ಐಪಿಎಲ್‌ನಲ್ಲಿ ಯಾವತ್ತಿಗೂ ಈ ತಂಡವೇ ನನಗೆ ನಂಬರ್ 1: ಕ್ರಿಸ್ ಗೇಲ್ ಹೇಳಿಕೆ

ಆರ್‌ಸಿಬಿಯೇ ನನ್ನ ಪಾಲಿಗೆ ನಂಬರ್ 1 ತಂಡ

ಕ್ರಿಸ್ ಗೇಲ್ ಅತ್ಯಂತ ಹೆಚ್ಚಿನ ಕಾಲ ಪ್ರತಿನಿಧಿಸಿರುವ ತಂಡ ಅಂದರೆ ಅದು ರಾಯಲ್ ಚಾಲೆಂಜರ್ಸ್ ಬೆಂಗಳೂರು. 2011ರ ಆವೃತ್ತಿಯಿಂದ ಆರ್‌ಸಿಬಿ ತಂಡದ ಭಾಗಿವಾಗಿದ್ದರು ಗೇಲ್. ಆರ್‌ಸಿಬಿ ತಂಡದಲ್ಲಿ ಅನೇಕ ಅದ್ಭುತ ಇನ್ನಿಂಗ್ಸ್‌ಗಳನ್ನು ಆಡಿರುವ ಈ ಸ್ಪೋಟಕ ಆಟಗಾರ ತನಗೆ ಐಪಿಎಲ್‌ನಲ್ಲಿ ಆರ್‌ಸಿಬಿ ತಂಡವೇ ನಂಬರ್ 1 ತಂಡ ಎಂದಿದ್ದಾರೆ. ಈ ಮೂಲಕ ಬೆಂಗಳುರು ಮೂಲದ ಫ್ರಾಂಚೈಸಿ ತನ್ನ ಹೃದಯಕ್ಕೆ ಯಾವಾಗಲೂ ಹತ್ತಿರ ಎಂದಿದ್ದಾರೆ ವೆಸ್ಟ್ ಇಂಡೀಸ್‌ನ ಈ ದಿಗ್ಗಜ ಆಟಗಾರ.

ಎಕ್ಸ್‌ಪರ್ಟ್ ಪ್ಯಾನಲ್‌ನಲ್ಲಿ ಕ್ರಿಸ್ ಗೇಲ್

ದಿಗ್ಗಜ ಆಟಗಾರ ಕಳೆದ ಎರಡು ಆವೃತ್ತಿಗಳಿಂದ ಸ್ಪರ್ಧಾತ್ಮಕ ಕ್ರಿಕೆಟ್‌ನಿಂದ ದೂರವಿದ್ದು ಈ ಬಾರಿಯ ಮಿನಿ ಹರಾಜಿನಲ್ಲಿ ಜಿಯೋ ಸಿನಿಮಾದ ಎಕ್ಸ್‌ಪರ್ಟ್ಸ್ ಪ್ಯಾನೆಲ್‌ನ ಭಾಗವಾಗಿದ್ದರು. ಈ ಸಂದರ್ಭದಲ್ಲಿ ಆರ್‌ಸಿಬಿ ಜೊತೆಗಿನ ತನ್ನ ಬಾಂಧವ್ಯದ ಬಗ್ಗೆ ಸಾಕಷ್ಟು ಮಾತನಾಡಿದ್ದಾರೆ. ಆರ್‌ಸಿಬಿ ತಂಡದಲ್ಲಿ ವಿರಾಟ್ ಕೊಹ್ಲಿ, ಎಬಿ ಡಿವಿಲಿಯರ್ಸ್, ಕೆಎಲ್ ರಾಹುಲ್ ಮೊದಲಾದ ಆಟಗಾರರೊಂದಿಗೆ ಡ್ರೆಸ್ಸಿಂಗ್‌ರೂಮ್ ಹಂಚಿಕೊಂಡಿರುವುದು ನನಗೆ ಬಹಳ ಇಷ್ಟದ ವಿಚಾರ ಎಂದಿದ್ದಾರೆ ಕ್ರಿಸ್ ಗೇಲ್.

ಆರ್‌ಸಿಬಿ ಯಾವತ್ತಿಗೂ ನನ್ನ ಟೀಮ್

"ಆರ್‌ಸಿಬಿಯಲ್ಲಿ ನಾನು ಅನೇಕ ಅದ್ಭುತ ಕ್ಷಣಗಣನ್ನು ಹೊಂದಿದ್ದೇನೆ. ವಿರಾಟ್ ಕೊಹ್ಲಿ ಎಬಿ ಡಿವಿಲಿಯರ್ಸ್ ಮಾತ್ರವಲ್ಲದೆ ಉಳಿದ ಆಟಗಾರರೊಂದಿಗೆ ಕೂಡ ಸ್ಮರಣೀಯ ಕ್ಷಣಗಳಿವೆ. ಅದರಲ್ಲೂ ಕೊಹ್ಲಿ ಮತ್ತು ಡಬಿಡಿಯಂತಾ ದಿಗ್ಗಜರೊಂದಿಗೆ ಡ್ರೆಸ್ಸಿಂಗ್ ರೂಮ್ ಹಂಚಿಕೊಂಡಿರುವುದು ಶ್ರೇಷ್ಠ ಅನುಭವ. ನಾವು ಎಲ್ಲರೂ ಪ್ರತಿಯೊಬ್ಬರಿಂದಲೂ ಸಾಕಷ್ಟು ಕಲಿತುಕೊಂಡಿದ್ದೇವೆ. ನಾವು ಟ್ರೋಫಿಯನ್ನು ಗೆಲ್ಲಲು ಬಯಸಿದ್ದೇವು. ಆದರೆ ಅದು ಸಾಧ್ಯವಾಗಲಿಲ್ಲ. ಈ ಫ್ರಾಂಚೈಸಿ ಟ್ರೋಫಿ ಗೆಲ್ಲುವುದನ್ನು ನೋಡಲು ನಾನು ಬಯಸುತ್ತೇನೆ. ಆರ್‌ಸಿಬಿ ಯಾವತ್ತಿಗೂ ನನ್ನ ಟೀಮ್. ನಾನು ಈ ಫ್ರಾಂಚೈಸಿಯನ್ನು ಇಷ್ಟಪಡುತ್ತೇನೆ ಹಾಗೂ ಇದರ ಭಾಗವಾಗಿದ್ದಕ್ಕೆ ಸಂತಸಗೊಂಡಿದ್ದೇನೆ" ಎಂದಿದ್ದಾರೆ ಕ್ರಿಸ್ ಗೇಲ್.

2011ರಿಂದ ಆರ್‌ಸಿಬಿ ತಂಡದ ಭಾಗವಾಗಿದ್ದ ಗೇಲ್

2011ರ ಆವೃತ್ತಿಗೆ ಬದಲಿ ಆಟಗಾರನಾಗಿ ಆರ್‌ಸಿಬಿ ತಂಡವನ್ನು ಸೇರಿಕೊಂಡ ಕ್ರಿಸ್ ಗೇಲ್ ಬಳಿಕ ಒಂದಲ್ಲ ಎರಡಲ್ಲ ಬರೊಬ್ಬರಿ 7 ಆವೃತ್ತಿಗಳಲ್ಲಿ ತಂಡದ ಪ್ರಮುಖ ಭಾಗವಾಗಿದ್ದರು. 2017ರ ಆವೃತ್ತಿಯ ವರೆಗೂ ಕ್ರಿಸ್ ಗೇಲ್ ಆರ್‌ಸಿಬಿ ತಂಡದಲ್ಲಿ ಆಡಿದ್ದಾರೆ. ಅದಾದ ಬಳಿಕ ಎರಡು ಆವೃತ್ತಿಗಳಲ್ಲಿ ಪಂಜಾಬ್ ಕಿಂಗ್ಸ್ ತಂಡವನ್ನು ಪ್ರತಿನಿಧಿಸಿದ ಈ ದಿಗ್ಗಜ ಆಟಗಾರ ಐಪಿಎಲ್‌ನಲ್ಲಿ ಅನೇಕ ದಾಖಲೆಗಳನ್ನು ಬರೆದಿದ್ದಾರೆ. 142 ಐಪಿಎಲ್ ಪಂದ್ಯಗಳನ್ನು ಆಡಿರುವ ಗೇಲ್ 4965 ರನ್‌ಗಳನ್ನು ಗಳಿಸಿದ್ದಾರೆ. 148.96 ಸ್ಟ್ರೈಕ್‌ರೇಟ್‌ನಲ್ಲಿ ಬ್ಯಾಟಿಂಗ್ ನಡೆಸಿರುವ ಸ್ಪೋಟಕ ಆಟಗಾರ ಆರು ಭರ್ಜರಿ ಶತಕ ಹಾಗೂ 31 ಅರ್ಧ ಶತಕ ದಾಖಲಿಸಿದ್ದಾರೆ.