ಟಿ20 ವಿಶ್ವಕಪ್ 2022ಗೆ ಭಾರತ ತಂಡದ ಆಯ್ಕೆ ಯಾವಾಗ?: ಬಹಿರಂಗವಾಯ್ತು ಘೋಷಣೆಯ ದಿನಾಂಕ

ಸೆಪ್ಟೆಂಬರ್ 15ರಂದು ತಂಡದ ಆಯ್ಕೆ

ಮಾಹಿತಿಯ ಪ್ರಕಾರ ಸೆಪ್ಟೆಂಬರ್ 15ರಂದು ಟಿ20 ವಿಶ್ವಕಪ್‌ನಲ್ಲಿ ಭಾಗವಹಿಸುವ ಭಾರತ ತಂಡದ ಸದಸ್ಯರ ಘೋಷಣೆಯಾಗಲಿದೆ. ಇದಕ್ಕೂ ಮುನ್ನ ರಾಷ್ಟ್ರೀಯ ತಂಡದ ಆಯ್ಕೆಗಾರರ ಮಸಿತಿ ಮುಂಬೈನಲ್ಲಿ ಸಭೆ ಸೇರಲಿದ್ದು ಈ ವಿಚಾರವಾಗಿ ಚರ್ಚೆ ನಡೆಸಲಿದೆ. ಇನ್ನು ಏಷ್ಯಾ ಕಪ್ ಟೂರ್ನಿಯ ಫೈನಲ್ ಪಂದ್ಯ ಕೂಡ ನಡೆಯಲಿದ್ದು ಏಷ್ಯಾ ಕಪ್‌ನಲ್ಲಿ ರೋಹಿತ್ ಶರ್ಮಾ ನೇತೃತ್ವದ ತಂಡದ ಪ್ರದರ್ಶನವನ್ನು ಸೂಕ್ಷ್ಮವಾಗಿ ಗಮನಿಸಲಿದೆ. ಏಷ್ಯಾ ಕಪ್ ಟೂರ್ನಿಯ ಫೈನಲ್ ಮುಕ್ತಾಯವಾಗಿ ನಾಲ್ಕು ದಿನಗಳ ನಂತರ ವಿಶ್ವಕಪ್ ತಂಡಕ್ಕೆ ಭಾರತ ತಂಡದ ಘೋಷಣೆಯಾಗಲಿದೆ.

ಸೆಪ್ಟೆಂಬರ್ 11ರಂದು ಏಷ್ಯಾ ಕಪ್ ಫೈನಲ್

ಸಾಕಷ್ಟು ಕುತೂಹಲ ಮೂಡಿಸಿರುವ ಏಷ್ಯಾ ಕಪ್ ಟೂರ್ನಿ ಆಗಸ್ಟ್ 27ರಂದು ಯುಎಇನಲ್ಲಿ ಆರಂಭವಾಗಲಿದ್ದು ಸೆಪ್ಟೆಂಬರ್ 11ರಂದು ಫೈನಲ್ ಪಂದ್ಯ ನಡೆಯಲಿದೆ. ಈ ಟೂರ್ನಿಯಲ್ಲಿ ಭಾರತ ತಮಡದ ಆಟಗಾರರ ಪ್ರದರ್ಶನ ಬಹಳಷ್ಟು ಪ್ರಮುಖವಾಗಿದ್ದು ಈ ಟೂರ್ನಿಯಲ್ಲಿ ಭಾಗವಹಿಸಿರುವ ಆಟಗಾರರ ಪೈಕಿ ಸಣ್ಣ ಪುಟ್ಟ ಬದಲಾವಣೆಗಳನ್ನು ಮಾಡಿಕೊಳ್ಳುವ ಸಾಧ್ಯತೆಯಿದೆ. ಟಿ20 ವಿಶ್ವಕಪ್‌ನಲ್ಲಿ ಭಾರತದ ಅಭಿಯಾನ ಅಕ್ಟೋಬರ್ 23ರಂದು ಪಾಕಿಸ್ತಾನದ ವಿರುದ್ಧದ ಪಂದ್ಯದ ಮೂಲಕ ಆರಂಭವಾಗಲಿದೆ.

ತಂಡಗಳ ಘೋಷಣೆಗೆ ಐಸಿಸಿ ಡೆಡ್‌ಲೈನ್

ಇನ್ನು ಟಿ20 ವಿಶ್ವಕಪ್‌ನಲ್ಲಿ ಭಾಗವಹಿಸುವ ಎಲ್ಲಾ ತಂಡಗಳು ತಮ್ಮ ತಂಡಗಳ ಆಟಗಾರರ ಬಳಗವನ್ನು ಘೋಷಣೆ ಮಾಡಲು ಐಸಿಸಿ ಅಂತಿಮ ಗಡುವನ್ನು ಈಗಾಗಲೇ ನಿಗದಿಪಡಿಸಿದೆ. ಸೆಪ್ಟೆಂಬರ್ 16ರಂದು ತಂಡಗಳ ಘೋಷಣೆಗೆ ಅಂತಿಮ ದಿನಾಂಕವಾಗಿದೆ. ಅದಕ್ಕೆ ಒಂದು ದಿನ ಮುಂಚಿತವಾಗಿ ತಂಡವನ್ನು ಘೋಷಣೆ ಮಾಡಲಿದೆ ಭಾರತ. ಪ್ರತಿ ತಂಡ ಗರಿಷ್ಠ 15 ಸದಸ್ಯರ ಸ್ಕ್ವಾಡ್ ಘೋಷಣೆಗೆ ಅವಕಾಶವಿದೆ. ಇನ್ನು ಸಹಾಯಕ ಸಿಬ್ಬಂದಿಗಳು ಸೇರಿ ಒಟ್ಟು 30 ಮಂದಿಯ ಪಡೆಯೊಂದಿಗೆ ವಿಶ್ವಕಪ್‌ಗೆ ತೆರಳಲು ಅವಕಾಶವಿದೆ.

ಏಷ್ಯಾ ಕಪ್‌ಗೆ ತೆರಳಿದ ಆಟಗಾರು ಬಹುತೇಕ ಫಿಕ್ಸ್

ಇನ್ನು ಮುಂದಿನ ಟಿ20 ವಿಶ್ವಕಪ್‌ನಲ್ಲಿ ಭಾಗವಹಿಸಲಿರುವ ಭಾರತ ತಂಡಕ್ಕೆ ಏಷ್ಯಾ ಕಪ್‌ಗೆ ತೆರಳಿರುವ ಬಹುತೇಕ ಆಟಗಾರರು ಸ್ಥಾನ ಪಡೆಯುವ ಸಾಧ್ಯತೆಯಿದೆ. ಆದರೆ ಕೆಲವೊಂದಿ ಸಣ್ಣಪುಟ್ಟ ಬದಲಾವಣೆಗಳನ್ನು ನಿರೀಕ್ಷಿಸಲಾಗುತ್ತಿದೆ. ಇನ್ನು ಜಸ್ಪ್ರೀತ್ ಬೂಮ್ರಾ ಹಾಗೂ ಹರ್ಷಲ್ ಪಟೇಲ್ ಗಾಯದ ಕಾರಣದಿಮದಾಗಿ ಏಷ್ಯಾಕಪ್ ಟೂರ್ನಿಯಿಂದ ಹೊರಗುಳಿದಿದ್ದು ಚೇತರಿಸಿಕೊಂಡು ಅವರು ಮತ್ತೆ ತಂಡದಲ್ಲಿ ಸ್ಥಾನವನ್ನು ಪಡೆಯಲಿದ್ದಾರೋ ಎಂಬುದು ಕುತೂಹಲ ಮೂಡಿಸಿದೆ.