IPL 2025: ಐಪಿಎಲ್‌ನಲ್ಲಿ ಇದುವರೆಗೆ ಯಾವ ತಂಡಗಳು ಕಡಿಮೆ ರನ್ ಗಳಿಸಿವೆ?

ಇಂಡಿಯನ್ ಪ್ರೀಮಿಯರ್ ಲೀಗ್ (ಐಪಿಎಲ್) 2025ರ ಸೀಸನ್‌ನಲ್ಲಿ ಹಲವು ಅದ್ಭುತಗಳು ನಡೆಯಲಿವೆ. ಐಪಿಎಲ್ 2025 ಸೀಸನ್ ಆರಂಭಕ್ಕೂ ಮುನ್ನ ಭಾರೀ ಕುತೂಹಲ ಮೂಡಿಸಿದ್ದು, ರೋಚಕ ಹಣಾಹಣೆಗಳಿಗೆ ಸಾಕ್ಷಿಯಾಗಲಿದೆ. ಹೊಡಿಬಡಿ ಆಟಕ್ಕೆ ಹೆಸರುವಾಸಿಯಾದ ಐಪಿಎಲ್, ಹಲವು ದಾಖಲೆಯ ಸ್ಕೋರಿಂಗ್ ಪಂದ್ಯಗಳನ್ನು ಕಂಡಿದೆ. ಅಲ್ಲದೆ, ತಂಡಗಳು ಅಸಾಧಾರಣ ಬ್ಯಾಟಿಂಗ್ ಪರಾಕ್ರಮವನ್ನು ಪ್ರದರ್ಶಿಸಿ ಗಳಿಸಿರುವ ಕಡಿಮೆ ಸ್ಕೋರಿಂಗ್ ಪಂದ್ಯಗಳು ಕೂಡ ಐಪಿಎಲ್ ಇತಿಹಾಸದಲ್ಲಿ ದಾಖಲಾಗಿವೆ.

ಐಪಿಎಲ್‌ನಲ್ಲಿ ಕೆಲವು ಬಾರಿ ಬ್ಯಾಟಿಂಗ್ ಲೈನ್ ಅಪ್‌ಗಳು ಕುಸಿದು ಬಿದ್ದಾಗ ಅತ್ಯಂತ ಕಡಿಮೆ ಮೊತ್ತ ದಾಖಲಾಗಲು ಕಾರಣವಾಗಿದೆ. ಈ ಅನಿರೀಕ್ಷಿತ ಘಟನೆಗಳು ಟಿ20 ಕ್ರಿಕೆಟ್‌ನಲ್ಲಿ ಕೆಲವು ಸಂದರ್ಭಗಳಲ್ಲಿ ಮಾತ್ರ ನಡೆದಿವೆ. ಈ ಕುರಿತು ಸಂಪೂರ್ಣ ಮಾಹಿತಿ ಇಲ್ಲಿದೆ.

ಕಡಿಮೆ ಸ್ಕೋರಿಂಗ್ ಪಂದ್ಯಗಳು

ಐಪಿಎಲ್ ಇತಿಹಾಸದಲ್ಲಿ ಕಡಿಮೆ ಸ್ಕೋರಿಂಗ್ ಕಲೆ ಹಾಕಿರುವ ದಾಖಲೆ ರಾಯಲ್ ಚಾಲೆಂಜರ್ಸ್ ಬೆಂಗಳೂರು (ಆರ್‌ಸಿಬಿ) ಹೆಸರಿನಲ್ಲಿದೆ. ಏಪ್ರಿಲ್ 23, 2017 ರಂದು ಈಡನ್ ಗಾರ್ಡನ್ಸ್‌ನಲ್ಲಿ ಕೋಲ್ಕತ್ತಾ ನೈಟ್ ರೈಡರ್ಸ್ (ಕೆಕೆಆರ್) ವಿರುದ್ಧ ಆರ್‌ಸಿಬಿ ಕೇವಲ 9.4 ಓವರ್‌ಗಳಲ್ಲಿ 49 ರನ್‌ಗಳಿಗೆ ಆಲೌಟ್ ಆಗಿತ್ತು.

ದುರದೃಷ್ಟವಶಾತ್ ರಾಜಸ್ಥಾನ ರಾಯಲ್ಸ್ ಕಡಿಮೆ ಸ್ಕೋರಿಂಗ್ ಮಾಡಿರುವ ತಂಡಗಳ ಪಟ್ಟಿಯಲ್ಲಿ ಎರಡನೇ ಸ್ಥಾನದಲ್ಲಿದೆ. ಏಪ್ರಿಲ್ 18, 2009 ರಂದು, ದಕ್ಷಿಣ ಆಫ್ರಿಕಾದಲ್ಲಿ ನಡೆದ ಎರಡನೇ ಸೀಸನ್‌ನಲ್ಲಿ ಕೇಪ್ ಟೌನ್‌ನಲ್ಲಿ ನಡೆದ ಪಂದ್ಯದಲ್ಲಿ ಆರ್‌ಸಿಬಿ ವಿರುದ್ಧ ಆರ್‌ಆರ್ 58 ರನ್‌ಗಳಿಗೆ ಆಲೌಟ್ ಆಯಿತು.

ಐಪಿಎಲ್ ಇತಿಹಾಸಲ್ಲಿ ಡೆಲ್ಲಿ ಡೇರ್‌ಡೆವಿಲ್ಸ್ (ಈಗ ಡೆಲ್ಲಿ ಕ್ಯಾಪಿಟಲ್ಸ್) ಕೂಡ ಕಡಿಮೆ ಸ್ಕೋರಿಂಗ್ ಗಳಿಸಿ ತಂಡಗಳ ಪೈಕಿ ಮೂರನೇ ಸ್ಥಾನದಲ್ಲಿದೆ. ಮೇ 6, 2017 ರಂದು ದೆಹಲಿಯಲ್ಲಿ ಮುಂಬೈ ಇಂಡಿಯನ್ಸ್ ವಿರುದ್ಧ ಡೆಲ್ಲಿ 66 ರನ್‌ಗಳಿಗೆ ಆಲೌಟ್ ಆಯಿತು. ಇದಕ್ಕೂ ಮುನ್ನ ಒಂದು ವಾರದ ಹಿಂದೆ, ಅಂದರೆ ಏಪ್ರಿಲ್ 30, 2017 ರಂದು ಮೊಹಾಲಿಯಲ್ಲಿ ಕಿಂಗ್ ಇಲೆವೆನ್ ಪಂಜಾಬ್ (ಈಗ ಪಂಜಾಬ್ ಕಿಂಗ್ಸ್) ವಿರುದ್ಧ ಡೆಲ್ಲಿ ಕೇವಲ 67 ರನ್‌ಗಳನ್ನು ಗಳಿಸಿತ್ತು. ಮೇ 16, 2008 ರಂದು ವಾಂಖೆಡೆ ಕ್ರೀಡಾಂಗಣದಲ್ಲಿ ಮುಂಬೈ ವಿರುದ್ಧ 67 ರನ್‌ಗಳಿಗೆ ಆಲೌಟ್ ಆಗುವ ಮೂಲಕ ಕೋಲ್ಕತ್ತಾ ನೈಟ್ ರೈಡರ್ಸ್ ಐಪಿಎಲ್ ಇತಿಹಾಸದಲ್ಲಿ ಮೊದಲ ಕಡಿಮೆ ಮೊತ್ತಗಳಲ್ಲಿ ಒಂದನ್ನು ದಾಖಲಿಸಿತು.

ಆರ್‌ಸಿಬಿ ಹಲವು ಬಾರಿ ಕಡಿಮೆ ಸ್ಕೋರಿಂಗ್ ಗಳಿಸಿದೆ. 2017 ರಲ್ಲಿ ಆರ್‌ಸಿಬಿ 49 ರನ್‌ಗಳಿಗೆ ಆಲೌಟಾಗುವ ಹೊರತಾಗಿ, ಏಪ್ರಿಲ್ 23, 2022 ರಂದು ಸನ್‌ರೈಸರ್ಸ್ ಹೈದರಾಬಾದ್ ವಿರುದ್ಧ ಆರ್‌ಸಿಬಿ ಎರಡನೇ ಬಾರಿಗೆ 68 ರನ್‌ಗಳಿಗೆ ಆಲೌಟ್ ಆಗಿತ್ತು. ಇದಕ್ಕೂ ಮೊದಲು, ಮಾರ್ಚ್ 23, 2019 ರಂದು ಚೆನ್ನೈ ಸೂಪರ್ ಕಿಂಗ್ಸ್ ವಿರುದ್ಧ ಆರ್‌ಸಿಬಿ ಕೇವಲ 70 ರನ್ ಗಳಿಸುವಲ್ಲಿ ಯಶಸ್ವಿಯಾಗಿತ್ತು.

ಇದಲ್ಲದೆ, ಏಪ್ರಿಲ್ 26, 2014 ರಂದು, ಅಬುಧಾಬಿಯಲ್ಲಿ ಆರ್‌ಆರ್‌ ಎದುರು ಆರ್‌ಸಿಬಿ 70 ರನ್‌ಗಳಿಗೆ ಸರ್ವ ಪತನವಾಗಿತ್ತು. ಮೇ 14, 2017 ರಂದು ಪುಣೆಯಲ್ಲಿ ರೈಸಿಂಗ್ ಪುಣೆ ಸೂಪರ್‌ಜೈಂಟ್ (ಆರ್‌ಪಿಎಸ್) ವಿರುದ್ಧ 73 ರನ್‌ಗಳಿಗೆ ಆಲೌಟ್ ಆಗಿದ್ದ ಕಿಂಗ್ಸ್ ಇಲೆವೆನ್ ಪಂಜಾಬ್ ಕೂಡ ಕಡಿಮೆ ಸ್ಕೋರಿಂಗ್ ಗಳಿಸಿರುವ ತಂಡಗಳ ಪಟ್ಟಿಯಲ್ಲಿದೆ.