ಐಪಿಎಲ್ ಪ್ರಾಯೋಜಕತ್ವ: ಬಿಸಿಸಿಐಗೆ 2 ಸಾವಿರ ಕೋಟಿ ರು. ಕೊಟ್ಟ ವಿವೊ

ಮುಂಬೈ, ಜೂನ್ 27: ಚೀನಾದ ಮೊಬೈಲ್ ಕಂಪನಿಯಾದ ವಿವೊ, ಐಪಿಎಲ್ ಶೀರ್ಷಿಕೆ ಪ್ರಾಯೋಜಕತ್ವಕ್ಕಾಗಿ ಮುಂದಿನ ಐದು ವರ್ಷಗಳಿಗೆ ಅನ್ವಯವಾಗುವಂತೆ ಬಿಸಿಸಿಐಗೆ 2,200 ಕೋಟಿ ರು. ನೀಡಿ ಹಕ್ಕುಗಳನ್ನು ಪಡೆದುಕೊಂಡಿದೆ.

ಐದು ವರ್ಷಗಳ ಐಪಿಎಲ್ ಗಳಿಗೆ ಪ್ರತಿ ವರ್ಷದ ಆವೃತ್ತಿಗೆ ತಲಾ 440 ಕೋಟಿ ರು. ಲೆಕ್ಕಾಚಾರದಲ್ಲಿ ಈ ಹಣ ನೀಡಲಾಗಿದೆ.

2016 ಹಾಗೂ 2017ರ ಐಪಿಎಲ್ ಗಳ ಶೀರ್ಷಿಕೆ ಪ್ರಾಯೋಜಕತ್ವವನ್ನು ಇದೇ ವಿವೊ ಕಂಪನಿಯೇ ಪಡೆದುಕೊಂಡಿತ್ತು. ಆ ಎರಡು ಆವೃತ್ತಿಗಳಲ್ಲಿ ತಲಾ 100 ಕೋಟಿ ರು.ಗಳನ್ನು ವಿವೊ ಗಳಿಸಿದೆ ಎಂದು ಹೇಳಲಾಗಿದೆ.

ಇದೀಗ, 2018ರಿಂದ 2022ರವರೆಗೆ ಹಕ್ಕುಗಳನ್ನು ಪಡೆದಿರುವುದು ಕಂಪನಿಯ ವಾರ್ಷಿಕ ಗಳಿಕೆಯನ್ನು ಮತ್ತಷ್ಟು ಹೆಚ್ಚಿಸಬಹುದೆಂದು ನಿರೀಕ್ಷಿಸಲಾಗಿದೆ.

ಕೆಲ ದಿನಗಳ ಹಿಂದಷ್ಟೇ, ಐಪಿಎಲ್ ಶೀರ್ಷಿಕೆ ಪ್ರಾಯೋಜಕತ್ವಕ್ಕಾಗಿ ಬಿಸಿಸಿಐ ಟೆಂಡರ್ ಆಹ್ವಾನಿಸಿತ್ತು. ಈ ಟೆಂಡರ್ ನಲ್ಲಿ ಜಯಿಸಿರುವ ವಿವೊಗೆ ಈ ಹಕ್ಕುಗಳು ಲಭ್ಯವಾಗಿವೆ.