T20 World Cup: ಶುಭ್‌ಮನ್‌ ಗಿಲ್‌ ಆಡುವ ಹನ್ನೊಂದರ ಬಳಗದಲ್ಲಿ ಸ್ಥಾನ ಸಿಗುವುದು ಡೌಟ್?

ಅಫ್ಘಾನಿಸ್ತಾನ ವಿರುದ್ಧದ ಎರಡನೇ ಟಿ20ಯಲ್ಲಿ ಶುಭಮನ್ ಗಿಲ್ ಆಡುವ ಹನ್ನೊಂದರ ಬಳಗದಲ್ಲಿ ಸ್ಥಾನ ಪಡೆಯುವಲ್ಲಿ ವಿಫಲರಾದರು. ತಂಡದ ಪ್ಲೇಯಿಂಗ್ ಇಲೆವೆನ್‌ನಲ್ಲಿ ಶುಭಮನ್ ಗಿಲ್‌ಗಿಂತ ಯಶಸ್ವಿ ಜೈಸ್ವಾಲ್‌ಗೆ ಆದ್ಯತೆ ಸಿಕ್ಕಿದೆ. ಟಿ20 ಮಾದರಿಯಲ್ಲಿ ಶುಭ್‌ಮನ್ ಗಿಲ್ ಅವರಿಗೆ ಸವಾಲು ಹೆಚ್ಚುತ್ತಿದೆಯೇ ಎಂಬುದು ಈಗಿನ ಪ್ರಶ್ನೆ. ಈಗಿನ ಪ್ರದರ್ಶನ ನೋಡಿದರೆ ಶುಭಮನ್‌ ಗಿಲ್‌ ಟಿ20 ವಿಶ್ವಕಪ್‌ನಲ್ಲಿ ಆಡುವ ಬಗ್ಗೆ ಅನುಮಾನಗಳು ಎದ್ದಿವೆ.

ಯಶಸ್ವಿಗೆ ಅವಕಾಶ ಏಕೆ?

ಶುಭ್‌ಮಾನ್ ಗಿಲ್‌ಗೆ ಹಾದಿ ಸುಲಭವಿಲ್ಲ. ಇದರ ಹಿಂದೆ ಹಲವು ಕಾರಣಗಳಿವೆ. ರೋಹಿತ್ ಶರ್ಮಾ ಮತ್ತು ವಿರಾಟ್ ಕೊಹ್ಲಿ ಸುಮಾರು 14 ತಿಂಗಳ ನಂತರ ಭಾರತ ಟಿ20 ತಂಡಕ್ಕೆ ಮರಳಿದ್ದಾರೆ. ಇದರಿಂದಾಗಿ ಟೀಂ ಇಂಡಿಯಾದ ಪ್ಲೇಯಿಂಗ್ ಇಲೆವೆನ್‌ನಲ್ಲಿ ಸ್ಥಾನ ಪಡೆಯುವುದು ಶುಭಮನ್ ಗಿಲ್‌ಗೆ ದೊಡ್ಡ ಸವಾಲಾಗಿದೆ. ಇದಲ್ಲದೇ ಶುಭಮನ್ ಗಿಲ್ ಹಾದಿಯಲ್ಲಿ ಯಶಸ್ವಿ ಜೈಸ್ವಾಲ್ ದೊಡ್ಡ ಬಂಡೆಯಂತೆ ನಿಂತಿದ್ದಾರೆ. ಅದರಲ್ಲೂ ಯಶಸ್ವಿ ಜೈಸ್ವಾಲ್ ಬ್ಯಾಟಿಂಗ್ ಮಾಡುತ್ತಿರುವ ಶೈಲಿ ನೋಡಿದರೆ ಅವರನ್ನು ಕೈ ಬಿಡುವುದು ಕಷ್ಟ.

ಯಶಸ್ವಿ ಜೈಸ್ವಾಲ್ ಎಡಗೈ ಬ್ಯಾಟ್ಸ್‌ಮನ್ ಆಗಿದ್ದರೆ, ಶುಭಮನ್ ಗಿಲ್ ಬಲಗೈ ಬ್ಯಾಟ್ಸ್‌ಮನ್. ಆದ್ದರಿಂದ ರೋಹಿತ್ ಶರ್ಮಾ ಜೊತೆಗೆ ಆರಂಭಿಕ ಆಟಗಾರರಾಗಿ ಯಶಸ್ವಿ ಜೈಸ್ವಾಲ್ ಗಮನ ಸೆಳೆಯುವ ಸಾಧ್ಯತೆ ಇದೆ. ಅಲ್ಲದೆ, ಭಾರತ ತಂಡದ ಕೋಚ್ ರಾಹುಲ್ ದ್ರಾವಿಡ್ ಯಶಸ್ವಿ ಜೈಸ್ವಾಲ್ ಅವರನ್ನು ಬೆಂಬಲಿಸಿದ್ದಾರೆ. ಅದೇನೆಂದರೆ, ಟೀಂ ಇಂಡಿಯಾ ಕೋಚ್ ಶುಭಮನ್ ಗಿಲ್‌ಗಿಂತ ಯಶಸ್ವಿ ಜೈಸ್ವಾಲ್‌ಗೆ ಪ್ರಾಮುಖ್ಯತೆ ನೀಡುತ್ತಿದ್ದಾರೆ.

ಗಿಲ್‌ ವೃತ್ತಿ ಬದುಕು

ಅಂಕಿಅಂಶಗಳ ಪ್ರಕಾರ ಭಾರತದ ಪರ 14 ಟಿ 20 ಪಂದ್ಯಗಳಲ್ಲಿ, ಶುಬ್ಮನ್ ಗಿಲ್ 25.77 ಸರಾಸರಿ ಮತ್ತು 147.58 ಸ್ಟ್ರೈಕ್ ರೇಟ್‌ನಲ್ಲಿ 335 ರನ್ ಗಳಿಸಿದ್ದಾರೆ. ಇದಲ್ಲದೆ, ಶುಭ್‌ಮನ್ ಗಿಲ್ ಐಪಿಎಲ್‌ನ 91 ಪಂದ್ಯಗಳಲ್ಲಿ 134.07 ಸ್ಟ್ರೈಕ್ ರೇಟ್ ಮತ್ತು 37.7 ಸರಾಸರಿಯಲ್ಲಿ 2790 ರನ್ ಗಳಿಸಿದ್ದಾರೆ. ಶುಭಮನ್ ಗಿಲ್ ಐಪಿಎಲ್ ಪಂದ್ಯಗಳಲ್ಲಿ 3 ಶತಕಗಳನ್ನು ಗಳಿಸಿದ್ದರೆ, ಅವರು 18 ಬಾರಿ ಐವತ್ತು ರನ್ ಗಡಿ ದಾಟಿದ್ದಾರೆ.