WPL 2025: ಡೆಲ್ಲಿ ಕ್ಯಾಪಿಟಲ್ಸ್‌ ತಂಡಕ್ಕೆ ಜಪಾನ್ ಬೌಲರ್‌ ಸೇರ್ಪಡೆ

ಮಹಿಳಾ ಪ್ರೀಮಿಯರ್ ಲೀಗ್ (ಡಬ್ಲ್ಯೂಪಿಎಲ್) ಗೆ ಹೊಸ ಅಧ್ಯಾಯ ಸೇರ್ಪಡೆಯಾಗಲಿದೆ. ಜಪಾನ್ ರಾಷ್ಟ್ರೀಯ ತಂಡದ ಆಟಗಾರ್ತಿ ಅಹಿಲ್ಯಾ ಚಂದೇಲ್ ಡೆಲ್ಲಿ ಕ್ಯಾಪಿಟಲ್ಸ್ ತಂಡಕ್ಕೆ ನೆಟ್ ಬೌಲರ್ ಆಗಿ ಸೇರ್ಪಡೆಗೊಂಡಿದ್ದಾರೆ. ಆಸ್ಟ್ರೇಲಿಯಾ ಮತ್ತು ಜಪಾನ್‌ನಾದ್ಯಂತ ತನ್ನ ಕ್ರಿಕೆಟ್ ಪ್ರಯಾಣವನ್ನು ವಿಸ್ತರಿಸಿಕೊಂಡಿರುವ ಅಹಿಲ್ಯಾ ಚಂದೇಲ್ ಅವರು ವಿಶ್ವದ ಕೆಲವು ಅತ್ಯುತ್ತಮ ಆಟಗಾರರೊಂದಿಗೆ ತರಬೇತಿ ಪಡೆಯಲು ಈ ಅವಕಾಶವನ್ನು ಸದುಪಯೋಗಪಡಿಸಿಕೊಳ್ಳಲು ಮುಂದಾಗಿದ್ದಾರೆ. ಡೆಲ್ಲಿ ಕ್ಯಾಪಿಟಲ್ಸ್ ಕೂಡ ಅವರ ವೀಡಿಯೊವನ್ನು ತನ್ನ ಅಧಿಕೃತ ಟ್ವೀಟರ್ ಖಾತೆಯಲ್ಲಿ ಹಂಚಿಕೊಂಡಿದೆ.

ಅಹಿಲ್ಯಾ ಚಂದೇಲ್ ಅವರ ತಂದೆ ಜಪಾನ್‌ನಲ್ಲಿ ವಾಸಿಸುತ್ತಿದ್ದಾರೆ. ಅವರಿಗೆ ಕ್ರಿಕೆಟ್ ಎಂದರೆ ತುಂಬಾ ಇಷ್ಟ. ಅವರು ತಮ್ಮ ಮಗಳನ್ನು ಕ್ರಿಕೆಟ್‌ಗೆ ಪರಿಚಯಿಸುವಲ್ಲಿ ಪ್ರಮುಖ ಪಾತ್ರ ವಹಿಸಿದ್ದಾರೆ. ತನ್ನ ಪ್ರಯಾಣದ ಬಗ್ಗೆ ಡೆಲ್ಲಿ ಕ್ಯಾಪಿಟಲ್ಸ್ ಹಂಚಿಕೊಂಡಿರುವ ವಿಡಿಯೋದಲ್ಲಿ ಅಹಿಲ್ಯಾ ಚಂದೇಲ್ ಮಾತನಾಡಿದ್ದಾರೆ.

ನಾನು ಜಪಾನ್ ಪರ ಆಡಿದ್ದೇನೆ. ಆಸ್ಟ್ರೇಲಿಯಾದ ಸಿಡ್ನಿಯಲ್ಲಿಯೂ ಕ್ರಿಕೆಟ್ ಆಡಿದ್ದೇನೆ. ನಾನು ಎಂಟನೇ ವಯಸ್ಸಿನಿಂದಲೂ ಆಡುತ್ತಿದ್ದೇನೆ. ನನ್ನ ತಂದೆ ಭಾರತೀಯರಾಗಿದ್ದರಿಂದ ನಾನು ಕ್ರಿಕೆಟ್‌ಗೆ ಬರಲು ಅವರೇ ಕಾರಣ. ಅವರು ಕ್ರಿಕೆಟ್‌ ಅನ್ನು ಪರಿಚಯಿಸಿದರು. ಜಪಾನ್‌ನಲ್ಲಿ ಕ್ರಿಕೆಟ್ ತಂಡವಿದೆ ಎಂದು ತಿಳಿದಾಗ, ಅವರು ಅದನ್ನು ಏಕೆ ಪ್ರಯತ್ನಿಸಬಾರದು ಎಂದು ಹೇಳಿದರು. 2022 ರಿಂದ, ನಾನು ಜಪಾನ್ ಅನ್ನು ಪ್ರತಿನಿಧಿಸಿದ್ದು, ಪ್ರಸ್ತುತ ನಾನು ಅಲ್ಲಿದ್ದೇನೆ ಎಂದು ಅಹಿಲ್ಯಾ ಚಂದೇಲ್ ಹೇಳಿದ್ದಾರೆ.

ನಾನು ನಿಜವಾಗಿಯೂ ಜೇಮೀ (ಜೆಮಿಮಾ ರೊಡ್ರಿಗಸ್) ಜೊತೆ ಮಾತನಾಡಿದ್ದೇನೆ. ನಾನು ನೆಟ್ ಬೌಲರ್ ಆಗಿ ಇಲ್ಲಿರುವುದರಿಂದ ನನ್ನ ಬೌಲಿಂಗ್ ಬಗ್ಗೆ ಅವರೊಂದಿಗೆ ಮಾತನಾಡಿದೆ. ಅವರು ನನಗೆ ತುಂಬಾ ಪ್ರೋತ್ಸಾಹ ನೀಡಿದರು. ಉನ್ನತ ಮಟ್ಟದ ಕ್ರಿಕೆಟಿಗರೊಂದಿಗೆ ಆಡಲು ಇದು ಒಂದು ದೊಡ್ಡ ಅವಕಾಶ. ನನ್ನ ಕೌಶಲ್ಯಗಳನ್ನು ಅಭಿವೃದ್ಧಿಪಡಿಸಿಕೊಳ್ಳಲು ಇದು ನನಗೆ ಉತ್ತಮ ಅವಕಾಶ ಎಂದು ಡೆಲ್ಲಿ ಕ್ಯಾಪಿಟಲ್ಸ್ ತಂಡಕ್ಕೆ ನೆಟ್ ಬೌಲರ್ ಆಗಿ ಸೇರ್ಪಡೆಗೊಂಡಿರುವ ಬಗ್ಗೆ ಅಹಿಲ್ಯಾ ಚಂದೇಲ್ ತಮ್ಮ ಅಭಿಪ್ರಾಯ ವ್ಯಕ್ತಪಡಿಸಿದ್ದಾರೆ.

ಫೆಬ್ರವರಿ 14 ರಿಂದ ಪ್ರಾರಂಭವಾಗುವ 2025ರ ಡಬ್ಲ್ಯೂಪಿಎಲ್ ಡೆಲ್ಲಿ ಕ್ಯಾಪಿಟಲ್ಸ್‌ ತಂಡಕ್ಕೆ ಮಹತ್ವದ್ದಾಗಿದೆ. ಕಳೆದ ಎರಡು ಆವೃತ್ತಿಗಳಲ್ಲಿ ಡೆಲ್ಲಿ ರನ್ನರ್ ಅಪ್ ಆಗಿದೆ. ಈಗ ಡೆಲ್ಲಿ ತಂಡದ ಕಣ್ಣುಗಳು ಪ್ರಶಸ್ತಿ ಗೆಲ್ಲುವತ್ತ ನೆಟ್ಟಿದೆ. ಡೆಲ್ಲಿ ಫೆಬ್ರವರಿ 15 ರಂದು ವಡೋದರಾದಲ್ಲಿ ಮುಂಬೈ ಇಂಡಿಯನ್ಸ್ ವಿರುದ್ಧ ತನ್ನ ಮೊದಲ ಪಂದ್ಯವನ್ನು ಆಡಲಿದೆ.

ಡೆಲ್ಲಿ ಕ್ಯಾಪಿಟಲ್ಸ್ ತಂಡ

ಆಲಿಸ್ ಕ್ಯಾಪ್ಸೆ, ಅರುಂಧತಿ ರೆಡ್ಡಿ, ಜೆಮಿಮಾ ರೋಡ್ರಿಗಸ್, ಜೆಸ್ ಜೊನಾಸ್ಸೆನ್, ಮರಿಜಾನ್ನೆ ಕಪ್, ಮೆಗ್ ಲ್ಯಾನಿಂಗ್ (ನಾಯಕಿ), ಮಿನ್ನು ಮಣಿ, ರಾಧಾ ಯಾದವ್, ಶಫಾಲಿ ವರ್ಮಾ, ಶಿಖಾ ಪಾಂಡೆ, ಸ್ನೇಹಾ ದೀಪ್ತಿ, ತನಿಯಾ ಭಾಟಿಯಾ, ಟೈಟಾಸ್ ಸಾಧು, ಅನ್ನಾಬೆಲ್ ಕಶ್ಯಪ್, ಆರ್. ಚಾರ್ಲ್ಯಾಂಡ್, ಸಾರಾ ಬ್ರೈಸ್, ನಿಕಿ ಪ್ರಸಾದ್.