Asia Cup 2023: ದ್ರಾವಿಡ್ ಅಲ್ಲ, ರಾಹುಲ್ ಅಲ್ಲ; ಏಷ್ಯಾಕಪ್ ಟ್ರೋಫಿ ಎತ್ತಿ ಹಿಡಿದ ಈ ಕನ್ನಡಿಗ ಯಾರು?

ಭಾನುವಾರ, ಸೆಪ್ಟೆಂಬರ್ 17ರಂದು ಕೊಲಂಬೊದಲ್ಲಿ ನಡೆದ 2023ರ ಏಷ್ಯಾ ಕಪ್ ಫೈನಲ್‌ನಲ್ಲಿ ಆತಿಥೇಯ ಶ್ರೀಲಂಕಾ ವಿರುದ್ಧ ಐತಿಹಾಸಿಕ ಪ್ರದರ್ಶನ ನೀಡಿದ ಭಾರತ ತಂಡ 8ನೇ ಬಾರಿಗೆ ಏಷ್ಯಾ ಕಪ್ ಟ್ರೋಫಿ ಎತ್ತಿ ಹಿಡಿಯಿತು.

ಟಾಸ್ ಸೋತ ಕಾರಣ ರೋಹಿತ್ ಶರ್ಮಾ ನಾಯಕತ್ವದ ಭಾರತ ತಂಡವು ಮೊದಲು ಬೌಲಿಂಗ್ ಮಾಡಿ ಶ್ರೀಲಂಕಾ ತಂಡವನ್ನು ಕೇವಲ 50 ರನ್‌ಗಳಿಗೆ ಆಲೌಟ್ ಮಾಡಿತು. ಮಾರಕ ಬೌಲಿಂಗ್ ಮಾಡಿದ ಮೊಹಮ್ಮದ್ ಸಿರಾಜ್ ಕೇವಲ 7 ಓವರ್‌ಗಳಲ್ಲಿ 21 ರನ್ ನೀಡಿ 6 ವಿಕೆಟ್ ಪಡೆದರು.

ಆನಂತರ ಭಾರತ ತಂಡದ ಆರಂಭಿಕರಾದ ಇಶಾನ್ ಕಿಶನ್ ಮತ್ತು ಶುಭ್ಮನ್ ಗಿಲ್ ಕೇವಲ 6.1 ಓವರ್‌ಗಳಲ್ಲಿ ಗುರಿಯನ್ನು ಬೆನ್ನಟ್ಟಿದರು ಮತ್ತು ದಾಖಲೆಯ ಎಂಟನೇ ಬಾರಿಗೆ ಏಷ್ಯಾ ಕಪ್ ಪ್ರಶಸ್ತಿಯನ್ನು ತನ್ನದಾಗಿಸಿಕೊಂಡಿತು.

ಮುಂಬರುವ 2023ರ ಏಕದಿನ ವಿಶ್ವಕಪ್‌ಗೆ ಮುಂಚಿತವಾಗಿ, ಈ ಗೆಲುವು ಭಾರತ ಕ್ರಿಕೆಟ್ ತಂಡಕ್ಕೆ ದೊಡ್ಡ ಆತ್ಮವಿಶ್ವಾಸ ನೀಡಿದೆ. ಏಕೆಂದರೆ, 2013ರಿಂದ ಭಾರತ ಐಸಿಸಿ ಪ್ರಶಸ್ತಿಯನ್ನು ಗೆದ್ದಿಲ್ಲ. ಈ ಬಾರಿ ತವರಿನಲ್ಲಿ ನಡೆಯುವುದರಿಂದ ದೊಡ್ಡ ಅವಕಾಶ ಇದೆ.

ಇನ್ನು ಏಷ್ಯಾ ಕಪ್ ಟ್ರೋಫಿ ಸಂಭ್ರಮಾಚರಣೆಯ ಸಂದರ್ಭದಲ್ಲಿ ಹಲವು ಭಾರತೀಯ ಕ್ರಿಕೆಟ್ ತಂಡದ ಆಟಗಾರರು ಟ್ರೋಫಿ ಎತ್ತಿ ಹಿಡಿದರು. ಟ್ರೋಫಿ ಎತ್ತಿದ ಮೊದಲ ಸದಸ್ಯರಲ್ಲಿ 20 ವರ್ಷದ ತಿಲಕ್ ವರ್ಮಾ.

ಕಿರಿಯ ಅಥವಾ ಚೊಚ್ಚಲ ಆಟಗಾರನಿಗೆ ಇತರರಿಗಿಂತ ಮೊದಲು ಟ್ರೋಫಿಯನ್ನು ಎತ್ತುವ ಅವಕಾಶವನ್ನು ನೀಡುವ ಭಾರತೀಯ ಕ್ರಿಕೆಟ್‌ನ ಸಂಪ್ರದಾಯವು ಏಷ್ಯಾ ಕಪ್‌ನಲ್ಲಿ ಮುಂದುವರೆಯಿತು.

ಏಷ್ಯಾ ಕಪ್ ಟ್ರೋಫಿ ಎತ್ತಿದ ಥ್ರೋ ಡೌನ್ ಸ್ಪೆಷಲಿಸ್ಟ್
ಸ್ವಲ್ಪ ಸಮಯದ ನಂತರ ಏಷ್ಯಾ ಕಪ್ ಟ್ರೋಫಿಯನ್ನು ಎತ್ತಿದ ಇನ್ನೊಬ್ಬ ವ್ಯಕ್ತಿ ಇದ್ದನು. ಆತ ತಂಡದಲ್ಲಿ ಆಟಗಾರರಾಗಿರಲಿಲ್ಲ, ತರಬೇತುದಾರ ಅಥವಾ ಫಿಸಿಯೋ ಕೂಡ ಆಗಿರಲಿಲ್ಲ. ಆತ ಕರ್ನಾಟಕದವನಾಗಿದ್ದು, ಆದರೆ ರಾಹುಲ್ ದ್ರಾವಿಡ್ ಆಗಿರಲಿಲ್ಲ, ಕೆಎಲ್ ರಾಹುಲ್ ಅಲ್ಲ ಮತ್ತು ಪ್ರಸಿದ್ಧ್ ಕೃಷ್ಣನೂ ಆಗಿರಲಿಲ್ಲ.

ಆದರೆ, ಅವರು ಭಾರತ ಕ್ರಿಕೆಟ್ ತಂಡದ ಪ್ರಮುಖ ಸದಸ್ಯರಾಗಿದ್ದಾರೆ. ಅವರ ಹೆಸರು ರಘು ರಾಘವೇಂದ್ರ ಅಂತ. "ಥ್ರೋ ಡೌನ್ ಸ್ಪೆಷಲಿಸ್ಟ್'. ನೆಟ್ಸ್‌ನಲ್ಲಿ ಭಾರತೀಯ ಬ್ಯಾಟರ್‌ಗಳಿಗೆ ಸ್ಲಿಂಗರ್‌ನೊಂದಿಗೆ ಥ್ರೋ-ಡೌನ್‌ಗಳನ್ನು ನೀಡುವುದು ಆತನ ಕೆಲಸವಾಗಿದೆ. ಭಾರತ ತಂಡವು ಇತರ ಇಬ್ಬರು ಥ್ರೋ ಡೌನ್ ತಜ್ಞರನ್ನು ನೇಮಿಸಿಕೊಂಡಿರುವುದರಿಂದ ರಘು ರಾಘವೇಂದ್ರ ಒಬ್ಬರೇ ಇಲ್ಲ.

"ನಮಗೆ ನಿಯಮಿತವಾಗಿ ಅಭ್ಯಾಸವನ್ನು ನೀಡಿದ ಮತ್ತು ಅವರ ಕೊಡುಗೆ ನಂಬಲಾಗದಂತಿರುವ ಈ ಹುಡುಗರಿಗೆ ಬಹಳಷ್ಟು ಕ್ರೆಡಿಟ್ ಸಲ್ಲಬೇಕು. ಅವರು ಹುಡುಗರೇ, ಅವರ ಹೆಸರು ಮತ್ತು ಮುಖಗಳನ್ನು ನೆನಪಿಟ್ಟುಕೊಳ್ಳಬೇಕು. ಏಕೆಂದರೆ, ನಮ್ಮ ಯಶಸ್ಸಿನ ಹಿಂದೆ ಈ ವ್ಯಕ್ತಿಗಳು ಸಾಕಷ್ಟು ಪ್ರಯತ್ನಗಳನ್ನು ಮಾಡಿದ್ದಾರೆ," ಎಂದು ವಿರಾಟ್ ಕೊಹ್ಲಿ ಈ ಹಿಂದೆ ಥ್ರೋ ಡೌನ್ ತಜ್ಞರ ಬಗ್ಗೆ ಹೇಳಿದ್ದರು.

ರಘು ರಾಘವೇಂದ್ರ ಅವರು ರಾಷ್ಟ್ರೀಯ ಕ್ರಿಕೆಟ್ ಅಕಾಡೆಮಿ (ಎನ್‌ಸಿಎ)ಯಿಂದ ಬಿಸಿಸಿಐಗೆ ಸೇರಿದ್ದಾರೆ. ಅವರು ಭಾರತದ ಮೊದಲ ಥ್ರೋ ಡೌನ್ ಸ್ಪೆಷಲಿಸ್ಟ್ ಆಗಿದ್ದರು. ರಘು ಅವರು ದಿಗ್ಗಜ ಸಚಿನ್ ತೆಂಡೂಲ್ಕರ್ ಮತ್ತು ಎಂಎಸ್ ಧೋನಿಗೆ ಥ್ರೋ ಡೌನ್‌ಗಳನ್ನು ನೀಡಿದ್ದಾರೆ.