ಅಂಡರ್-19 ವಿಶ್ವಕಪ್: ನ್ಯೂಜಿಲೆಂಡ್‌ ವಿರುದ್ಧ ಭಾರತಕ್ಕೆ ಗೆಲುವು

ಬ್ಲೂಮ್‌ಫಾಂಟೈನ್, ಜನವರಿ 24: ಎಡಗೈ ಸ್ಪಿನ್ನರ್ ಅಥರ್ವ ಅಂಕೋಲೆಕೆರ್ ಮತ್ತು ರವಿ ಬಿಷ್ಣೋಯ್ ಮಾರಕ ಬೌಲಿಂಗ್ ದಾಳಿಯ ನೆರವಿನಿಂದ ಅಂಡರ್ 19 ವಿಶ್ವಕಪ್‌ ಪಂದ್ಯದಲ್ಲಿ ಭಾರತ ತಂಡ, ನ್ಯೂಜಿಲೆಂಡ್ ವಿರುದ್ಧ 44 ರನ್ (ಡಕ್ವರ್ಥ್ ಲೂಯೀಸ್ ನಿಯಮದ ಆಧಾರದಲ್ಲಿ) ಜಯ ಗಳಿಸಿದೆ.

ಟಾಸ್ ಸೋತು ಬ್ಯಾಟಿಂಗ್‌ಗೆ ಇಳಿಸಲ್ಪಟ್ಟ ಭಾರತ, ಯಶಸ್ವಿ ಜೈಸ್ವಾಲ್ ಅಜೇಯ 57, ದಿವ್ಯಾಂಶ್ ಸಕ್ಷೇನಾ ಅಜೇಯ 52 ರನ್‌ ನೆರವಿನೊಂದಿಗೆ 23 ಓವರ್‌ಗೆ ವಿಕೆಟ್ ನಷ್ಟವಿಲ್ಲದೆ 115 ರನ್ ಗಳಿಸಿತು. ಪಂದ್ಯಕ್ಕೆ ಮಳೆ ಅಡ್ಡಿ ಪಡಿಸಿದ್ದರಿಂದ ಓವರ್‌ ಕಡಿತಗೊಳಿಸಿ ಡಿಎಲ್‌ಎಸ್ ನಿಯಮದ ಪ್ರಕಾರ ಎದುರಾಳಿಗೆ 23 ಓವರ್‌ಗೆ 192 ರನ್ ಗುರಿ ನೀಡಿಲಾಯ್ತು.

ಗುರಿ ಬೆನ್ನಟ್ಟಿದ ನ್ಯೂಜಿಲೆಂಡ್‌ ತಂಡ, ರೈಸ್ ಮಾರಿಯು 42, ಫರ್ಗುಸ್ ಲೆಲ್ಮನ್ 31, ಆಲ್ಲಿ ವೈಟ್‌ 14, ಬೇಕಮ್ ವೀಲರ್ 13 ರನ್‌ ಸೇರ್ಪಡೆಯೊಂದಿಗೆ 23 ಓವರ್‌ಗೆ ಎಲ್ಲಾ ವಿಕೆಟ್ ಕಳೆದು 147 ರನ್ ಪೇರಿಸಲಷ್ಟೇ ಶಕ್ತವಾಯ್ತು. ಕಿವೀಸ್‌ನ ಇನ್ಯಾರೂ ಬ್ಯಾಟ್ಸ್‌ಮನ್‌ಗಳು 10 ರನ್‌ ಗೆರೆ ಕೂಡ ದಾಟದಿದ್ದುದು ಸೋಲಿಗೆ ಕಾರಣವಾಯ್ತು.

ನ್ಯೂಜಿಲೆಂಡ್‌ ಇನ್ನಿಂಗ್ಸ್‌ನಲ್ಲಿ ಭಾರತದ ರವಿ ಬಿಷ್ಣೋಯ್ 30 ರನ್‌ಗೆ 4 ವಿಕೆಟ್, ಅಥರ್ವ ಅಂಕೋಲೆಕರ್ 28 ರನ್‌ಗೆ 3 ವಿಕೆಟ್‌, ಕಾರ್ತಿಕ್ ತ್ಯಾಗಿ ಮತ್ತು ಸುಶಾಂತ್ ಮಿಶ್ರಾ ತಲಾ 1 ವಿಕೆಟ್‌ ಪಡೆದು ಎದುರಾಳಿಯನ್ನು ಕಾಡಿದರು. ಭಾರತ ಮುಂದೆ ಕ್ವಾರ್ಟರ್ ಫೈನಲ್‌ನಲ್ಲಿ ಆಡಲಿದ್ದು, ಅಲ್ಲಿ ಆಸ್ಟ್ರೇಲಿಯಾವನ್ನು ಎದುರುಗೊಳ್ಳಲಿದೆ.