'ಬ್ಯಾಟಿಂಗ್ ಕ್ರಮಾಂಕದ ಬದಲಾವಣೆ ಎದುರಾಳಿಗೆ ಅಚ್ಚರಿ ನೀಡಬಲ್ಲದು'

ಡಬ್ಲಿನ್, ಜೂ. 28: ಐರ್ಲೆಂಡ್, ಇಂಗ್ಲೆಂಡ್ ನಂತ ತಂಡಗಳೆದುರು ಪಂದ್ಯಗಳಿರುವಾಗ ಬ್ಯಾಟಿಂಗ್ ಕ್ರಮಾಂಕದಲ್ಲಿನ ಬದಲಾವಣೆ ಎದುರಾಳಿಯನ್ನು ಅಚ್ಚರಿಗೀಡು ಮಾಡಬಲ್ಲದು. ಇದರಿಂದ ಭಾರತ ತಂಡಕ್ಕೆ ಕೊಂಚ ಅನುಕೂಲವೂ ಆಗಲಿದೆ ಎಂದು ಟೀಮ್ ಇಂಡಿಯಾದ ನಾಯಕ ವಿರಾಟ್ ಕೊಹ್ಲಿ ಹೇಳಿದ್ದಾರೆ.

ಐರ್ಲೆಂಡ್ ನ ಡಬ್ಲಿನ್ ನಲ್ಲಿ ಬುಧವಾರ ನಡೆದ ಐರ್ಲೆಂಡ್-ಭಾರತ ಟಿ20 ಮೊದಲ ಪಂದ್ಯದಲ್ಲಿ ಭಾರತ 76ರನ್ ಗಳ ಜಯ ಸಾಧಿಸುವ ಮೂಲಕ ಪ್ರವಾಸದಲ್ಲಿ ಆರಂಭಿಕ ಯಶಸ್ಸು ಸಾಧಿಸಿತ್ತು. ಈ ಸಂದರ್ಭ ಟೀಮ್ ಇಂಡಿಯಾದ ಬ್ಯಾಟಿಂಗ್ ಕ್ರಮಾಂಕದಲ್ಲಿ ಬದಲಾವಣೆಗಳನ್ನು ಮಾಡಲಾಗಿತ್ತು. ಈ ಕುರಿತು ಕೊಹ್ಲಿ ಅಭಿಪ್ರಾಯ ಹಂಚಿಕೊಂಡರು.

ಪಂದ್ಯದ ವೇಳೆ ವಿರಾಟ್ ಕೊಹ್ಲಿ 6ನೇ ಕ್ರಮಾಂಕದಲ್ಲಿ ಬ್ಯಾಟಿಂಗ್ ಗೆ ಇಳಿದಿದ್ದರು. ಜೊತೆಗೆ ಎರಡನೇ ಎಸೆತಕ್ಕೆ ವಿಕೆಟ್ ಒಪ್ಪಿಸಿ 0 ರನ್ ನೊಂದಿಗೆ ಪೆವಿಲಿಯನ್ ಗೆ ನಡೆದಿದ್ದರು. ಆದರೆ ಭಾರತಕ್ಕೆ ಅಂಥದ್ದೇನೂ ನಷ್ಟವಾಗಿರಲಿಲ್ಲ. 20 ಓವರ್ ಗಳಲ್ಲಿ 5 ವಿಕೆಟ್ ಕಳೆದು 208ರನ್ ಪೇರಿಸಿದ ಭಾರತ ಪಂದ್ಯ ಗೆದ್ದು ಸರಣಿಯಲ್ಲಿ 1-0ಯ ಮುನ್ನಡೆ ಸಾಧಿಸಿತ್ತು.

ಕೊಹ್ಲಿಗಿಂತ ಮುಂಚೆ ಅಂದರೆ 4,5ನೇ ಕ್ರಮಾಂಕದಲ್ಲಿ ಎಂಎಸ್ ಧೋನಿ ಮತ್ತು ಹಾರ್ದಿಕ್ ಪಾಂಡ್ಯ ಬಂದಿದ್ದರು. ಅಂತಿಮ ಮೂರು ಎಸೆತ ಬಾಕಿಯಿರುವಾಗ ಬ್ಯಾಟ್ ಎತ್ತಿಕೊಂಡ ಕೊಹ್ಲಿ ಬೇಗನೆ ಔಟಾದರಾದರೂ ಆರಂಭಿಕರಾಗಿ ಬ್ಯಾಟಿಂಗ್ ಗಿಳಿದಿದ್ದ ರೋಹಿತ್ ಶರ್ಮಾ (97/61) ಮತ್ತು ಶಿಖರ್ ಧವನ್ (74/45) ಉತ್ತಮ ಬ್ಯಾಟಿಂಗ್ ಪ್ರದರ್ಶಿಸಿದ್ದು ತಂಡದ ಕೈ ಹಿಡಿದಿತ್ತು.

ಈ ಬಗ್ಗೆ ಪ್ರತಿಕ್ರಿಯಿಸುತ್ತ ಕೊಹ್ಲಿ, 'ನಾವು ಉತ್ತಮ ಮಾಧ್ಯಮ ಕ್ರಮಾಂಕವನ್ನು ಹೊಂದಿದ್ದೇವೆ. ಐರ್ಲೆಂಡ್ ಮಾತ್ರ ಅಲ್ಲ, ಮುಂದಿನ ಇಂಗ್ಲೆಂಡ್ ಸರಣಿಯಲ್ಲೂ ಇಂಥದ್ದೇ ಬ್ಯಾಟಿಂಗ್ ಕ್ರಮಾಂಕ ಅನುಸರಿಸಲು ಯೋಚಿಸಿದ್ದೇವೆ. ಹಾಗಂತ ಸಂದರ್ಭಕ್ಕೆ ತಕ್ಕಂತೆ ಕ್ರಮಾಂಕದಲ್ಲಿ ಬದಲಾವಣೆ ಮಾಡುವತ್ತಲೂ ನಮ್ಮ ಯೋಚನೆಯಿದೆ' ಎಂದರು.