ಆಸ್ಟ್ರೇಲಿಯಾ ನೆಲದಲ್ಲಿ ಯಾರೂ ಮಾಡದ ವಿಶಿಷ್ಠ ದಾಖಲೆ ಬರೆದ ಕೊಹ್ಲಿ!

ಟೀಕೆಗೆ ಗುರಿಯಾಗಿದ್ದ ಕೊಹ್ಲಿ

ಭಾರತ vs ಆಸ್ಟ್ರೇಲಿಯಾ ಸರಣಿಯ ಆರಂಭ ಭಾರತದ ನಾಯಕ ವಿರಾಟ್ ಕೊಹ್ಲಿಗೆ ಬಹುಶಃ ಖುಷಿ ನೀಡಿರಲಿಕ್ಕಿಲ್ಲ. ಸರಣಿಯ ಮಧ್ಯೆ ಕೊಹ್ಲಿಗೆ ಮೊದಲ ಟೆಸ್ಟ್ ಪಂದ್ಯದ ಬಳಿಕ ಪಿತೃತ್ವ ರಜೆ ಮಂಜೂರಾಗಿದ್ದು ಹಾಗೂ ಏಕದಿನ ಸರಣಿಯ ಸೋಲು ಟೀಕೆಗೆ ಗುರಿಯಾಗಿತ್ತು. ನಿಯಮಿತ ಓವರ್‌ನಲ್ಲಿ ನಾಯಕತ್ವ ಬದಲಾಯಿಸಬೇಕು. ರೋಹಿತ್ ಶರ್ಮಾಗೆ ನಾಯಕತ್ವ ನೀಡಬೇಕು ಎಂಬ ಮಾತುಗಳು ಕೇಳಿ ಬಂದಿದ್ದವು.

ಕೊಹ್ಲಿ ಹೆಸರಿಗೆ ಅಪರೂಪದ ದಾಖಲೆ

ಆರಂಭದಲ್ಲಿ ಕೊಹ್ಲಿ ಟೀಕೆ ಎದುರಿಸಿದ್ದರಾದರೂ ಭಾರತದ ಕ್ರಿಕೆಟ್ ಇತಿಹಾಸದಲ್ಲಿ ಯಾರೂ ಮಾಡದ ಅಪರೂಪದ ದಾಖಲೆಗೆ ಕೊಹ್ಲಿ ಕಾರಣರಾಗಿದ್ದಾರೆ. ಆಸ್ಟ್ರೇಲಿಯಾ ನೆಲದಲ್ಲಿ ಏಕದಿನ, ಟಿ20ಐ ಮತ್ತು ಟೆಸ್ಟ್ ಕ್ರಿಕೆಟ್ ಈ ಮೂರೂ ಮಾದರಿಯ ಕ್ರಿಕೆಟ್‌ನಲ್ಲಿ ಸರಣಿ ಗೆದ್ದ ಭಾರತದ ಏಕಮಾತ್ರ ನಾಯಕನೆಂಬ ಹಿರಿಮೆಗೆ ಕೊಹ್ಲಿ ಕಾರಣರಾಗಿದ್ದಾರೆ. ಭಾನುವಾರ ಟಿ20ಐ ಸರಣಿ ಗೆಲ್ಲುತ್ತಲೇ ಈ ದಾಖಲೆ ನಿರ್ಮಾಣವಾಗಿದೆ.

ದಾಖಲೆ ಆಗಿದ್ದು ಹೇಗೆ?

ಕಳೆದ ವರ್ಷ ಅಂದರೆ 2018-2019ರಲ್ಲಿ ಆಸ್ಟ್ರೇಲಿಯಾಕ್ಕೆ ಪ್ರವಾಸ ಹೋಗಿದ್ದ ವಿರಾಟ್ ನಾಯಕತ್ವದ ಭಾರತ ತಂಡ, 3 ಪಂದ್ಯಗಳ ಟಿ20ಐ ಸರಣಿಯಲ್ಲಿ 1-1ರ ಸಮಬಲ, 4 ಪಂದ್ಯಗಳ ಟೆಸ್ಟ್ ಸರಣಿಯಲ್ಲಿ 2-1ರ ಗೆಲುವು, 3 ಪಂದ್ಯಗಳ ಏಕದಿನ ಸರಣಿಯಲ್ಲಿ 2-1ರ ಜಯ ಗಳಿಸಿತ್ತು. ಅಂದು ಟಿ20 ಸರಣಿಯನ್ನು ಭಾರತ ಗೆದ್ದಿರಲಿಲ್ಲ. ಆದರೆ ಈಗ ಆಸ್ಟ್ರೇಲಿಯಾದಲ್ಲಿ ಟಿ20ಐ ಸರಣಿಯಲ್ಲೂ ಗೆದ್ದಿರುವುದರಿಂದ ಕೊಹ್ಲಿ ನಾಯಕತ್ವದಡಿಯಲ್ಲಿ ದಾಖಲೆ ಸೃಷ್ಠಿಯಾಗಿದೆ. ಟೀಮ್ ಇಂಡಿಯಾ ಪಾಲಿಗೂ ಇದು ಅಪರೂಪದ ಮೈಲಿಗಲ್ಲಾಗಿದೆ.