ಹತ್ತು ಪುಟಗಳ ಆರೋಪ
ಬಿಸಿಸಿಐ ಅಧಿಕಾರಿಗಳಿಗೆ ಬುಧವಾರ (ನವೆಂಬರ್ 28) ಸುಮಾರು 10 ಪುಟಗಳ ವರದಿ ಸಲ್ಲಿಸಿರುವ ರಮೇಶ್ ಪೊವಾರ್, ತನ್ನ ಸಾಧನೆಗಾಗಿ ಗುರುತಿಸಿಕೊಂಡ ಬಳಿಕ ಮಿಥಾಲಿ ತಂಡದಲ್ಲಿ ಆಡುವುದಿಲ್ಲವೆಂದು ನಮ್ಮನ್ನು ಬ್ಲ್ಯಾಕ್ ಮೇಲೆ ಮಾಡುತ್ತಿದ್ದರು ಎಂದು ಆರೋಪಿಸಿದ್ದಾರೆ.
ವರದಿಯಲ್ಲಿ ಇನ್ನೇನಿತ್ತು?
ನಮ್ಮ ಮೇಲೆ ಬೆದರಿಕೆಯೊಡ್ಡುವುದನ್ನು ಮಿಥಾಲಿ ನಿಲ್ಲಿಸುತ್ತಾರೆಂದು ನಾವು ಭಾವಿಸುತ್ತೇವೆ. ಅವರಿಗೆ ತಂಡದ ಹಿತಾಸಕ್ತಿಗಿಂತ ಸ್ವ-ಹಿತಾಸಕ್ತಿ ಮುಖ್ಯ. ಐಸಿಸಿ ಮಹಿಳಾ ಟಿ20 ಟೂರ್ನಿಯಲ್ಲಿ ಪಾಕಿಸ್ತಾನದ ವಿರುದ್ಧ ಪಂದ್ಯಕ್ಕೂ ಮುನ್ನ ಬ್ಯಾಟಿಂಗ್ ಕ್ರಮಾಂಕದ ವಿಚಾರದಲ್ಲಿ ಮುನಿಸಿಕೊಂಡಿದ್ದ ಮಿಥಾಲಿ ತಾನು ಪಂದ್ಯವನ್ನಾಡೋದಿಲ್ಲ, ನಿವೃತ್ತಿ ಘೋಷಿಸುತ್ತೇನೆ ಎಂದು ಹೊರಟಿದ್ದರು ಎಂದು ವರದಿಯಲ್ಲಿ ಪೊವಾರ್ ವಿವರಿಸಿದ್ದಾರೆ.
ಮಿಥಾಲಿ ಯಾಕೆ ಅರಂಭಿಕ ಆಟಗಾರ್ತಿಯಲ್ಲ?
ಪೊವಾರ್ ದೂರಿರುವ ಪ್ರಕಾರ ಮಿಥಾಲಿ ತಾನು ಆರಂಭಿಕ ಆಟಗಾರ್ತಿಯಾಗಿ ಬರಲು ಬಯಸಿದ್ದರು ಎನ್ನಲಾಗಿದೆ. ಆದರೆ ಮಿಥಾಲಿಗೆ ಮಧ್ಯಮ ಬ್ಯಾಟಿಂಗ್ ಕ್ರಮಾಂಕ ನೀಡಲಾಗಿತ್ತು. ಇದೇ ವಿಚಾರಕ್ಕೆ ಮಿಥಾಲಿ ಮುನಿಸಿಕೊಂಡಿದ್ದರು ಎಂದು ವರದಿಯಲ್ಲಿ ದೂರಲಾಗಿದೆ. ಅಭ್ಯಾಸದ ವೇಳೆ ಆರಂಭಿಕ ಆಟಗಾರ್ತಿಗೆ ಒಗ್ಗುವಂತ ಆಟ ಪ್ರದರ್ಶಿಸಿರಲಿಲ್ಲ. ಹೀಗಾಗಿ ಮಿಥಾಲಿಯನ್ನು ಮಧ್ಯಮ ಕ್ರಮಾಂಕಕ್ಕೆ ಬದಲಾಯಿಸಿದ್ದೆವು. ಇದಕ್ಕೆ ಆಕೆ ಅಸಮಾಧಾನಗೊಂಡಿದ್ದರು ಎಂದು ಪೊವಾರ್ ತಿಳಿಸಿದ್ದಾರೆ.
ಪೊವಾರ್ನತ್ತ ತಿರುಗುಬಾಣ
ಆದರೆ ಪೊವಾರ್ ಆರೋಪಕ್ಕೆ ಮಿಥಾಲಿ ಮತ್ತೆ ತಿರುಗೇಟು ನೀಡಿದ್ದಾರೆ. 'ನಾನು ದೂರದಲ್ಲೆಲ್ಲೂ ಕುಳಿತಿದ್ದಾಗ ಇತರರು ಬ್ಯಾಟಿಂಗ್ ಮಾಡುತ್ತಿದ್ದರೆ ಅದನ್ನು ರಮೇಶ್ ನೋಡುತ್ತಿದ್ದರು. ಅದೇ ನಾನು ನೆಟ್ನಲ್ಲಿ ಬ್ಯಾಟಿಂಗ್ ಅಭ್ಯಾಸಕ್ಕೆ ನಿಂತಾಗ ಅಲ್ಲಿಂದ ಎದ್ದು ಹೋಗುತ್ತಿದ್ದರು. ಹೀಗ್ಯಾಕೆ ಮಾಡುತ್ತೀರಿ ಅಂತ ಕೇಳಲು ನಾನು ಅವರ ಬಳಿ ಹೋದಾಗಲೂ ಮೊಬೈಲ್ ದಿಟ್ಟಿಸುತ್ತ ಅಲ್ಲಿ ನಡೆಯುವ ಮೂಲಕ ನನ್ನನ್ನು ರಮೇಶ್ ಅವಮಾನಿಸುತ್ತಿದ್ದರು. ಆದರೂ ನಾನು ತಾಳ್ಮೆ ಕಳೆದುಕೊಂಡಿರಲಿಲ್ಲ' ಎಂದು ಮಿಥಾಲಿ ಹೇಳಿದ್ದಾರೆ.