ಟಿ20 : 6 ಎಸೆತಗಳಲ್ಲಿ 6 ಸಿಕ್ಸರ್ ಸಿಡಿಸಿದ ವೈಟ್ಲಿ

ಲಂಡನ್, ಜುಲೈ 24: ವಿಶ್ವ ಟಿ20ಯಲ್ಲಿ ಇಂಗ್ಲೆಂಡ್ ವಿರುದ್ಧದ ಪಂದ್ಯದಲ್ಲಿ ಯುವರಾಜ್ ಸಿಂಗ್ ಅವರು ಆರು ಎಸೆತಗಳಲ್ಲಿ 6 ಸಿಕ್ಸರ್ ಸಿಡಿಸಿದ್ದು ನೆನಪಿರಬಹುದು. ಈಗ ನ್ಯಾಟ್ ವೆಸ್ಟ್ ಟಿ20 ಬ್ಲಾಸ್ಟ್ ನಲ್ಲಿ ಇಂಗ್ಲೆಂಡ್ ಬ್ಯಾಟ್ಸ್ ಮನ್ ಒಬ್ಬರು ಒಂದೇ ಓವರ್ ನಲ್ಲಿ 6 ಸಿಕ್ಸರ್ ಬಾರಿಸಿ ಸುದ್ದಿಯಾಗಿದ್ದಾರೆ.

ವೆರ್ಸೆಸ್ಟ್ ರ್ಶೈರ್ ಬ್ಯಾಟ್ಸ್ ಮನ್ ರಾಸ್ ವೈಟ್ಲಿ ಅವರು ಈ ಸಾಧನೆ ಮಾಡಿದ್ದಾರೆ. ರಾಸ್ ಅವರ ಆರ್ಭಟದ ನಡುವೆಯೂ ವೆರ್ಸೆಸ್ಟ್ ರ್ಶೈರ್ ತಂಡವು ಯಾರ್ಕ್ ಶೈರ್ ವಿರುದ್ಧ ಸೋಲು ಕಂಡಿದೆ.

ಮೊದಲು ಬ್ಯಾಟಿಂಗ್ ಮಾಡಿದ್ದ ಯಾರ್ಕ್ ಶೈರ್ 6 ವಿಕೆಟ್ ನಷ್ಟಕ್ಕೆ 233 ರನ್ ಗಳಿಸಿತ್ತು. ವೈಟ್ಲಿ 26 ಎಸೆತಗಳಲ್ಲಿ 56 ರನ್ ಸಿಡಿಸಿದರೂ ವೆರ್ಸೆಸ್ಟ್ ರ್ಶೈರ್ 7 ವಿಕೆಟ್ ನಷ್ಟಕ್ಕೆ 196 ರನ್ ಮಾತ್ರ ಗಳಿಸಿ ಸೋಲೊಪ್ಪಿಕೊಂಡಿತು. ಎಡಗೈ ಸ್ಪಿನ್ನರ್ ಕಾರ್ಲ್ ಕಾವರ್ ಅವರ ಎಲ್ಲ ಎಸೆತವನ್ನು ವೈಟ್ಲಿ ಅವರು ಸಿಕ್ಸ್ ಬಾರಿಸಿದ್ದು ಮಾತ್ರ ದಾಖಲೆಯಾಗಿ ಉಳಿಯಿತು.

1968ರಲ್ಲಿ ನಾಟಿಂಗ್ ಹ್ಯಾಮ್ ಶೈರ್ ಪರ ವೆಸ್ಟ್ ಇಂಡೀಸ್‍ ನ ಗ್ಯಾರಿ ಸೋಬರ್ಸ್ ಅವರು 6 ಎಸೆತಗಳಲ್ಲಿ 6 ಸಿಕ್ಸರ್ ಬಾರಿಸಿ ಮುನ್ನುಡಿ ಬರೆದರು. 1985ರಲ್ಲಿ ರಣಜಿ ಪಂದ್ಯದಲ್ಲಿ ತಿಲಕ್ಕ್ ರಾಜ್ ಎಸೆತಗಳನ್ನು ಪೆವಿಲಿಯನ್ ಆಚೆಗಟ್ಟಿ ರವಿಶಾಸ್ತ್ರಿ ಸಾಧನೆ ಮಾಡಿದರು. ಟಿ-20 ಕ್ರಿಕೆಟ್ ನಲ್ಲಿ ಯುವರಾಜ್ ಸಿಂಗ್ 6 ಸಿಕ್ಸ್ ಸಿಡಿಸಿದ್ದರು.