ಇಂದು ಮಹಿಳಾ ವಿಶ್ವಕಪ್ ಫೈನಲ್: ಭಾರತಕ್ಕೆ 2005ರ ಕಹಿ ಮರುಕಳಿಸದಿರಲಿ

ಆಸೀಸ್ ವಿರುದ್ಧ ಭಾರತಕ್ಕೆ 98 ರನ್ ಸೋಲು

2005ರ ವಿಶ್ವಕಪ್ ಫೈನಲ್ ಪಂದ್ಯದಲ್ಲಿ ಮೊದಲು ಬ್ಯಾಟ್ ಮಾಡಿದ್ದ ಆಸ್ಟ್ರೇಲಿಯಾ, ನಿಗದಿತ 50 ಓವರ್ ಗಳಲ್ಲಿ 4 ವಿಕೆಟ್ ನಷ್ಟಕ್ಕೆ 215 ರನ್ ಗಳಿಸಿತ್ತು. ಆ ಮೊತ್ತವನ್ನು ಬೆನ್ನಟ್ಟಿದ ಭಾರತ, 46 ಓವರ್ ಗಳಲ್ಲಿ ತನ್ನೆಲ್ಲಾ ವಿಕೆಟ್ ಕಳೆದುಕೊಂಡು 117 ರನ್ ಮಾತ್ರ ಗಳಿಸಿತ್ತು. ಹಾಗೆ ಸೋತು, ರನ್ನರ್ ಅಪ್ ಪ್ರಶಸ್ತಿಗಷ್ಟೇ ತೃಪ್ತಿಪಟ್ಟುಕೊಂಡಿತ್ತು ಭಾರತ.

ಆಂಗ್ಲರ ಬ್ಯಾಟಿಂಗ್ ಬಲ ಮಿಕ್ಕವರಿಗೆ ಉತ್ತಮ

ಸದ್ಯದ ಪರಿಸ್ಥಿತಿಯಲ್ಲಿ, ಇಂಗ್ಲೆಂಡ್ ಮತ್ತು ಭಾರತದ ಪಂದ್ಯವೆಂದರೆ ಅದು ಆಂಗ್ಲರ ಬ್ಯಾಟಿಂಗ್ V/s ಭಾರತದ ಸ್ಪಿನ್ ಬೌಲಿಂಗ್ ಎಂದೇ ಅರ್ಥ. ಈ ಬಾರಿಯ ಮಹಿಳಾ ವಿಶ್ವಕಪ್ ನಲ್ಲಿ ಇಂಗ್ಲೆಂಡ್ ತಂಡದ ಬ್ಯಾಟಿಂಗ್ ರನ್ ರೇಟ್ (5.79) ಮಿಕ್ಕೆಲ್ಲಾ ತಂಡಗಳಿಗಿಂತ ಉತ್ತಮವಾಗಿದೆ. ಆಂಗ್ಲರ ಪಡೆಗೆ ಹೋಲಿಸಿದರೆ, ಭಾರತದ ರನ್ ರೇಟ್ (4.72) ಸುಮಾರಾಗಿದೆ. ಇಂಗ್ಲೆಂಡ್ ಈ ಟೂರ್ನಿಯಲ್ಲಿ ಈವರೆಗಿನ ಪಂದ್ಯಗಳಿಂದ 1103 ರನ್ ಕಲೆಹಾಕಿದ್ದರೆ, ಭಾರತ 904 ರನ್ ಕಲೆಹಾಕಿದೆ.

ಇಂಗ್ಲೆಂಡ್ ಗಿಂತ ಭಾರತದ ಬೌಲಿಂಗ್ ಉತ್ತಮ

ಇನ್ನು, ಭಾರತದ ಬೌಲಿಂಗ್ ಶಕ್ತಿ ಮಜಬೂತಾಗಿದೆ. ಅಸಲಿಗೆ, ಆಸ್ಟ್ರೇಲಿಯಾ ತಂಡ ಲೀಗ್ ಹಾಗೂ ಸೆಮಿಫೈನಲ್ ಗಳಿಂದ ಒಟ್ಟು 67 ವಿಕೆಟ್ ಸಂಪಾದಿಸಿದ್ದರೆ, ಭಾರತ 66 ವಿಕೆಟ್ ಗಳಿಸಿದೆ. ರನ್ ನೀಡಿರುವ ವಿಚಾರದಲ್ಲೂ ಹಾಗೇ. ಪ್ರತಿ ವಿಕೆಟ್ ಗೆ 23.37 ರನ್ ರೇಟ್ ನೀಡಿದೆ ಭಾರತ. ಇದು ಆಸೀಸ್ ನಂತರದ 2ನೇ ಶ್ರೇಷ್ಠ ಪ್ರದರ್ಶನ. ಇನ್ನು, ಬೌಲಿಂಗ್ ಎಕಾನಮಿಯಲ್ಲೂ ಭಾರತ, 4.45ರ ಮಟ್ಟವನ್ನು ಹೊಂದಿದೆ. ಇದು ಇಂಗ್ಲೆಂಡ್ ಗಿಂತ (4.54) ಉತ್ತಮ. ಒಟ್ಟಾರೆಯಾಗಿ ಹೇಳಬೇಕೆಂದರೆ, ಭಾರತದ ಬೌಲಿಂಗ್ ಇಂಗ್ಲೆಂಡ್ ಗಿಂತ ಉತ್ತಮವಾಗಿದೆ.

ವೇಗದ ಬೌಲಿಂಗ್ ನಲ್ಲಿ ಇಂಗ್ಲೆಂಡ್ ಗೆ ಹೆಚ್ಚು ಯಶಸ್ಸು

ಈಗ ಎರಡೂ ತಂಡಗಳ ಸ್ಪಿನ್ V/s ಸ್ಪೀಡ್ ಬೌಲಿಂಗ್ ಗಳನ್ನು ಪರಸ್ಪರ ಹೋಲಿಸಿ ನೋಡೋಣ. ಈ ಟೂರ್ನಿಯಲ್ಲಿ ಈವರೆಗೆ ಭಾರತ, ಸ್ಪಿನ್ ಮೂಲಕ 41 ವಿಕೆಟ್ ಗಳಿಸಿದ್ದರೆ, ಇಂಗ್ಲೆಂಡ್ 28 ವಿಕೆಟ್ ಉರುಳಿಸಿದೆ. ಇಲ್ಲಿ ಭಾರತದ್ದು, ಇಂಗ್ಲೆಂಡ್ ಗಿಂತ ಹೆಚ್ಚೂ ಕಡಿಮೆ ಡಬಲ್ ಸಾಧನೆ. ಇನ್ನು, ವೇಗದ ಬೌಲಿಂಗ್ ನಲ್ಲಿ ಭಾರತ 17 ವಿಕೆಟ್ ಗಳಿಸಿದರೆ, ಇಂಗ್ಲೆಂಡ್ 23 ವಿಕೆಟ್ ಗಳಿಸಿದೆ. ಇಲ್ಲಿ ಭಾರತದ ಸಾಧನೆಯೇನೂ ಕಳಪೆಯಾಗಿಲ್ಲ. ಇಂಗ್ಲೆಂಡ್ ಗಳಿಸಿರುವ ವಿಕೆಟ್ ಗಳಿಗಿಂತ ಕೇವಲ 6 ವಿಕೆಟ್ ಕಡಿಮೆಯಷ್ಟೆ.

ಭಾರತಕ್ಕೆ ಇತಿಹಾಸ ನಿರ್ಮಿಸುವ ಅವಕಾಶ

ಇನ್ನು, ಎರಡೂ ತಂಡಗಳ ಈ ಹಿಂದಿನ ವಿಶ್ವಕಪ್ ಫೈನಲ್ ಪಂದ್ಯದಲ್ಲಿನ ಸಾಧನೆಯನ್ನು ಗಮನಿಸಿದರೆ, ಸಿಗುವ ಮಾಹಿತಿ ಹೀಗಿದೆ. ಇಂಗ್ಲೆಂಡ್ ತಂಡ, ಈವರೆಗೆ ನಾಲ್ಕು ಬಾರಿ ಫೈನಲ್ ಗೆ ಬಂದಿದೆ. ಮೊದಲೆರಡು ಬಾರಿ (1982 ಹಾಗೂ 1986) ಅದು ಆಸ್ಟ್ರೇಲಿಯಾ ವಿರುದ್ಧ ಸೋಲು ಕಂಡಿತ್ತು. ಆದರೆ, 1993 ಹಾಗೂ 2009ರಲ್ಲಿ ನ್ಯೂಜಿಲೆಂಡ್ ವಿರುದ್ಧ ಗೆದ್ದು ಕಪ್ ಎತ್ತಿ ಹಿಡಿದಿದೆ. ಇನ್ನು, ಭಾರತದ ವಿಚಾರಕ್ಕೆ ಬಂದರೆ, ಇದು ಎರಡನೇ ಫೈನಲ್. ಮೊದಲ ಫೈನಲ್ ನಲ್ಲಿ ಸೋಲು, ಈಗ ಎರಡನೇ ಫೈನಲ್ ನಲ್ಲಿ ಏನಾಗುತ್ತದೆಯೋ ಕಾದು ನೋಡಬೇಕಿದೆ.