WPL Auction 2024: 1.30 ಕೋಟಿ ರೂ.ಗೆ ಯುಪಿ ವಾರಿಯರ್ಜ್ ಸೇರಿದ ಕನ್ನಡತಿ; ಯಾರು ಈ ವೃಂದಾ ದಿನೇಶ್?

ಶನಿವಾರ, ಡಿಸೆಂಬರ್ 9ರಂದು ಮುಂಬೈನಲ್ಲಿ 2024ರ ಮಹಿಳಾ ಪ್ರೀಮಿಯರ್ ಲೀಗ್‌ಗಾಗಿ ನಡೆದ ಮಿನಿ ಹರಾಜಿನಲ್ಲಿ ದೊಡ್ಡ ಮೊತ್ತವನ್ನು ಗಳಿಸಿದ ಆಟಗಾರ್ತಿಯರಲ್ಲಿ ವೃಂದಾ ದಿನೇಶ್ ಕೂಡ ಒಬ್ಬರು.

ಕರ್ನಾಟಕದ ಆರಂಭಿಕ ಬ್ಯಾಟರ್ 10 ಲಕ್ಷ ರೂಪಾಯಿ ಮೂಲ ಬೆಲೆಯನ್ನು ಹೊಂದಿದ್ದರು. ಆರ್‌ಸಿಬಿ ಸೇರಿದಂತೆ ಕೆಲವು ತಂಡಗಳು ವೃಂದಾ ಅವರನ್ನು ಪಡೆದುಕೊಳ್ಳಲು ಆಸಕ್ತಿ ವಹಿಸಿದರು ಮತ್ತು ಬಿಡ್ಡಿಂಗ್ ವಾರ್‌ನಲ್ಲಿ ತೊಡಗಿದವು.

22 ವರ್ಷದ ಬ್ಯಾಟರ್ ವೃಂದಾ ದಿನೇಶ್ 1.30 ಕೋಟಿ ರೂಪಾಯಿಗೆ ಯುಪಿ ವಾರಿಯರ್ಜ್ ತಂಡಕ್ಕೆ ಖರೀದಿಯಾಗುತ್ತಿದ್ದಂತೆಯೇ, ಕಾಶ್ವೀ ಗೌತಮ್ ನಂತರ ಮಹಿಳಾ ಪ್ರೀಮಿಯರ್ ಲೀಗ್‌ನ ಇತಿಹಾಸದಲ್ಲಿ ಮಾರಾಟವಾದ ಎರಡನೇ ದುಬಾರಿ ಅನ್‌ಕ್ಯಾಪ್ಡ್ ಆಟಗಾರ್ತಿ ಎನಿಸಿದರು.

ಕಳೆದ ಎರಡು ವರ್ಷಗಳಿಂದ ಕರ್ನಾಟಕ ರಾಜ್ಯ ತಂಡದ ಉದಯೋನ್ಮುಖ ಪ್ರತಿಭೆ ವೃಂದಾ ದಿನೇಶ್, ಮಹಿಳಾ ಸರ್ಕ್ಯೂಟ್‌ನಲ್ಲಿ ನಿರಂತರವಾಗಿ ತಮ್ಮ ಕೌಶಲ್ಯವನ್ನು ಪ್ರದರ್ಶಿಸಿದ್ದಾರೆ.

2023ರ ಆರಂಭದಲ್ಲಿ ಹಾಂಗ್ ಕಾಂಗ್‌ನಲ್ಲಿ ನಡೆದ ಎಸಿಸಿ ಎಮರ್ಜಿಂಗ್ ತಂಡಗಳ ಟೂರ್ನಿಯಲ್ಲಿ ಅಂಡರ್-23 ಭಾರತ ತಂಡದ ಭಾಗವಾಗಿ ವೃಂದಾ ದಿನೇಶ್ ಅವರನ್ನು ಉನ್ನತ ಮಟ್ಟದ ಕ್ರಿಕೆಟ್‌ಗೆ ಪರಿಚಯಿಸಲಾಯಿತು.

ಆರಂಭದಲ್ಲಿ ಭಾರತ ತಂಡಕ್ಕೆ ಆಯ್ಕೆಯಾಗದಿದ್ದರೂ, ಅಭ್ಯಾಸ ಪಂದ್ಯಗಳಲ್ಲಿ ವೃಂದಾ ದಿನೇಶ್ ಅವರ ಅತ್ಯುತ್ತಮ ಪ್ರದರ್ಶನವು ಗಮನ ಸೆಳೆದಿತ್ತು. ಬಳಿಕ, ವೇಗದ ಬೌಲರ್ ಎಸ್ ಯಶಸ್ವಿ ಗಾಯಗೊಂಡಿದ್ದರಿಂದ, ವೃಂದಾ ದಿನೇಶ್ ಕರೆ ಪಡೆದರು.

ಅಂಡರ್-23 ತಂಡಕ್ಕೆ ತಕ್ಷಣದ ಸೇರ್ಪಡೆಯ ನಂತರ, ವೃಂದಾ ದಿನೇಶ್ ಫೈನಲ್‌ನಲ್ಲಿ ಗಮನಾರ್ಹ ಪ್ರಭಾವ ಬೀರಿದರು. ಗಮನಾರ್ಹವಾಗಿ 29 ಎಸೆತಗಳಲ್ಲಿ 36 ರನ್ ಗಳಿಸಿ ಭಾರತ ಎಮರ್ಜಿಂಗ್ ತಂಡ ಒಟ್ಟು 7 ವಿಕೆಟ್‌ಗೆ 127 ರನ್ ಗಳಿಸಲು ನೆರವಾದರು.

ನಿಧಾನಗತಿ ಪಿಚ್‌ನಲ್ಲಿ ಬಾಂಗ್ಲಾದೇಶ 31 ರನ್‌ಗಳಿಂದ ಹಿನ್ನಡೆ ಅನುಭವಿಸಿದ ಕಾರಣ, ವೃಂದಾ ದಿನೇಶ್ ಅವರ ರನ್‌ಗಳು ಭಾರತದ ಗೆಲುವಿಗೆ ಸಹಾಯವಾಗಿತ್ತು. ಮುಸ್ಕಾನ್ ಮಲಿಕ್ ಅವರ ಕಿಟ್ ನಿಗದಿತ ಸಮಯಕ್ಕೆ ಸಿಗದ ಕಾರಣ, ವೃಂದಾ ಬ್ಯಾಟಿಂಗ್ ಮಾಡಲು ಅವಕಾಶ ಒದಗಿ ಬಂದಿರುವುದು ಕುತೂಹಲ ಮೂಡಿಸಿದೆ.

ಮೆಗ್ ಲ್ಯಾನಿಂಗ್ ಅವರು ವೃಂದಾ ದಿನೇಶ್ ಅವರ ಕ್ರಿಕೆಟ್ ಆರಾಧ್ಯ ದೈವವಾಗಿ ಕಾರ್ಯನಿರ್ವಹಿಸುತ್ತಾರೆ. ಅವರು ಆಫ್-ಸೀಸನ್ ಸಮಯದಲ್ಲಿ ಎಲ್ಲಾ ಐದು ಮಹಿಳಾ ಪ್ರೀಮಿಯರ್ ಲೀಗ್ ಫ್ರಾಂಚೈಸಿಗಳು ನಡೆಸಿದ ಪ್ರಯೋಗಗಳಲ್ಲಿ ಸಕ್ರಿಯವಾಗಿ ಭಾಗವಹಿಸಿದರು.

ಈ ವರ್ಷದ ಆರಂಭದಲ್ಲಿ, ಹಿರಿಯ ಮಹಿಳೆಯರ ಏಕದಿನ ಪಂದ್ಯಾವಳಿಯ ಫೈನಲ್‌ಗೆ ಕರ್ನಾಟಕ ತಂಡದ ಪಯಣದಲ್ಲಿ ವೃಂದಾ ದಿನೇಶ್ ಪ್ರಮುಖ ಪಾತ್ರ ವಹಿಸಿದ್ದರು.

47.70ರ ಪ್ರಭಾವಶಾಲಿ ಸರಾಸರಿಯಲ್ಲಿ 11 ಇನ್ನಿಂಗ್ಸ್‌ಗಳಲ್ಲಿ 477 ರನ್‌ಗಳೊಂದಿಗೆ ಮೂರನೇ ಅತಿ ಹೆಚ್ಚು ರನ್ ಗಳಿಸಿದ ಆಟಗಾರ್ತಿಯಾಗಿ ಮುಗಿಸಿದರು. ರಾಜಸ್ಥಾನ ವಿರುದ್ಧದ ಸೆಮಿಫೈನಲ್‌ನಲ್ಲಿ ಅದ್ಭುತ 81 ರನ್ ಸೇರಿದಂತೆ ತಮ್ಮ ಬ್ಯಾಟಿಂಗ್ ಪರಾಕ್ರಮವನ್ನು ಪ್ರದರ್ಶಿಸಿದರು.

ಡಬ್ಲ್ಯುಪಿಎಲ್ ಹರಾಜಿನಲ್ಲಿ ಗುಜರಾತ್ ಜೈಂಟ್ಸ್, ಯುಪಿ ವಾರಿಯರ್ಜ್ ಮತ್ತು ರಾಯಲ್ ಚಾಲೆಂಜರ್ಸ್ ಬೆಂಗಳೂರು (ಆರ್‌ಸಿಬಿ) ಮೂರು ತಂಡಗಳು ವೃಂದಾ ದಿನೇಶ್ ಪಡೆಯಲು ಬಿಡ್ಡಿಂಗ್‌ನಲ್ಲಿ ಹಗ್ಗಜಗ್ಗಾಟ ನಡೆಸಿದವು.

ಅಂತಿಮವಾಗಿ, ಯುಪಿ ವಾರಿಯರ್ಜ್ ತಮ್ಮ ಬ್ಯಾಟಿಂಗ್ ವಿಭಾಗವನ್ನು ಬಲಪಪಡಿಸಲು 1.30 ಕೋಟಿ ರೂಪಾಯಿಗಳ ಒಪ್ಪಂದಕ್ಕೆ ಸಹಿ ಹಾಕಿದರು. ವಿಶ್ವ ಕ್ರಿಕೆಟ್‌ನ ಕೆಲವು ಅತ್ಯುತ್ತಮ ಆಟಗಾರರಾದ ಅಲಿಸ್ಸಾ ಹೀಲಿ, ಸೋಫಿ ಎಕ್ಲೆಸ್ಟೋನ್ ಮತ್ತು ದೀಪ್ತಿ ಶರ್ಮಾ ಅವರೊಂದಿಗೆ ಆಡುವ ಅವಕಾಶವನ್ನು ವೃಂದಾ ದಿನೇಶ್ ಹೊಂದಿದರು.

ದೇಶೀಯ ಕ್ರಿಕೆಟ್‌ನಲ್ಲಿ ವೃಂದಾ ದಿನೇಶ್ ದಾಖಲೆ

22ರ ಹರೆಯದ ವೃಂದಾ ದಿನೇಶ್ ಕಳೆದೆರಡು ಋತುಗಳಲ್ಲಿ ಕರ್ನಾಟಕದ ಪರ ಅತ್ಯುತ್ತಮ ರನ್‌ಗಳನ್ನು ಗಳಿಸಿದ್ದಾರೆ. ಅವಳು ಆಕ್ರಮಣಕಾರಿ ಶಾಟ್‌ಗಳನ್ನು ಆಡಲು ಇಷ್ಟಪಡುತ್ತಾಳೆ ಮತ್ತು ಅದರಲ್ಲಿ ಸಾಕಷ್ಟು ಸ್ಥಿರವಾಗಿದ್ದಾರೆ. ವೃಂದಾ ಇತ್ತೀಚೆಗೆ ಇಂಗ್ಲೆಂಡ್ ಎ ವಿರುದ್ಧದ ಮೂರು ತವರಿನ ಪಂದ್ಯಗಳಿಗೆ ಭಾರತ ಎ ತಂಡದಲ್ಲಿ ಆಯ್ಕೆಯಾದರು.

ಇದೇ ವೇಳೆ ಅಂತರ-ವಲಯ ಏಕದಿನ ಟೂರ್ನಿಯಲ್ಲಿ ವೃಂದಾ ದಿನೇಶ್ ಆಡಿದ ಐದು ಪಂದ್ಯಗಳಲ್ಲಿ 49ರ ಸರಾಸರಿ ಮತ್ತು 105.37 ಸ್ಟ್ರೈಕ್ ರೇಟಟ್‌ನಲ್ಲಿ 196 ರನ್‌ಗಳನ್ನು ಗಳಿಸಿದರು. ವೃಂದಾ ದಿನೇಶ್ ಆಡಿದ 17 ಟಿ20 ಪಂದ್ಯಗಳಲ್ಲಿ 126.10ರ ಸ್ಟ್ರೈಕ್ ರೇಟ್‌ನಲ್ಲಿ 357 ರನ್ ಗಳಿಸಿದ್ದಾರೆ.