11 ವರ್ಷಗಳ ಬಳಿಕ ಏಕದಿನ ಕ್ರಿಕೆಟ್‌ನಲ್ಲಿ ಕೊಹ್ಲಿಯ ಶತಕದ ಸತತ ಸಾಧನೆ ಅಂತ್ಯ

ಟೀಮ್ ಇಂಡಿಯಾ ನಾಯಕ ವಿರಾಟ್ ಕೊಹ್ಲಿ ಆಸ್ಟ್ರೇಲಿಯಾ ವಿರುದ್ಧದ ಅಂತಿಮ ಏಕದಿನ ಪಂದ್ಯದಲ್ಲಿ ಅರ್ಧ ಶತಕದ ಸಾಧನೆಯನ್ನು ಮಾಡಿದ್ದಾರೆ. ಆದರೆ ವಿರಾಟ್ ಕೊಹ್ಲಿ 2020ರ ಕ್ಯಾಲೆಂಡರ್ ವರ್ಷದಲ್ಲಿ ಒಂದೇ ಒಂದು ಶತಕವನ್ನು ಭಾರಿಸಲು ಸಾಧ್ಯವಾಗಿಲ್ಲ. ಈ ಮೂಲಕ 11 ವರ್ಷಗಳ ಸತತ ಸಾಧನೆಯೊಂದು ಅಂತ್ಯವಾಗಿದೆ.

ಟೀಮ್ ಇಂಡಿಯಾ ನಾಯಕ ವಿರಾಟ್ ಕೊಹ್ಲಿ ಕಳೆದ 11 ವರ್ಷಗಳಲ್ಲಿ ಕ್ಯಾಲೆಮಡರ್ ವರ್ಷದಲ್ಲಿ ಕನಿಷ್ಟ ಒಂದು ಶತಕವನ್ನು ಗಳಿಸಿಕೊಂಡೇ ಬಂದಿದ್ದಾರೆ. ಆದರೆ 2020ರಲ್ಲಿ ಕೊಹ್ಲಿ ಬ್ಯಾಟ್‌ನಿಂದ ಕನಿಷ್ಟ ಒಂದು ಶತಕ ದಾಖಲಾಗಿಲ್ಲ. ಈ ವರ್ಷದ ಬಹುತೇಕ ಭಾಗ ಕೊರೊನಾ ವೈರಸ್‌ಗೆ ಬಲಿಯಾಗಿದೆ ಎಂಬುದು ಇಲ್ಲಿ ಮತ್ತೊಂದು ಪ್ರಮುಖ ಸಂಗತಿಯಾಗಿದೆ.

2009ರಲ್ಲಿ ಶ್ರೀಲಂಕಾ ವಿರುದ್ಧ ಈಡನ್ ಗಾರ್ಡನ್‌ನಲ್ಲಿ ನಡೆದ ಪಂದ್ಯದಲ್ಲಿ ಶತಕವನ್ನು ಬಾರಿಸುವ ಮೂಲಕ ಕೊಹ್ಲಿ ಅಂತಾರಾಷ್ಟ್ರೀಯ ಏಕದಿನ ಕ್ರಿಕೆಟ್‌ನಲ್ಲಿ ಮೊದಲ ಶತಕವನ್ನು ಬಾರಿಸಿದ್ದಾರೆ. ಅಲ್ಲಿಂದ ಈವರೆಗೆ 43 ಶತಕಗಳು ಕೊಹ್ಲಿ ಬ್ಯಾಟ್‌ನಿಂದ ಸಿಡಿದಿದೆ. ಅದಾದ ಬಳಿಕ ಯಾವ ವರ್ಷದಲ್ಲೂ ಕೊಹ್ಲಿ ಶತಕವನ್ನು ಗಳಿಸದೆ ವರ್ಷವನ್ನು ಅಂತ್ಯಗೊಳಿಸಿಲ್ಲ.

ಅದರಲ್ಲೂ ಕಳೆದ ಮೂರು ವರ್ಷಗಳಿಂದ ಕೊಹ್ಲಿ ಅತ್ಯುತ್ತಮ ಫಾರ್ಮ್‌ನಲ್ಲಿದ್ದರು. 2017, 18 ಹಾಗೂ 19ನೇ ಇಸವಿಯಲ್ಲಿ ಕೊಹ್ಲಿ 17 ಏಕದಿನ ಶತಕವನ್ನು ಬಾರಿಸಿದ್ದರು. 2017ರಲ್ಲಿ 6 ಶತಕ, 2018ರಲ್ಲಿ 6ಶತಕ ಹಾಗೂ 2019ರಲ್ಲಿ 5 ಶತಕವನ್ನು ಬಾರಿಸಿದ್ದರು ಕೊಹ್ಲಿ.

ಆಸ್ಟ್ರೇಲಿಯಾ ವಿರುದ್ಧದ ಏಕದಿನ ಸರಣಿಯಲ್ಲಿ ವಿರಾಟ್ ಕೊಹ್ಲಿ ಉತ್ತಮ ಫಾರ್ಮ್‌ನಲ್ಲಿ ಇದ್ದು ಎರಡು ಅರ್ಧ ಶತಕವನ್ನು ದಾಖಲಿಸಿದ್ದಾರೆ. ಆದರೆ ಅದನ್ನು ಶತಕವನ್ನು ಪರಿವರ್ತಿಸುವಲ್ಲಿ ಕೊಹ್ಲಿ ವಿಫಲರಾದರು. ಆಸಿಸ್ ವಿರುದ್ಧದ ಮೂರನೇ ಪಂದ್ಯದಲ್ಲಿ 12000 ಏಕದಿನ ರನ್ ಗಳಿಸಿದ ಸಾಧನೆ ಮಾಡಿದ್ದಾರೆ.