ಟೀಮ್ ಇಂಡಿಯಾ ಯಾವುದೇ ಸವಾಲು ಸ್ವೀಕರಿಸಲು ಸಿದ್ಧ: ವಿರಾಟ್ ಕೊಹ್ಲಿ

ಕೋಲ್ಕತ್ತಾ, ನವೆಂಬರ್ 21: ಭಾರತ ಕ್ರಿಕೆಟ್‌ ತಂಡ ಯಾವುದೇ ರೀತಿಯ ಸವಾಲು ಸ್ವೀಕರಿಸಲು ಯಾವಾಗಲೂ ಸಿದ್ಧವಾಗಿದೆ ಎಂದು ಟೀಮ್ ಇಂಡಿಯಾ ನಾಯಕ ವಿರಾಟ್ ಕೊಹ್ಲಿ ಹೇಳಿದ್ದಾರೆ. ಅವರು ಭಾರತ vs ಬಾಂಗ್ಲಾದೇಶ ನಡುವಿನ ದ್ವಿತೀಯ ಟೆಸ್ಟ್‌ ಕುರಿತು ಕೋಲ್ಕತ್ತಾದಲ್ಲಿ ನಡೆದ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದರು.

ಭಾರತ ಪ್ರವಾಸದಲ್ಲಿರುವ ಬಾಂಗ್ಲಾದೇಶ ತಂಡ ನವೆಂಬರ್ 22ರಂದು ಕೊಹ್ಲಿ ಪಡೆ ವಿರುದ್ಧ ದ್ವಿತೀಯ ಟೆಸ್ಟ್ ಪಂದ್ಯವನ್ನಾಡಲಿದೆ. ಇದು ಡೇ-ನೈಟ್ ಟೆಸ್ಟ್ ಪಂದ್ಯವಾಗಿರುವುದರಿಂದ ಎರಡೂ ತಂಡಗಳಿಗೂ ವಿಶೇಷವೆನಿಸಿದೆ. ಯಾಕೆಂದರೆ ಭಾರತ-ಬಾಂಗ್ಲಾ ಎರಡೂ ತಂಡಗಳು ಈ ಮೊದಲು ಡೇ-ನೈಟ್ ಟೆಸ್ಟ್‌ನಲ್ಲಿ ಆಡಿಲ್ಲ.

ಕೋಲ್ಕತ್ತಾ ಈಡನ್ ಗಾರ್ಡನ್ ಸ್ಟೇಡಿಯಂನಲ್ಲಿ ನಡೆಸಲುದ್ದೇಶಿಸಿರುವ ಚೊಚ್ಚಲ ಡೇ-ನೈಟ್ ಟೆಸ್ಟ್ ಪಂದ್ಯದಲ್ಲಿ ಮೊದಲ ಬಾರಿಗೆ ಭಾರತ-ಬಾಂಗ್ಲಾ ತಂಡಗಳು ಪಿಂಕ್‌ಬಾಲನ್ನು ಎದುರಿಸಲಿದೆ. ಹೀಗಾಗಿ ಎರಡೂ ತಂಡಗಳ ಪಾಲಿಗೂ ಕೋಲ್ಕತ್ತಾ ಪಂದ್ಯ ಸವಾಲಿನದ್ದು. ಆದರೆ ಭಾರತ ಈ ಸವಾಲು ಸ್ವೀಕರಿಸಲು ಸಜ್ಜಾಗಿದೆ ಎಂಬರ್ಥದಲ್ಲಿ ಕೊಹ್ಲಿ ಮಾತನಾಡಿದ್ದಾರೆ.

ಸುದ್ದಿ ಗೋಷ್ಠಿಯಲ್ಲಿ ಮಾತನಾಡುತ್ತ ಕೊಹ್ಲಿ, 'ಪಿಂಕ್‌ ಬಾಲ್ ಟೆಸ್ಟ್ ಮ್ಯಾಚ್ ನಮ್ಮ ಪಾಲಿಗೆ ಸವಾಲಿನದ್ದು. ಇಲ್ಲಿ ಶಕ್ತಿ ಪ್ರದರ್ಶನ ಹೆಚ್ಚಿನ ಮಟ್ಟದಲ್ಲಿ ಬೇಕಾಗಿರುವುದರಿಂದ ನಮಗೂ ರೋಮಾಂಚನ ತಂದಿದೆ. ಪಿಂಕ್‌ ಬಾಲ್ ಟೆಸ್ಟ್ ಪಂದ್ಯ ಹೊಸ ಮೈಲಿಗಲ್ಲಾಗಿಯೂ ಗುರುತಿಸಿಕೊಳ್ಳಲಿದೆ,' ಎಂದರು. ನವೆಂಬರ್ 22-26ರ ವರೆಗೆ ನಡೆಯುವ ಡೇ-ನೈಟ್ ಟೆಸ್ಟ್ ಪಂದ್ಯ 1 pmಗೆ ಆರಂಭವಾಗಲಿದೆ.