ಮಹಿಳಾ ವಿಶ್ವಕಪ್ ಕ್ರಿಕೆಟ್ 2017: ಭಾರತದ ಸೆಮಿಫೈನಲ್ ಆಸೆಗೆ ಹಿನ್ನಡೆ

ಮೊದಲು ಬ್ಯಾಟ್ ಮಾಡುವ ಅವಕಾಶ

ಬುಧವಾರ ನಡೆದ ಪಂದ್ಯದಲ್ಲಿ, ಮೊದಲು ಬ್ಯಾಟ್ ಮಾಡಿದ ಭಾರತ, ನಿಗದಿತ 50 ಓವರ್ ಗಳಲ್ಲಿ 226 ರನ್ ಗಳಿಸಿತು. ಈ ಮೊತ್ತವನ್ನು ಬೆನ್ನಟ್ಟಿದ ಆಸ್ಟ್ರೇಲಿಯಾ 45.1 ಓವರ್ ಗಳಲ್ಲಿ 2 ವಿಕೆಟ್ ಕಳೆದುಕೊಂಡು 227 ರನ್ ಗಳಿಸಿ, ಜಯದ ನಗೆ ಬೀರಿತಲ್ಲದೆ, ಸೆಮಿಫೈನಲ್ ಹಂತಕ್ಕೆ ದಾಂಗುಡಿಯಿಟ್ಟಿತು.

ಮಿಥಾಲಿ ಮಿಂಚು

ಟಾಸ್ ಸೋತರೂ ಮೊದಲು ಬ್ಯಾಟ್ ಮಾಡುವ ಅವಕಾಶ ಪಡೆದಿದ್ದ ಭಾರತದ ಪರವಾಗಿ ಆರಂಭಿಕ ಆಟಗಾರ್ತಿ ಪೂನಮ್ ರವೂತ್ 106 ರನ್ ಗಳಿಸಿದರೆ, ನಾಯಕಿ ಮಿಥಾಲಿ ರಾಜ್ 69 ರನ್ ಗಳಿಸಿ ಇನಿಂಗ್ಸ್ ಗೆ ನೆರವಾಗಿದ್ದರು.

ಭಾರತದ ಸಾಧಾರಣ ಮೊತ್ತ

ಮಧ್ಯಮ ಕ್ರಮಾಂಕದ ವೇದಾ ಕೃಷ್ಣಮೂರ್ತಿ ಡಕ್ ಔಟಾದರೆ, ಸುಷ್ಮಾ ವರ್ಮಾ, ಜುಲಾನ್ ಗೋಸ್ವಾಮಿ, ಶಿಖಾ ಪಾಂಡೆ ಹಾಗೂ ದೀಪ್ತಿ ಶರ್ಮಾ ಅವರು ಕೇವಲ ಒಂದಂಕಿ ರನ್ ಪೇರಿಸಿದ್ದರಿಂದ ಭಾರತ, ಕಡಿಮೆ ಮೊತ್ತ ದಾಖಲಿಸಬೇಕಾಯಿತು. ಈ ಮೊತ್ತವನ್ನು ಸುಲಭವಾಗಿ ಮೆಟ್ಟಿದ ಆಸ್ಟ್ರೇಲಿಯಾ ಪರವಾಗಿ ನಾಯಕಿ ಲ್ಯಾನ್ನಿಂಗ್ (ಅಜೇಯ 76), ಎಲ್ಲೀಸ್ ಪೆರಿ (ಅಜೇಯ 60) ಉತ್ತಮ ಆಟ ಪ್ರದರ್ಶಿಸಿದರು.

ಚರಿತ್ರಾರ್ಹ ಸಾಧನೆ

ಭಾರತದ ಪರವಾಗಿ 69 ರನ್ ಸಿಡಿಸಿದ ನಾಯಕಿ ಮಿಥಾಲಿ ರಾಜ್ ಅವರು, ಮಹಿಳೆಯರ ಕ್ರಿಕೆಟ್ ನ ಏಕದಿನ ಮಾದರಿಯಲ್ಲಿ 6000 ರನ್ ಗಡಿ ದಾಟಿದ ಮೊದಲ ಆಟಗಾರ್ತಿ ಎಂಬ ದಾಖಲೆ ಬರೆದರು.

ಚುಟುಕು ಸ್ಕೋರ್ ಮಾಹಿತಿ

ಭಾರತ ಮಹಿಳಾ ತಂಡ 50 ಓವರ್ ಗಳಲ್ಲಿ 7 ವಿಕೆಟ್ ಗೆ 226 (ಪೂನಮ್ ರವೂತ್ 106, ಮಿಥಾಲಿ ರಾಜ್ 69; ಎಲೀಸ್ ಪೆರಿ 37ಕ್ಕೆ 2, ಮೆಗಾನ್ ಶುಟ್ 52ಕ್ಕೆ 2); ಆಸ್ಟ್ರೇಲಿಯಾ ಮಹಿಳಾ ತಂಡ 45.1 ಓವರ್ ಗಳಲ್ಲಿ 2 ವಿಕೆಟ್ ಗೆ 227 (ಮೆಗ್ ಲ್ಯಾನಿಂಗ್ ಅಜೇಯ 76, ಎಲೀಸ್ ಪೆರಿ 60; ಪೂನವ್ ಯಾದವ್ 46ಕ್ಕೆ 1). ಪಂದ್ಯ ಶ್ರೇಷ್ಠ: ಲ್ಯಾನಿಂಗ್ (ಆಸ್ಟ್ರೇಲಿಯಾ).