಕಾಪ್ಟರ್ ಶಾಟ್ ಹೊಡೆದು ಗೆಲುವನ್ನು ಸಾರಿದರು. ಈ ಮೂಲಕ ಬರೋಡಾ ತಂಡವನ್ನು ಸೆಮಿಫೈನಲ್‌ಗೆ ತಲುಪಿಸುವಲ್ಲಿ ಯಶಸ್ವಿಯಾದರು.

149 ರನ್‌ಗಳ ಗುರಿ ನೀಡಿದ ಹರ್ಯಾಣ

ಮೊದಲಿಗೆ ಬ್ಯಾಟಿಂಗ್ ಮಾಡಿದ ಹರ್ಯಾಣ ನಿಗದಿತ 20 ಓವರ್‌ಗಳಲ್ಲಿ 148 ರನ್ ಗಳಿಸಲು ಮಾತ್ರ ಶಕ್ತವಾಗಿತ್ತು. ಹಿಮಾನ್ಶು ರಾಣಾ 49 ರನ್ ಹಾಗೂ ಶಿವಂ ಚೌಹಾಣ್ 35 ರನ್ ಸಿಡಿಸುವ ಮೂಲಕ ಹರ್ಯಾಣ ತಂಡ ಗೌರವಯುತ ಮೊತ್ತ ದಾಖಲಿಸುವಲ್ಲಿ ಯಶಸ್ವಿಯಾಗಿತ್ತು.

ಎಚ್ಚರಿಕೆಯ ಬ್ಯಾಟಿಂಗ್ ಪ್ರದರ್ಶನ

ಈ ಮೊತ್ತವನ್ನು ಬೆನ್ನಟ್ಟಿದ ತಂಡ ಎಚ್ಚರಿಕೆಯ ಆಡವಾಡುತ್ತಾ ಸಾಗಿತ್ತು. ಮೊದಲ ವಿಕೆಟ್‌ಗೆ 31 ರನ್‌ಗಳ ಜೊತೆಯಾಟದ ಬಳಿಕ ಸುಮಿತ್ ಪಟೇಲ್ ಅವರನ್ನು ಯುಜುವೇಂದ್ರ ಚಾಹಲ್ ಔಟ್ ಮಾಡುವಲ್ಲಿ ಯಶಸ್ವಿಯಾದರು. ಆದರೆ ಎರಡನೇ ವಿಕೆಟ್‌ಗೆ ನಾಯಕ ಕೇದಾರ್ ದೇವ್‌ಧರ್ ಹಾಗೂ ವಿಷ್ಣು ಸೋಲಂಕಿ ಅರ್ಧ ಶತಕದ ಜೊತೆಯಾಟವನ್ನು ನೀಡಿದರು.

6 ಎಸೆತಕ್ಕೆ 18 ರನ್‌ಗಳ ಗುರಿ

ಕೇದಾರ್ ದೇವ್‌ಧರ್ ಸುಮಿತ್ ಕುಮಾರ್‌ಗೆ ವಿಕೆಟ್ ಒಪ್ಪಿಸಿದ ಬಳಿಕ ಅಭಮನ್ಯು ರಜಪೂತ್ ಅವರನ್ನು ಸೇರಿಕೊಂಡ ಸೋಲಂಕಿ ಉತ್ತಮ ಪ್ರದರ್ಶನವನ್ನು ನೀಡಿದರು. ಆದರೆ ಅಂತಿಮ ಓವರ್‌ಗೆ 18 ರನ್ ಗಳಿಸುವ ಕಠಿಣ ಸವಾಲು ಈ ಜೋಡಿಯ ಮುಂದಿತ್ತು. ಈ ಗುರಿಯನ್ನು ಸಾಧಿಸುವಲ್ಲಿ ಯಶಸ್ವಿಯಾದರು. 46 ಎಸೆತಗಳಲ್ಲಿ 71 ನ್ ಸಿಡಿಸಿದ ವಿಷ್ಣು ಸೋಲಂಕಿ ಗೆಲುವಿನಲ್ಲಿ ಪ್ರಮುಖ ಪಾತ್ರವಹಿಸಿದರು.