Vijay Hazare Trophy: ಈ ವಿಚಿತ್ರ ಕಾರಣಕ್ಕಾಗಿ ಬಾಯಿಗೆ ಟೇಪ್ ಹಾಕಿಕೊಂಡು ಬ್ಯಾಟಿಂಗ್ ಮಾಡಿದ ಬಾಬಾ ಇಂದ್ರಜಿತ್!

ಬುಧವಾರ, ಡಿಸೆಂಬರ್ 13ರಂದು ರಾಜ್‌ಕೋಟ್‌ನಲ್ಲಿ ನಡೆದ 2023ರ ವಿಜಯ್ ಹಜಾರೆ ಟ್ರೋಫಿಯ ತಮಿಳುನಾಡು ಮತ್ತು ಹರಿಯಾಣ ನಡುವಿನ ಸೆಮಿಫೈನಲ್ ಪಂದ್ಯದ ಸಂದರ್ಭದಲ್ಲಿ ಬಾಬಾ ಇಂದ್ರಜಿತ್ ಅವರು ಬಾಯಿಗೆ ದೊಡ್ಡ ಟೇಪ್ ಹಾಕಿಕೊಂಡು ಬ್ಯಾಟಿಂಗ್ ಮಾಡಿರುವುದು ಭಾರೀ ಪ್ರಶಂಸೆಗೆ ಪಾತ್ರವಾಗಿದೆ.

ಹರಿಯಾಣ ನೀಡಿದ 294 ರನ್‌ಗಳ ಗುರಿ ಬೆನ್ನತ್ತಿದ ತಮಿಳುನಾಡು 14ನೇ ಓವರ್‌ನಲ್ಲಿ 54 ರನ್‌ಗಳೊಂದಿಗೆ ಮೂರನೇ ವಿಕೆಟ್ ಕಳೆದುಕೊಂಡಿತು. ಈ ವೇಳೆ ಬಾಬಾ ಇಂದ್ರಜಿತ್ ಕ್ರೀಸ್‌ಗೆ ತೆರಳಿದರು.

ಇದಕ್ಕೂ ಮುನ್ನ ತನ್ನ ಕೊನೆಯ ಎರಡು ಇನ್ನಿಂಗ್ಸ್‌ಗಳಲ್ಲಿ ಮಧ್ಯಪ್ರದೇಶದ ವಿರುದ್ಧ 92 ಮತ್ತು ಮುಂಬೈ ವಿರುದ್ಧ ಅಜೇಯ 103 ರನ್ ಗಳಿಸಿದ ಬಾಬಾ ಇಂದ್ರಜಿತ್, ಬಾಯಿಗೆ ಟೇಪ್‌ ಹಾಕಿಕೊಂಡು ಬ್ಯಾಟಿಂಗ್‌ಗೆ ಬಂದರು.

ಹರಿಯಾಣ ವಿರುದ್ಧದ ಪಂದ್ಯದಲ್ಲಿ ಕೇವಲ 10 ಎಸೆತಗಳನ್ನು ಎದುರಿಸಿದ ನಂತರ, 29 ವರ್ಷದ ಬಾಬಾ ಇಂದ್ರಜಿತ್ ಫಿಸಿಯೋ ಅವರನ್ನು ಕರೆದರು. ಬಲಗೈ ಬ್ಯಾಟರ್‌ಗೆ ಚಿಕಿತ್ಸೆ ನೀಡಲು ಫಿಸಿಯೋ ತಕ್ಷಣವೇ ಸ್ಥಳದಲ್ಲಿದ್ದ ವೈದ್ಯರೊಂದಿಗೆ ಮೈದಾನಕ್ಕೆ ತೆರಳಿದರು.

ಈ ವೇಳೆ ಬಾಯಿಗೆ ಹಾಕಲಾಗಿದ್ದ ವೈಟ್ ಡ್ರೆಸ್ಸಿಂಗ್ ಅನ್ನು ತೆಗೆದುಹಾಕಲಾಯಿತು ಮತ್ತು ಅದನ್ನು ಟ್ಯಾಪಿಂಗ್ ಮಾಡುವ ಮೊದಲು ಬಾಬಾ ಇಂದ್ರಜಿತ್‌ನ ಮೇಲಿನ ತುಟಿಯ ಮೇಲೆ ಪ್ಯಾಡಿಂಗ್ ಸೇರಿಸಲಾಯಿತು. ಈ ವೇಳೆ ಅನುಭವಿ ಬ್ಯಾಟರ್ ಯಾವುದೇ ಅಸ್ವಸ್ಥತೆ ಲಕ್ಷಣಗಳನ್ನು ತೋರಿಸದೆ ತನ್ನ ಇನ್ನಿಂಗ್ಸ್ ಆಡಿದರು.

ಮತ್ತೊಂದೆಡೆ, ಬಾಬಾ ಇಂದ್ರಜಿತ್ ಅವರ ಸುತ್ತ ವಿಕೆಟ್‌ಗಳು ಬಿದ್ದವು. ಆದರೆ ಬಾಬಾ ಇಂದ್ರಜಿತ್ ಸ್ಕೋರ್‌ಬೋರ್ಡ್ ಅನ್ನು ಹೆಚ್ಚಿಸುತ್ತಲೇ ಇದ್ದರು. 71 ಎಸೆತಗಳಲ್ಲಿ 64 ರನ್ ಗಳಿಸಿದ ಬಳಿಕ, ಅನ್ಶುಲ್ ಕಾಂಬೋಜ್ ಬೌಲಿಂಗ್‌ನಲ್ಲಿ ಕೋಲ್ಕತ್ತಾ ನೈಟ್ ರೈಡರ್ಸ್ ತಂಡದ ಮಾಜಿ ಆಟಗಾರ ಅಂಕಿತ್ ಕುಮಾರ್ ಪಡೆದ ಉತ್ತಮ ಕ್ಯಾಚ್‌ಗೆ ಔಟ್ ಆದರು.

ಇದೇ ವೇಳೆ ಬಾಬಾ ಇಂದ್ರಜಿತ್ ವಿಕೆಟ್ ಪಡೆಯುವ ಮೂಲಕ ತಮಿಳುನಾಡಿನ ಫೈನಲ್‌ ತಲುಪುವ ಆಸೆ ಕೊನೆಗೊಂಡಿತು. ಅಂತಿಮವಾಗಿ ತಮಿಳುನಾಡು ತಂಡ 63 ರನ್‌ಗಳಿಂದ ಸೋತ ಬಳಿಕ, ಹರಿಯಾಣ ತಂಡ ಪ್ರಶಸ್ತಿ-ಹಂತಕ್ಕೆ ಮುನ್ನಡೆಯಿತು.

ಪಂದ್ಯದ ಬಳಿಕ, ತಮಿಳುನಾಡು ನಾಯಕ ದಿನೇಶ್ ಕಾರ್ತಿಕ್ ಮಾತನಾಡಿ, ಇಂದ್ರಜಿತ್ ಅವರು ಮಿಡ್ ಇನ್ನಿಂಗ್ಸ್ ವಿರಾಮದ ಸಮಯದಲ್ಲಿ ತಮ್ಮನ್ನು ತಾವು ನೋಯಿಸಿಕೊಂಡಿದ್ದಾರೆ ಮತ್ತು ಮೇಲಿನ ತುಟಿಯ ಮೇಲೆ ಕಚ್ಚಿಕೊಂಡಿದ್ದರು ಎಂದು ಬಹಿರಂಗಪಡಿಸಿದರು.

ಬಾಬಾ ಇಂದ್ರಜಿತ್ ಅವರನ್ನು ಆಸ್ಪತ್ರೆಗೆ ಸಾಗಿಸಲಾಯಿತು, ಅಲ್ಲಿ ಅವರು ಹೊಲಿಗೆಗಳನ್ನು ಹಾಕಿಸಿಕೊಂಡರು. ನಂತರ, ತಮಿಳುನಾಡು ಬ್ಯಾಟರ್ ತನ್ನ ಅಧಿಕೃತ ಇನ್‌ಸ್ಟಾಗ್ರಾಮ್ ಖಾತೆಯಲ್ಲಿ, ಐಸ್ ಬಾತ್ ಮುಗಿಸಿ ಹೊರಗೆ ಬರುತ್ತಿದ್ದಂತೆ, ಜಾರಿ ಬಿದ್ದಿದ್ದೇನೆ ಎಂದು ಹೇಳಿದರು. ಅವರು ತಮ್ಮ ಹಿತೈಷಿಗಳಿಗೆ ಧನ್ಯವಾದ ಅರ್ಪಿಸಿದರು ಮತ್ತು ಶೀಘ್ರದಲ್ಲೇ ಆಟಕ್ಕೆ ಮರಳುವುದಾಗಿ ಭರವಸೆ ನೀಡಿದರು.

"ನಿಮ್ಮ ಕಾಳಜಿ ಮತ್ತು ಹಾರೈಕೆಗಳಿಗೆ ಎಲ್ಲರಿಗೂ ಧನ್ಯವಾದಗಳು. ಅರ್ಧ ಇನ್ನಿಂಗ್ಸ್‌ನ ಬಳಿಕ ನಾನು ಐಸ್ ಬಾತ್‌ನಿಂದ ಬರುವಾಗ ತುಂಬಾ ಕೆಟ್ಟದಾಗಿ ಜಾರಿ ಬಿದ್ದೆ. ಬಾತ್‌ರೂಮ್‌ನಲ್ಲಿ ನೆಲಕ್ಕೆ ಬಿದ್ದಾಗ ಮೇಲಿನ ತುಟಿ ಮತ್ತು ತುಟಿಯ ಒಳಭಾಗದಲ್ಲಿ ಹೆಚ್ಚಿನ ಗಾಯದಿಂದ ರಕ್ತಸ್ರಾವವಾಗಿತ್ತು," ಎಂದರು.

"ಹೇಗೋ ಬ್ಯಾಟಿಂಗ್ ಮಾಡುವಲ್ಲಿ ನಾನು ಯಶಸ್ವಿಯಾದೆ. ಆದರೆ ತಂಡವನ್ನು ಗೆಲುವಿನ ಗುರಿಯನ್ನು ತಲುಪಿಸಲು ಸಾಧ್ಯವಾಗಲಿಲ್ಲ. ಈಗಷ್ಟೇ ಆಸ್ಪತ್ರೆಗೆ ಹೋಗಿ ನಾನು ಹೊಲಿಗೆಗಳನ್ನು ಹಾಕಿಸಿಕೊಂಡೆ. ಬೇಗ ವಾಪಸ್ ಬರುತ್ತೇನೆ. ಮತ್ತೊಮ್ಮೆ ಧನ್ಯವಾದಗಳು," ಎಂದು ಬಾಬಾ ಇಂದ್ರಜಿತ್ ಇನ್‌ಸ್ಟಾಗ್ರಾಮ್‌ನಲ್ಲಿ ಪೋಸ್ಟ್‌ನಲ್ಲಿ ಬರೆದುಕೊಂಡಿದ್ದಾರೆ.

2023ರ ವಿಜಯ್ ಹಜಾರೆ ಟ್ರೋಫಿಯಲ್ಲಿ ಬಾಬಾ ಇಂದ್ರಜಿತ್ ತಮಿಳುನಾಡು ಪರ ಅತಿ ಹೆಚ್ಚು ರನ್ ಗಳಿಸಿದ ಆಟಗಾರನಾಗಿ ಮುಗಿಸಿದರು. ಏಳು ಇನ್ನಿಂಗ್ಸ್‌ಗಳಿಂದ 66ರ ಸರಾಸರಿಯಲ್ಲಿ 330 ರನ್ ಗಳಿಸಿದರು.