ನಾನಾಗಿದ್ರೆ ಪಂತ್‌ನನ್ನು ನಂ.4ರಲ್ಲಿ ಆಡಿಸುತ್ತಿದ್ದೆ: ಭಾರತದ ಮಾಜಿ ನಾಯಕ

ಪಂತ್‌ನನ್ನು 4ರಲ್ಲಿ ಆಡಿಸುತ್ತಿದ್ದೆ

ಭಾರತದ ಮಾಜಿ ಆರಂಭಿಕ ಬ್ಯಾಟ್ಸ್ಮನ್ ಆಗಿರುವ ಕೃಷ್ಣಮಾಚಾರಿ ಶ್ರೀಕಾಂತ್, ಐಸಿಸಿ ಅಂಕಣವೊಂದರಲ್ಲಿ, 'ನಾನೊಂದುವೇಳೆ ಭಾರತ ಕ್ರಿಕೆಟ್ ನಿರ್ವಹಣಾ ತಂಡದಲ್ಲಿರುತ್ತಿದ್ದರೆ, ರಿಷಬ್ ಪಂತ್ ಅವರನ್ನು ನಂ.4ನೇ ಬ್ಯಾಟಿಂಗ್ ಕ್ರಮಾಂಕದಲ್ಲಿ ಆಡಿಸುತ್ತಿದ್ದೆ. ನನ್ನ ಮಟ್ಟಿಗೆ ಪಂತ್ ಆ ಬ್ಯಾಟಿಂಗ್ ಕ್ರಮಾಂಕಕ್ಕೆ ಬೆಸ್ಟ್' ಎಂದು ಬರೆದುಕೊಂಡಿದ್ದಾರೆ.

ಇಂಗ್ಲೆಂಡ್ ಪರಿಸ್ಥಿತಿಗೆ ಸೂಕ್ತ

'ಪಂತ್ ಈಗ ಭಾರತ ತಂಡದಲ್ಲಿದ್ದಾರೆ. ಅವರು ಆಡಲು ತಯಾರಿದ್ದಾರೆ ಕೂಡ. ಇನ್ನೂ ಪ್ರಮುಖ ವಿಚಾರವೆಂದರೆ ಇಂಗ್ಲೆಂಡ್ ನಲ್ಲಿ ಈ ಮೊದಲು ಆಡಿದ ಅನುಭವವಿರುವುದರಿಂದ ಪಂತ್ ಅಲ್ಲಿನ ಪರಿಸ್ಥಿತಿಗಳನ್ನು ಚೆನ್ನಾಗಿ ಅರ್ಥ ಮಾಡಿಕೊಳ್ಳಬಲ್ಲರು' ಎಂದು ಭಾರತದ ಕ್ರಿಕೆಟ್ ಆಯ್ಕೆ ಸಮಿತಿಯ ಅಧ್ಯಕ್ಷರೂ ಆಗಿದ್ದ ಶ್ರೀಕಾಂತ್ ಹೇಳಿದ್ದಾರೆ.

ಪಂತ್ ಆಡಲು ಸರಿಯಾದ ಸಮಯ

ಕಳೆದ ಬೇಸಿಗೆಯಲ್ಲಿ ಇಂಗ್ಲೆಂಡ್ ವಿರುದ್ಧದ ಟೆಸ್ಟ್ ಸರಣಿಯಲ್ಲಿ ಪಂತ್ ಉತ್ತಮ ಬ್ಯಾಟಿಂಗ್ ಪ್ರದರ್ಶಿಸಿದ್ದನ್ನು ನಾವು ನೋಡಿದ್ದೇವೆ. ಆ ತಂಡವನ್ನು ಅರ್ಥೈಸಿಕೊಂಡಿರುವುದರಿಂದ ಪಂತ್‌ ಇಂಗ್ಲೆಂಡ್ ವಿರುದ್ಧ ಆಡಲು ಇದೇ ಸೂಕ್ತ ಸಮಯ ಎಂದು ಶ್ರೀಕಾಂತ್ ಅಭಿಪ್ರಾಯಪಟ್ಟಿದ್ದಾರೆ. ಶ್ರೀಕಾಂತ್, 1983ರ ವಿಶ್ವಕಪ್ ವಿಜೇತ ಭಾರತ ತಂಡದಲ್ಲಿದ್ದವರು.

ಅಜೇಯ ತಂಡ ಭಾರತ

ಐಸಿಸಿ ವಿಶ್ವಕಪ್ 2019ರಲ್ಲಿ ಆಡಿರುವ 6 ಪಂದ್ಯಗಳಲ್ಲಿ 5ರಲ್ಲಿ ಜಯ ಸಾಧಿಸಿ, ಒಂದು ಪಂದ್ಯವನ್ನು ರದ್ದಾಗಿಸಿಕೊಂಡಿರುವ ಭಾರತ, ಟೂರ್ನಿಯಲ್ಲಿ ಸೋಲೇ ಕಾಣದ ಏಕಮಾತ್ರ ತಂಡವಾಗಿ ಮಿಂಚಿದೆ. ಜೂನ್ 30ರ ಭಾನುವಾರ ಕೊಹ್ಲಿ ಬಳಗಕ್ಕೆ ಆತಿಥೇಯ ಇಂಗ್ಲೆಂಡ್ ವಿರುದ್ಧ ಪಂದ್ಯವಿದೆ.