ತಲೆಗೆ ಚೆಂಡು ಬಿದ್ದು ಆಸ್ಟ್ರೇಲಿಯಾದಲ್ಲಿ ಕ್ರಿಕೆಟಿಗ ಸಾವು

ಭಾರತ ಹಾಗೂ ಆಸ್ಟ್ರೇಲಿಯಾ ನಡುವಣ ಏಕದಿನ ಸರಣಿ ಮುಗಿದಿದೆ. ಇನ್ನು ಉಭಯ ದೇಶಗಳ ನಡುವೆ ಕ್ಯಾನ್‌ಬೆರಾದಲ್ಲಿ ನಡೆಯಬೇಕಿದ್ದ ಮೊದಲ ಟಿ20 ಪಂದ್ಯ ಸಹ ಮಳೆಯಿಂದ ರದ್ದಾಗಿದೆ. ಈ ವೇಳೆ ಆಸ್ಟ್ರೇಲಿಯಾದ ಮೆಲ್ಬೋರ್ನ್‌ನಿಂದ ಕೆಟ್ಟ ಸುದ್ದಿಯೊಂದು ಬಂದಿದ್ದು ನಿಜಕ್ಕೂ ಕ್ರಿಕೆಟ್ ಅಭಿಮಾನಿಗಳ ಕಣ್ಣಲ್ಲಿ ನೀರು ತರಿಸಿದೆ. ಆಸ್ಟ್ರೇಲಿಯಾದ 17 ವರ್ಷದ ಕ್ರಿಕೆಟ್‌ ಆಟಗಾರ ಬೆನ್ ಆಸ್ಟಿನ್ ನೆಟ್ಸ್‌ನಲ್ಲಿ ಅಭ್ಯಾಸದ ವೇಳೆ ತಲೆಗೆ ಚೆಂಡು ಬಿದ್ದು ಆಸ್ಪತ್ರೆಯಲ್ಲಿ ನಿಧನರಾಗಿದ್ದಾರೆ.

ಈ ಸುದ್ದಿಯನ್ನು ಕ್ರಿಕೆಟ್‌ ಆಸ್ಟ್ರೇಲಿಯಾ (CA) ಖಚಿತ ಪಡಿಸಿದೆ. ಬೆನ್ ಅಸ್ಟಿನ್ ಅವರ ನಿಧನಕ್ಕೆ CA ಸಂತಾಪ ಸೂಚಿಸಿದೆ. ಸಾಮಾಜಿಕ ತಾಣದಲ್ಲಿ ಕ್ರಿಕೆಟ್‌ ಆಸ್ಟ್ರೇಲಿಯಾ ಈ ಬಗ್ಗೆ ಪೋಸ್ಟ್ ಮಾಡಿದೆ. ಬ್ಯಾಟಿಂಗ್ ಮಾಡುವಾಗ ಅಪಘಾತದಲ್ಲಿ ಸಾವನ್ನಪ್ಪಿದ 17 ವರ್ಷದ ಬೆನ್ ಆಸ್ಟಿನ್ ಅವರ ದುರಂತ ಸಾವಿನಿಂದ ಕ್ರಿಕೆಟ್ ಆಸ್ಟ್ರೇಲಿಯಾ ಆಘಾತಕ್ಕೊಳಗಾಗಿದೆ ಎಂದು ಪೋಸ್ಟ್‌ ಮಾಡಿದೆ. ಇವರ ಅಗಲಿಕೆಗೆ ಕ್ರಿಕೆಟ್ ವಿಕ್ಟೋರಿಯಾ ಸಹ ಸಂತಾಪ ಸೂಚಿಸಿದೆ.

ಬೆನ್ ಆಸ್ಟಿನ್ ನೆಟ್ಸ್‌ನಲ್ಲಿ ಅಭ್ಯಾಸ ನಿರತರಾಗಿದ್ದರು. ಇವರು ಫರ್ನ್‌ಟ್ರೀ ಗಲ್ಲಿ ಕ್ರಿಕೆಟ್ ಕ್ಲಬ್ ಮತ್ತು ಎಲ್ಡನ್ ಪಾರ್ಕ್ ನಡುವಣ ಪಂದ್ಯಕ್ಕೆ ತಯಾರಿ ನಡೆಸಿದ್ದರು. ವಾಲಿ ಟ್ಯೂ ರಿಸರ್ವ್ ಮೈದಾನದಲ್ಲಿ ನೆಟ್ಸ್ ಅಭ್ಯಾಸದ ವೇಳೆ ಚೆಂಡು ನೇರವಾಗಿ ತಲೆಗೆ ಬಡೆದು ಇವರಿಗೆ ಗಂಭೀರ ಗಾಯವಾಗಿತ್ತು. ಇವರ ಸಹಾಯಕ್ಕೆ ತಕ್ಷಣ ಸಹ ಆಟಗಾರರು ಬಂದರು. ತಕ್ಷಣ ಅವರನ್ನು ಆಸ್ಪತ್ರೆಗೆ ದಾಖಲಿಸಲಾಯಿತು.

ಆಸ್ಪತ್ರೆಗೆ ದಾಖಲು

ಬೆನ್ ಆಸ್ಟಿನ್ ಅವರ ತಲೆಗೆ ಚೆಂಡು ಬಡೆಯುತ್ತಿದ್ದಂತೆ ಅವರಿಗೆ ತಕ್ಷಣ ಪ್ರಥಮ ಚಿಕಿತ್ಸೆ ನೀಡಲಾಯಿತು. ಕೆಲವೇ ನಿಮಿಗಳಲ್ಲಿ ಮೈದಾನಕ್ಕೆ ಸಹಾಯಕ ಸೇವೆಗಳಾದ ಆಂಬ್ಯುಲೆನ್ಸ್‌ಗಳು, ಅಗ್ನಿಶಾಮಕ ದಳ ಮತ್ತು ಪೊಲೀಸರು ಬಂದರು. ಅವರನ್ನ ಆಸ್ಪತ್ರೆಗೆ ಕರೆದುಕೊಂಡು ಹೋಗಿ ಲೈಫ್‌ ಸಪೋರ್ಟ್‌ ಸಿಸ್ಟಮ್‌ನಲ್ಲಿ ಇರಿಸಲಾಯಿತು. ಇನ್ನು ಇವರ ಚಿಕಿತ್ಸೆಗೆ ಸಾಧ್ಯ ಇರುವ ಎಲ್ಲ ಸಹಾಯವನ್ನು ಮಾಡುವುದಾಗಿ ರಿಂಗ್‌ವುಡ್ ಮತ್ತು ಜಿಲ್ಲಾ ಕ್ರಿಕೆಟ್ ಅಸೋಸಿಯೇಷನ್ ಅಧ್ಯಕ್ಷ ಮೈಕೆಲ್ ಫಿನ್ ಘೋಷಿಸಿದ್ದರು. ಕೊನೆಯಲ್ಲಿ ಬೆನ್‌ ಅಸ್ಟಿನ್ ಅವರು ಈ ಜೀವನದ ಹೋರಾಟ ಮುಗಿಸಿದರು.