ಡೇ-ನೈಟ್ ಟೆಸ್ಟ್‌ಗೂ ಮುನ್ನ ವಿಶೇಷ ಮನವಿ ಮಾಡಿದ ವಿರಾಟ್ ಕೊಹ್ಲಿ ಪಡೆ

ನವದೆಹಲಿ, ನವೆಂಬರ್ 12: ಕೋಲ್ಕತ್ತಾ ಈಡನ್ ಗಾರ್ಡನ್ ಸ್ಟೇಡಿಯಂನಲ್ಲಿ ಭಾರತ ಮತ್ತು ಬಾಂಗ್ಲಾದೇಶ ತಂಡಗಳು ಚೊಚ್ಚಲ ಬಾರಿಗೆ ಡೇ ನೈಟ್ ಟೆಸ್ಟ್‌ನಲ್ಲಿ ಆಡಲಿವೆ. ಈ ಪಂದ್ಯಕ್ಕೂ ಮುನ್ನ ವಿರಾಟ್ ಕೊಹ್ಲಿ ಪಡೆ ವಿಶೇಷ ಅಭ್ಯಾಸಕ್ಕೆ ಅವಕಾಶ ನೀಡುವಂತೆ ಮಧ್ಯಪ್ರದೇಶ್ ಕ್ರಿಕೆಟ್ ಅಸೋಸಿಯೇಷನ್‌ (ಎಮ್‌ಪಿಸಿಎ) ಅನ್ನು ಕೋರಿಕೊಂಡಿದೆ.

ನವೆಂಬರ್ 22ರಿಂದ 26ರವರೆಗೆ ಕೋಲ್ಕತ್ತಾದಲ್ಲಿ ಡೇ ನೈಟ್ ಟೆಸ್ಟ್ ನಡೆಯುವುದರಲ್ಲಿದೆ. ಅದಕ್ಕೂ ಮುನ್ನ ಇಂದೋರ್‌ನಲ್ಲಿ ಎರಡೂ ತಂಡಗಳು ನವೆಂಬರ್ 14ರಿಂದ ಆರಂಭವಾಗಲಿರುವ ಮೊದಲನೇ ಟೆಸ್ಟ್ ಪಂದ್ಯದಲ್ಲಿ ಪಾಲ್ಗೊಳ್ಳಲಿವೆ. ಮೊದಲನೇ ಟೆಸ್ಟ್‌ ನಡೆಯುವ ಇಂಡೋರ್‌ ಸ್ಟೇಡಿಯಂನಲ್ಲೇ ದ್ವಿತೀಯ ಟೆಸ್ಟ್‌ ಆಗಿ ನಡೆಯಲಿರುವ ಡೇ ನೈಟ್‌ ಟೆಸ್ಟ್‌ಗೆ ವಿಶೇಷ ಅಭ್ಯಾಸ ನಡೆಸಲು ಭಾರತ ವಿನಂತಿಸಿಕೊಂಡಿದೆ.

ಭಾರತ ಕ್ರಿಕೆಟ್‌ ತಂಡ ಮಂಗಳವಾರ (ನವೆಂಬರ್ 12) 5 pmನಿಂದ 6 pm ವರೆಗೆ ಕೃತಕ ಬೆಳಕಿನ ಅಡಿ ಪಿಂಕ್‌ ಬಾಲ್‌ನಲ್ಲಿ ಅಭ್ಯಾಸ ನಡೆಸಲಿದೆ. ನಮ್ಮಲ್ಲಿ ತಂಡ ಹೀಗೆ ವಿನಂತಿಸಿಕೊಂಡಿದೆ. ನಾವಿದಕ್ಕೆ ಬೇಕಾದ ತಯಾರಿ ಮಾಡಿಕೊಳ್ಳಲಿದ್ದೇವೆ,' ಎಂದು ಎಂಪಿಸಿಎ ಹೆಡ್ ಕ್ಯುರೇಟರ್ ಸಮಂದರ್ ಸಿಂಗ್ ಚೌಹಾಣ್ ಮಾಹಿತಿ ನೀಡಿದ್ದಾರೆ.

ಡೇ ನೈಟ್ ಟೆಸ್ಟ್ ವೇಳೆ ಎಸ್‌ಜಿ ಪಿಂಕ್‌ ಬಾಲ್‌ಗಳನ್ನು ಬಳಸಲು ನಿರ್ಧರಿಸಲಾಗಿದೆ. ಇಲ್ಲೀವರೆಗೆ ನಡೆದ ಒಟ್ಟು 11 ಡೇ ನೈಟ್ ಟೆಸ್ಟ್ ಪಂದ್ಯಗಳಲ್ಲಿ ಬರೀ ಕೂಕಾಬುರ ಮತ್ತು ಡ್ಯೂಕ್ಸ್ ಪಿಂಕ್‌ ಬಾಲ್‌ಗಳನ್ನು ಬಳಸಲಾಗಿತ್ತು. ಭಾರತದಲ್ಲಿ 2016-18ರ ದುಲೀಪ್ ಟ್ರೋಫಿ ಸೀಸನ್‌ಗಳಲ್ಲಿ ಪಿಂಕ್‌ ಬಾಲ್‌ಗಳನ್ನು ಬಳಸಿಕೊಳ್ಳಲಾಗಿತ್ತು. ಇವೂ ಕೂಕಾಬುರದಿಂದಲೇ ತಯಾರಾಗಿದ್ದವು.