T20 WC 2024: ಯುಎಸ್ಎ ವಿರುದ್ಧ ಭಾರತಕ್ಕೆ 5 ಪೆನಾಲ್ಟಿ ರನ್ ನೀಡಿದ್ದಕ್ಕೆ ಮಾಜಿ ಕ್ರಿಕೆಟಿಗ ಆಕ್ರೋಶ

ಬುಧವಾರ, ಜೂನ್ 12ರಂದು ನ್ಯೂಯಾರ್ಕ್‌ನ ನಸ್ಸೌ ಕೌಂಟಿ ಸ್ಟೇಡಿಯಂನಲ್ಲಿ ನಡೆದ 2024ರ ಐಸಿಸಿ ಟಿ20 ವಿಶ್ವಕಪ್ ಪಂದ್ಯಾವಳಿಯ ರೋಚಕ ಪಂದ್ಯದಲ್ಲಿ ಭಾರತ ತಂಡವು ಯುಎಸ್ಎ ವಿರುದ್ಧ 7 ವಿಕೆಟ್‌ಗಳ ಭರ್ಜರಿ ಗೆಲುವು ಸಾಧಿಸಿತು.

ಇದೇ ವೇಳೆ ಆತಿಥೇಯ ಯುಎಸ್ಎ ಬೌಲರ್‌ಗಳ ನಿಧಾನಗತಿಯ ಓವರ್‌ನಿಂದಾಗಿ ಪಂದ್ಯದ ಅಂಪೈರ್ ಪಾಲ್ ರೀಫೆಲ್ ಅವರು ಭಾರತ ತಂಡಕ್ಕೆ 5 ಪೆನಾಲ್ಟಿ ರನ್‌ಗಳನ್ನು ನೀಡಿದರು.

ಯುಎಸ್ಎ ತಂಡ ನಿಗದಿತ 20 ಓವರ್‌ಗಳಲ್ಲಿ 8 ವಿಕೆಟ್‌ಗೆ 110 ರನ್ ಗಳಿಸಿತು. ಅಮೆರಿಕ ನೀಡಿದ 111 ರನ್‌ಗಳ ಗುರಿ ಬೆನ್ನಟ್ಟಿದ ಭಾರತ ತಂಡ ಬ್ಯಾಟಿಂಗ್ ಆರಂಭಿಸಿತು.

ಭಾರತದ ಬ್ಯಾಟಿಂಗ್ ಸಮಯದಲ್ಲಿ ಅಂಪೈರ್ ಪೌಲ್ ರೀಫೆಲ್ ಅವರು ಯುಎಸ್ಎ ತಂಡದ ಹಂಗಾಮಿ ನಾಯಕನೊಂದಿಗೆ ಮಾತನಾಡಿದರು ಮತ್ತು ಯುಎಸ್ಎ ಬೌಲರ್‌ಗಳು ಸರಿಯಾದ ಸಮಯಕ್ಕೆ ಮೂರು ಓವರ್‌ಗಳನ್ನು ಆರಂಭಿಸದ ಪರಿಣಾಮವಾಗಿ ಭಾರತಕ್ಕೆ 5 ಪೆನಾಲ್ಟಿ ರನ್ ನೀಡಲಾಗುವುದು ಎಂದು ತಿಳಿಸಿದರು.

ಐಸಿಸಿ ವಿರುದ್ಧ ಹರ್ಭಜನ್ ಸಿಂಗ್ ವಾಗ್ದಾಳಿ

ಆತಿಥೇಯ ಯುಎಸ್ಎ ಬೌಲರ್‌ಗಳು ನಿಗದಿತ ಸಮಯಕ್ಕೆ ಓವರ್‌ಗಳನ್ನು ಎಸೆಯದ ಕಾರಣ, ಭಾರತಕ್ಕೆ 5 ಪೆನಾಲ್ಟಿ ರನ್‌ಗಳನ್ನು ನೀಡಲಾಯಿತು. ನಂತರ ಭಾರತದ ಮಾಜಿ ಕ್ರಿಕೆಟಿಗ ಹರ್ಭಜನ್ ಸಿಂಗ್ ಅವರು ಐಸಿಸಿ ವಿರುದ್ಧ ವಾಗ್ದಾಳಿ ನಡೆಸಿದರು.

"ಟೀಮ್ ಇಂಡಿಯಾಕ್ಕೆ 5 ರನ್ ಏಕೆ ನೀಡಲಾಯಿತು ಎಂದು ನನಗೆ ಅರ್ಥವಾಗುತ್ತಿಲ್ಲ. ಇದು ಇಂದು ಭಾರತದ ಪರವಾಗಿ ಹೋಯಿತು. ಆದರೆ ಭವಿಷ್ಯದ ಪಂದ್ಯದಲ್ಲಿ ಅವರ ವಿರುದ್ಧ ಹೋಗಬಹುದು. ಐಸಿಸಿಯು ಆಗೊಮ್ಮೆ ಈಗೊಮ್ಮೆ ಹೊಸ ನಿಯಮಗಳನ್ನು ಪರಿಚಯಿಸುತ್ತಿದೆ ಮತ್ತು ಅವುಗಳ ಬಗ್ಗೆ ಯಾರಿಗೂ ತಿಳಿದಿಲ್ಲ," ಎಂದು ಹರ್ಭಜನ್ ಸಿಂಗ್ ಕಿಡಿಕಾರಿದರು.

"ಪಂದ್ಯದ ಹರಿವನ್ನು ನಿಯಂತ್ರಿಸಲು ಇತರ ಮಾರ್ಗಗಳಿವೆ. ಈ ಮೊದಲು ಒಂದು ಇನ್ನಿಂಗ್ಸ್‌ಗೆ ನಿಗದಿತ ಸಮಯದ ಆಧಾರದ ಮೇಲೆ ಓವರ್ ರೇಟ್ ಅನ್ನು ಲೆಕ್ಕ ಹಾಕಲಾಗುತ್ತಿತ್ತು. ಆದರೆ ಇದೀಗ ನೀವು ಒಂದು ಓವರ್‌ಗೆ ಸಮಯದ ಮಿತಿಯನ್ನು ಇಟ್ಟುಕೊಂಡಿದ್ದೀರಿ. ಇದು ನನಗೆ ಅರ್ಥವಾಗುತ್ತಿಲ್ಲ," ಎಂದು ಹರ್ಭಜನ್ ಸಿಂಗ್ ಹೇಳಿದರು.

"ಅಂತಹ ನಿಯಮಗಳು ಅಸ್ತಿತ್ವದಲ್ಲಿರಬಾರದು ಮತ್ತು ಕ್ರಿಕೆಟ್ ಆಟವನ್ನು ಸರಳವಾಗಿ ಇಡಬೇಕು. ಐಸಿಸಿ ಇಂತಹ ನಿಯಮಗಳಿಂದ ವಿಷಯಗಳನ್ನು ಸಂಕೀರ್ಣಗೊಳಿಸುತ್ತದೆ," ಎಂದು ಭಾರತದ ಮಾಜಿ ಸ್ಪಿನ್ನರ್ ಹರ್ಭಜನ್ ಸಿಂಗ್ ಅಭಿಪ್ರಾಯಪಟ್ಟರು.

ಡೆಡ್ ಬಾಲ್ ನಿಯಮದ ಬಗ್ಗೆ ಹರ್ಭಜನ್ ಸಿಂಗ್ ಹೇಳಿದ್ದೇನು?

ಇದೇ ವೇಳೆ ಮಾಜಿ ಕ್ರಿಕೆಟಿಗ ಹರ್ಭಜನ್ ಸಿಂಗ್ ಅವರು ದಕ್ಷಿಣ ಆಫ್ರಿಕಾ ಮತ್ತು ಬಾಂಗ್ಲಾದೇಶ ಪಂದ್ಯದ ಸಮಯದಲ್ಲಿ ಹೆಚ್ಚು ಗಮನ ಸೆಳೆದ ಡೆಡ್ ಬಾಲ್ ನಿಯಮದ ವಿರುದ್ಧ ಮಾತನಾಡಿದರು.

"ಐಸಿಸಿ ಡೆಡ್ ಬಾಲ್ ನಿಯಮದ ಬಗ್ಗೆಯೂ ಮಾತನಾಡಬೇಕು. ನನ್ನ ಪ್ರಕಾರ, ಬಾಂಗ್ಲಾದೇಶ ತಂಡಕ್ಕೆ ನಾಲ್ಕು ರನ್‌ಗಳು ಸಿಗಬೇಕಿತ್ತು. ಆದರೆ ನಿಯಮವು ಅದನ್ನು ಅನುಮತಿಸಲಿಲ್ಲ. ನಾಲ್ಕು ರನ್‌ಗಳನ್ನು ಪಡೆದಿದ್ದರೆ, ಬಾಂಗ್ಲಾದೇಶ ಪಂದ್ಯವನ್ನು ಗೆಲ್ಲಬೇಕಿತ್ತು ಮತ್ತು ದಕ್ಷಿಣ ಆಫ್ರಿಕಾ ಅಲ್ಲ," ಎಂದು ಹೇಳಿದರು.

ಉತ್ತಮ ಮಾರ್ಜಿನ್‌ಗಳ ಪಂದ್ಯದಲ್ಲಿ, ಚೆಂಡು ಪ್ಯಾಡ್‌ಗಳಿಂದ ತಿರುಗಿ 4 ರನ್‌ಗಳಿಗೆ ಹೋಯಿತು. ಡೆಡ್ ಬಾಲ್ ನಿಯಮವು ಬಾಂಗ್ಲಾದೇಶ ತಂಡಕ್ಕೆ 4 ರನ್‌ಗಳನ್ನು ನೀಡದ ನಂತರ, ಬಾಂಗ್ಲಾದೇಶವು ಪಂದ್ಯವನ್ನು ಸೋತಿತು. ಏಕೆಂದರೆ ಅಂಪೈರ್ ಔಟ್ ಎಂದು ತೀರ್ಪು ನೀಡಲು ಕೈ ಮೇಲೆತ್ತಿದರು.