2024ರ ಟಿ20 ವಿಶ್ವಕಪ್‌ಗೆ ಅರ್ಹತೆ ಪಡೆದು ಇತಿಹಾಸ ನಿರ್ಮಿಸಿದ ಉಗಾಂಡಾ; ಜಿಂಬಾಬ್ವೆ, ಕೀನ್ಯಾ ಔಟ್!

ಶ್ವ ಕ್ರಿಕೆಟ್‌ನ ಐತಿಹಾಸಿಕ ತಿರುವಿನಲ್ಲಿ, ವೆಸ್ಟ್ ಇಂಡೀಸ್ ಮತ್ತು ಯುಎಸ್‌ಎನಲ್ಲಿ ನಡೆಯಲಿರುವ 2024ರ ಟಿ20 ವಿಶ್ವಕಪ್‌ ಪಂದ್ಯಾವಳಿಗೆ ಅರ್ಹತೆ ಪಡೆಯುವ ಮೂಲಕ ಉಗಾಂಡಾ ಕ್ರಿಕೆಟ್ ಇತಿಹಾಸದಲ್ಲಿ ತನ್ನ ಹೆಸರನ್ನು ಅಚ್ಚೊತ್ತಿದೆ.

ಇದು ಐಸಿಸಿ ಪಂದ್ಯಾವಳಿಯಲ್ಲಿ ಉಗಾಂಡಾ ತಂಡದ ಚೊಚ್ಚಲ ಪ್ರವೇಶವಾಗಿದೆ ಮತ್ತು ಇದು ಆಫ್ರಿಕನ್ ತಂಡಕ್ಕೆ ಗಮನಾರ್ಹ ಸಾಧನೆಯಾಗಿದೆ.

ಈ ಐತಿಹಾಸಿಕ ಮೈಲಿಗಲ್ಲಿನ ಪ್ರಯಾಣವು ಅನಿರೀಕ್ಷಿತ ಗೆಲುವಿನಿಂದ ತುಂಬಿತ್ತು ಹಾಗೂ ಜಿಂಬಾಬ್ವೆ ವಿರುದ್ಧದ ವಿಜಯಕ್ಕಿಂತ ದೊಡ್ಡದು ಯಾವುದೂ ಇರಲಿಲ್ಲ. ನಮೀಬಿಯಾದ ವಿಂಡ್‌ಹೋಕ್‌ನಲ್ಲಿ ನಡೆದ 2024ರ ಐಸಿಸಿ ಪುರುಷರ ಟಿ20 ವಿಶ್ವಕಪ್ ಪಂದ್ಯಾವಳಿಯ ಆಫ್ರಿಕಾ ವಲಯ ಕ್ವಾಲಿಫೈಯರ್‌ನಲ್ಲಿ ಉಗಾಂಡಾ ಅದ್ವಿತೀಯ ಅಭಿಯಾನಕ್ಕೆ ತೆರೆದುಕೊಂಡಿತು.

ಐಸಿಸಿ ಟಿ20 ಶ್ರೇಯಾಂಕದಲ್ಲಿ 23ನೇ ಸ್ಥಾನದಲ್ಲಿರುವ ಉಗಾಂಡ ತಂಡವು ಅಸಾಧಾರಣ ಎದುರಾಳಿಗಳನ್ನು ಎದುರಿಸಿತು. ಅವರ ವಿಶ್ವಕಪ್ ಪ್ರಯಾಣದ ಪರಾಕಾಷ್ಠೆಯು 2023ರ ನವೆಂಬರ್ 26ರಂದು ಜಿಂಬಾಬ್ವೆ ವಿರುದ್ಧ ಅಮೋಘ ಗೆಲುವಿನಿಂದ ಕೂಡಿತ್ತು.

ಅದ್ಭುತ ಪ್ರದರ್ಶನ ನೀಡುವ ಮೂಲಕ ಉಗಾಂಡಾ ಐದು ವಿಕೆಟ್‌ಗಳ ಗೆಲುವು ದಾಖಲಿಸಿತು ಮತ್ತು ಟಿ20 ಪಂದ್ಯಗಳಲ್ಲಿ ಪೂರ್ಣ ಸದಸ್ಯರ ತಂಡದ ವಿರುದ್ಧ ಅವರ ಮೊದಲ ಗೆಲುವು ಗುರುತಿಸಿತು.

ದಕ್ಷಿಣ ಆಫ್ರಿಕಾ ಹೊರತುಪಡಿಸಿ ಆಫ್ರಿಕಾ ಪ್ರಾದೇಶಿಕದಲ್ಲಿ ಬಲಿಷ್ಠವಾಗಿದ್ದ ಜಿಂಬಾಬ್ವೆ ಹಾಗೂ ಕೀನ್ಯಾ ತಂಡಗಳು 2024ರ ಐಸಿಸಿ ಪುರುಷರ ಟಿ20 ವಿಶ್ವಕಪ್‌ಗೆ ಅರ್ಹತೆ ಪಡೆಯಲು ವಿಫಲವಾಗಿವೆ.

ನಮೀಬಿಯಾದ ಮೈದಾನದಲ್ಲಿ ಉಗಾಂಡಾ ತಂಡದ ತಂತ್ರಗಳು ದೋಷರಹಿತವಾಗಿ ಕಾರ್ಯಗತಗೊಂಡವು. ಟಾಸ್ ಗೆದ್ದ ನಂತರ ಫೀಲ್ಡಿಂಗ್ ಆಯ್ಕೆ ಮಾಡಿಕೊಂಡ ಉಗಾಂಡಾ ತಂಡವು ಜಿಂಬಾಬ್ವೆ ತಂಡವನ್ನು 7 ವಿಕೆಟ್‌ಗೆ 136 ರನ್‌ಗಳ ಸಾಧಾರಣ ಮೊತ್ತಕ್ಕೆ ಕಟ್ಟಿಹಾಕಿತು. ದಿನೇಶ್ ನಕ್ರಾಣಿ 14 ರನ್‌ಗಳಿಗೆ 3 ವಿಕೆಟ್‌ಗಳ ಅಂಕಿಗಳೊಂದಿಗೆ ಸ್ಟಾರ್ ಬೌಲರ್ ಆಗಿ ಹೊರಹೊಮ್ಮಿದರು.

ರಿಯಾಝತ್ ಅಲಿ ಷಾ ಮತ್ತು ಅಲ್ಪೇಶ್ ರಾಮ್ಜಾನಿ ಅವರು ಮುಂದೆ ನಿಂತು ಚೇಸ್ ಮಾಡುವಲ್ಲಿ ನೆರವಾಗುವ ಮೂಲಕ ಐತಿಹಾಸಿಕ ಗೆಲುವಿಗೆ ಕಾರಣರಾದರು. ಇದು ಉಗಾಂಡಾ ತಂಡವನ್ನು ಅಂಕಪಟ್ಟಿಯಲ್ಲಿ ಮೂರನೇ ಸ್ಥಾನಕ್ಕೆ ಏರಿಸಿತು. ಇದಕ್ಕೂ ಮುನ್ನ ಉಗಾಂಡಾ ತಂಡವು ನವೆಂಬರ್ 29ರಂದು ಕೀನ್ಯಾ ತಂಡವನ್ನು 33 ರನ್‌ಗಳ ಅಂತರದಿಂದ ಸೋಲಿಸಿತು.

ಉಗಾಂಡಾದ ಅಂತಿಮ ಪಂದ್ಯವು ರುವಾಂಡಾ ವಿರುದ್ಧ ಆಗಿತ್ತು ಮತ್ತು ಇಲ್ಲಿ ಅದ್ಭುತ ಪ್ರದರ್ಶನದ ಮೂಲಕ ವಶಪಡಿಸಿಕೊಂಡರು. ರುವಾಂಡಾ ತಂಡವನ್ನು ಕೇವಲ 65 ರನ್‌ಗಳಿಗೆ ಆಲೌಟ್ ಮಾಡಿದ ಉಗಾಂಡಾ, ಚೇಸಿಂಗ್‌ನಲ್ಲಿ ಇನ್ನೂ 9 ವಿಕೆಟ್‌ಗಳು ಬಾಕಿ ಇರುವಂತೆಯೇ ಗುರಿ ಬೆನ್ನಟ್ಟಿತು.

ಈ ವಿಜಯವು 2024ರ ಟಿ20 ವಿಶ್ವಕಪ್‌ನಲ್ಲಿ ಉಗಾಂಡಾದ ಸ್ಥಾನವನ್ನು ಭದ್ರಪಡಿಸಿತು. ನಮೀಬಿಯಾ ನಂತರ, ಆಫ್ರಿಕಾ ಪ್ರಾದೇಶಿಕದಿಂದ ಅರ್ಹತೆ ಪಡೆದ ಎರಡನೇ ತಂಡವಾಗಿದೆ.

ಟಿ20 ವಿಶ್ವಕಪ್ 2024ರ ಲೈನ್ಅಪ್ ಹೀಗಿದೆ
ಈ ಐತಿಹಾಸಿಕ ಅರ್ಹತೆ ಪಡೆಯುವುದರೊಂದಿಗೆ, ವೆಸ್ಟ್ ಇಂಡೀಸ್ (ಆತಿಥೇಯ), ಯುನೈಟೆಡ್ ಸ್ಟೇಟ್ಸ್ ಆಫ್ ಅಮೆರಿಕಾ (ಆತಿಥೇಯ), ಆಸ್ಟ್ರೇಲಿಯಾ, ಇಂಗ್ಲೆಂಡ್ ಸೇರಿದಂತೆ 2024ರ ಟಿ20 ವಿಶ್ವಕಪ್‌ಗಾಗಿ ಉಗಾಂಡಾ ಗೌರವಾನ್ವಿತ ತಂಡಗಳ ತಂಡವನ್ನು ಸೇರಿಕೊಂಡಿತು.

ಭಾರತ, ನೆದರ್ಲ್ಯಾಂಡ್ಸ್, ನ್ಯೂಜಿಲೆಂಡ್, ಪಾಕಿಸ್ತಾನ, ದಕ್ಷಿಣ ಆಫ್ರಿಕಾ, ಶ್ರೀಲಂಕಾ, ಅಫ್ಘಾನಿಸ್ತಾನ, ಬಾಂಗ್ಲಾದೇಶ, ಐರ್ಲೆಂಡ್, ಸ್ಕಾಟ್ಲೆಂಡ್, ಪಪುವಾ ನ್ಯೂಗಿನಿಯಾ, ಕೆನಡಾ, ಓಮನ್, ನೇಪಾಳ ಮತ್ತು ನಮೀಬಿಯಾ ಅರ್ಹತೆ ಪಡೆದ ತಂಡಗಳಾಗಿವೆ.