'ಟಿ20 ಒಂದು ಪ್ರದರ್ಶನ, ಟೆಸ್ಟ್ ಕ್ರಿಕೆಟ್ ಒಂದು ಪರೀಕ್ಷೆ'; ವೆಸ್ಟ್ ಇಂಡೀಸ್ ಮಾಜಿ ಕ್ರಿಕೆಟಿಗ ಹೀಗೆ ಹೇಳಿದ್ದೇಕೆ?

ಇತ್ತೀಚಿನ ದಿನಗಳಲ್ಲಿ ಕ್ರಿಕೆಟ್ ಅಭಿಮಾನಿಗಳು ಟಿ20 ಕ್ರಿಕೆಟ್‌ನತ್ತ ಹೆಚ್ಚಾಗಿ ಸೆಳೆತಕ್ಕೆ ಒಳಗಾಗುತ್ತಿದ್ದಾರೆ. ಇದಕ್ಕೇ ಆಟಗಾರರೂ ಹೊರತಾಗಿಲ್ಲ. ಇತ್ತೀಚಿನ ಯುವ ಕ್ರಿಕೆಟಿಗರು ಕೇವಲ ವೈಟ್‌-ಬಾಲ್ ಕ್ರಿಕೆಟ್‌ಗೆ ಮಾತ್ರ ಮಹತ್ವ ಕೊಡುತ್ತಿದ್ದಾರೆ, ಹೀಗಾಗಿ ಟೆಸ್ಟ್ ಕ್ರಿಕೆಟ್ ಗತಕಾಲಕ್ಕೆ ಸರಿಯುವ ಸೂಚನೆ ನೀಡುತ್ತಿದೆ.

ಆದರೆ, ಒಂದೆರಡು ದಶಕಗಳ ಹಿಂದೆ ಕ್ರಿಕೆಟ್ ಆಡಿದ ಆಟಗಾರರನ್ನು ಕೇಳಿದರೆ, ಅವರೆಲ್ಲಾ ಟೆಸ್ಟ್ ಕ್ರಿಕೆಟ್ ಅನ್ನು ಭಾರೀ ಇಷ್ಟಪಡುತ್ತಿದ್ದರು. ಈಗಲೂ ಮಾಜಿ ಕ್ರಿಕೆಟಿಗರನ್ನು ಕೇಳಿದರೆ ಟೆಸ್ಟ್ ಪಂದ್ಯಗಳೇ ನಿಜವಾದ ಕ್ರಿಕೆಟ್, ಟೆಸ್ಟ್ ಕ್ರಿಕೆಟ್ ಉಳಿಸಬೇಕು ಎನ್ನುತ್ತಾರೆ.

ಇದೇ ವೇಳೆ ವೆಸ್ಟ್ ಇಂಡೀಸ್‌ನ ಮಾಜಿ ನಾಯಕ ಕ್ಲೈವ್ ಲಾಯ್ಡ್ ಅವರು ಪ್ರಸಕ್ತ ಕ್ರಿಕೆಟಿಗರು ಈ ಸಮಯದಲ್ಲಿ ಹೆಚ್ಚು ಟಿ20 ಕ್ರಿಕೆಟ್ ಆಡುತ್ತಿದ್ದಾರೆ ಎಂದು ಪರಿಗಣಿಸಿದ್ದಾರೆ.

ಟೆಸ್ಟ್ ಕ್ರಿಕೆಟ್ ಸ್ವಲ್ಪ ಹೆಚ್ಚು ಆದ್ಯತೆ ಪಡೆಯಲು ಅರ್ಹವಾಗಿದೆ ಎಂದು ಹೇಳಿದ ಕ್ಲೈವ್ ಲಾಯ್ಡ್, ಟೆಸ್ಟ್ ಸರಣಿಯಲ್ಲಿ ಕನಿಷ್ಠ ಮೂರು ಪಂದ್ಯಗಳನ್ನಾದರೂ ಆಡಿಸಬೇಕು ಎಂದು ಅಭಿಪ್ರಾಯಪಟ್ಟರು.

ಟಿ20 ಕ್ರಿಕೆಟ್‌ನ ಜನಪ್ರಿಯತೆ ಮತ್ತು ಪ್ರಪಂಚದಾದ್ಯಂತ ಹಲವಾರು ಫ್ರಾಂಚೈಸಿ ಲೀಗ್‌ಗಳು ಬೆಳೆಯುತ್ತಿರುವ ಹಿನ್ನೆಲೆಯಲ್ಲಿ, ಹಲವು ಮಾಜಿ ಕ್ರಿಕೆಟಿಗರು ಮತ್ತು ತಜ್ಞರು ಟೆಸ್ಟ್ ಕ್ರಿಕೆಟ್‌ನ ಭವಿಷ್ಯದ ಬಗ್ಗೆ ಕಳವಳ ವ್ಯಕ್ತಪಡಿಸಿದ್ದಾರೆ.

"ಈ ಸಮಯದಲ್ಲಿ ಬಹುಶಃ ಆಟಗಾರರು ಹಲವಾರು ಟಿ20 ಲೀಗ್‌ಗಳು ಮತ್ತು ಪಂದ್ಯಗಳನ್ನು ಹೊಂದಿದ್ದಾರೆ. ನಾನು ಸ್ವಲ್ಪ ಹೆಚ್ಚು ಟೆಸ್ಟ್ ಕ್ರಿಕೆಟ್ ನೋಡಲು ಬಯಸುತ್ತೇನೆ. ನೀವು ಟೆಸ್ಟ್ ಕ್ರಿಕೆಟ್ ಆಡುತ್ತಿದ್ದರೆ, ನಾನು ಮೂರು ಟೆಸ್ಟ್ ಪಂದ್ಯಗಳ ಅಥವಾ ಐದು ಪಂದ್ಯಗಳ ಸರಣಿಯನ್ನು ಇಷ್ಟಪಡುತ್ತೇನೆ," ಎಂದು ವೆಸ್ಟ್ ಇಂಡೀಸ್ ಲೆಜೆಂಡ್ ಕ್ಲೈವ್ ಲಾಯ್ಡ್ ಅವರು ತಿಳಿಸಿದರು

ಪಿಟಿಐ ಉಲ್ಲೇಖಿಸಿದಂತೆ, ಗುರುವಾರ, ಜನವರಿ 11ರಂದು ಕೋಲ್ಕತ್ತಾದಲ್ಲಿ ನಡೆದ ಏಕಮ್ ಪ್ರಶಸ್ತಿ ಪ್ರದಾನ ಸಮಾರಂಭದಲ್ಲಿ ವೆಸ್ಟ್ ಇಂಡೀಸ್ ಲೆಜೆಂಡ್ ಕ್ಲೈವ್ ಲಾಯ್ಡ್ ಭಾಗವಹಿಸಿ ಮಾತನಾಡಿದರು.

ತಂಡಗಳು ಕೇವಲ ಎರಡು ಟೆಸ್ಟ್ ಪಂದ್ಯಗಳನ್ನು ಆಡಲು ಬೇರೆ ದೇಶಕ್ಕೆ ಪ್ರಯಾಣಿಸಲು ಸ್ವಲ್ಪವೂ ಅರ್ಥವಿಲ್ಲ ಎಂದು 1975 ಮತ್ತು 1979ರ ಏಕದಿನ ವಿಶ್ವಕಪ್ ವಿಜೇತ ನಾಯಕ ಕ್ಲೈವ್ ಲಾಯ್ಡ್ ಅಭಿಪ್ರಾಯಪಟ್ಟಿದ್ದಾರೆ.

"ವೆಸ್ಟ್ ಇಂಡೀಸ್ ಎರಡು ಟೆಸ್ಟ್ ಪಂದ್ಯಗಳಿಗಾಗಿ 12,000 ಮೈಲುಗಳಷ್ಟು ಆಸ್ಟ್ರೇಲಿಯಾಕ್ಕೆ ಪ್ರಯಾಣಿಸಬೇಕೆಂದು ನಾನು ಭಾವಿಸುವುದಿಲ್ಲ ಮತ್ತು ಇದರಲ್ಲಿ ಅರ್ಥವಿಲ್ಲ," ಎಂದರು.

"ಇತರ ಪಂದ್ಯಗಳಂತೆ, ಭಾರತ ಮತ್ತು ದಕ್ಷಿಣ ಆಫ್ರಿಕಾ ಸರಣಿಯೂ ಒಂದಾಯಿತು. ಆಗ ಎರಡು ತಂಡಗಳಲ್ಲಿ ಯಾರು ಉತ್ತಮರು ಎಂಬುದನ್ನು ಇನ್ನೊಂದು ಟೆಸ್ಟ್ ತೋರಿಸುತ್ತಿತ್ತು," ಎಂದು ಕ್ಲೈವ್ ಲಾಯ್ಡ್ ಪ್ರತಿಕ್ರಿಯಿಸಿದ್ದಾರೆ.

"ಟಿ20 ಒಂದು ಪ್ರದರ್ಶನ ಮತ್ತು ಟೆಸ್ಟ್ ಕ್ರಿಕೆಟ್ ಒಂದು ಪರೀಕ್ಷೆ ಎಂದು ನಾನು ಮತ್ತೆ ಮತ್ತೆ ಹೇಳಿದ್ದೇನೆ. ನಮ್ಮ ಯುವ ಆಟಗಾರರು ಚೆಂಡನ್ನು ಮೈದಾನದಿಂದ ಹೊರಗೆ ಹೊಡೆಯಲು ಪ್ರಯತ್ನಿಸುವ ಅಭ್ಯಾಸವನ್ನು ಪಡೆಯುತ್ತಿದ್ದಾರೆ, ಇದರಿಂದ ಅವರು ಬೇರೆಡೆ ಒಪ್ಪಂದ ಮಾಡಿಕೊಳ್ಳಬಹುದು. ಅದನ್ನು ನಾನು ಅದನ್ನು ಇಷ್ಟಪಡುವುದಿಲ್ಲ," ಎಂದು 79 ವರ್ಷದ ಕ್ಲೈವ್ ಲಾಯ್ಡ್ ತಿಳಿಸಿದರು.

ಟಿ20 ಕ್ರಿಕೆಟ್ ಸಾಕಷ್ಟು ರೋಮಾಂಚನಕಾರಿಯಾಗಿದೆ ಎಂದು ಒಪ್ಪಿಕೊಂಡ ಕೆರಿಬಿಯನ್ ಮಾಜಿ ಕ್ರಿಕೆಟಿಗ ಕ್ಲೈವ್ ಲಾಯ್ಡ್, ಇದರಿಂದ ಟೆಸ್ಟ್ ಕ್ರಿಕೆಟ್‌ ತೊಂದರೆ ಅನುಭವಿಸಬಾರದು ಎಂದು ಹೇಳಿದರು.

ಕೇಪ್ ಟೌನ್ ಪಿಚ್ ಕಳಪೆಯಾಗಿದೆ ಎಂದು ನಾನು ಭಾವಿಸುವುದಿಲ್ಲ; ಕ್ಲೈವ್ ಲಾಯ್ಡ್

ಭಾರತ ಮತ್ತು ದಕ್ಷಿಣ ಆಫ್ರಿಕಾ ಟೆಸ್ಟ್‌ ಪಂದ್ಯಕ್ಕಾಗಿ ನ್ಯೂಲ್ಯಾಂಡ್ಸ್ ಪಿಚ್ 642 ಎಸೆತಗಳಲ್ಲಿ ಪಂದ್ಯ ಮುಗಿದ ನಂತರ ಸ್ಕ್ಯಾನರ್‌ಗೆ ಒಳಗಾಯಿತು. ಇದು ಇತಿಹಾಸದಲ್ಲಿ ಅತ್ಯಂತ ಕಡಿಮೆ ಟೆಸ್ಟ್ ಪಂದ್ಯವೆನಿಸಿತು.

ಐಸಿಸಿ ಪಿಚ್ ಅನ್ನು "ಅತೃಪ್ತಿಕರ' ಎಂದು ರೇಟ್ ಮಾಡಿದೆ. ಆದರೆ, ಕ್ಲೈವ್ ಲಾಯ್ಡ್ ವಿಕೆಟ್‌ನಲ್ಲಿ ಯಾವುದೇ ತಪ್ಪನ್ನು ಹುಡುಕುಲಿಲ್ಲ. ಆತಿಥೇಯ ಬ್ಯಾಟರ್ ಏಡೆನ್ ಮಾರ್ಕ್ರಾಮ್ ಶತಕ ಗಳಿಸಿದ್ದನ್ನು ನೆನಪಿಸಿದರು.

"ಪಿಚ್‌ನಲ್ಲಿ ಏನೂ ತಪ್ಪಿಲ್ಲ ಎಂದು ನಾನು ಭಾವಿಸುತ್ತೇನೆ. ಅದೇ ಪಿಚ್‌ನಲ್ಲಿ ಏಡೆನ್ ಮಾರ್ಕ್ರಾಮ್ ಶತಕ ಗಳಿಸಿದರು. ಆದ್ದರಿಂದ ಇದು ಕೇವಲ ಅಪ್ಲಿಕೇಶನ್ ಎಂದು ನಾನು ಭಾವಿಸುತ್ತೇನೆ ಮತ್ತು ಭಾರತದಲ್ಲಿ ಅದು ಸಂಭವಿಸಿದ್ದರೆ, ಅವರು ತವರಿನ ಆಟಗಾರರಿಗೆ ಏನು ಮಾಡುತ್ತಿದ್ದರು ಎಂದು ನಾನು ಆಶ್ಚರ್ಯ ಪಡುತ್ತೇನೆ," ಎಂದು ಅವರು ಹೇಳಿದರು.

"ಹಿಂದಿನ ದಿನ ಭಾರತ ತಂಡ ಇಲ್ಲಿ ತಿರುವು ಪಿಚ್ ಹೊಂದಿತ್ತು ಮತ್ತು ಎಲ್ಲರೂ ಪಿಚ್ ಬಗ್ಗೆ ಕೆಲವು ಭಯಾನಕ ವಿಷಯಗಳನ್ನು ಹೇಳಿದರು. ನೀವು ಉನ್ನತ ದರ್ಜೆಯ ಕ್ರಿಕೆಟ್ ಆಡುತ್ತಿದ್ದರೆ, ಅಂತಹ ವಿಷಯಗಳನ್ನು ನಿಭಾಯಿಸಲು ನಿಮಗೆ ಸಾಧ್ಯವಾಗುತ್ತದೆ," ಎಂದು ಕ್ಲೈವ್ ಲಾಯ್ಡ್ ಹೇಳಿದರು.

ಎರಡನೇ ಟೆಸ್ಟ್‌ ಪಂದ್ಯದ ಮೊದಲ ದಿನದಂದು ದಕ್ಷಿಣ ಆಫ್ರಿಕಾ 55 ರನ್‌ಗಳಿಗೆ ಆಲೌಟ್ ಆಗಿತ್ತು. ನಂತರ ಆ ಪಂದ್ಯವನ್ನು ಭಾರತ ಏಳು ವಿಕೆಟ್‌ಗಳಿಂದ ಗೆದ್ದುಕೊಂಡಿತು.