WTC Final: ಭಾರತದ ಐಸಿಸಿ ಪ್ರಶಸ್ತಿ ದಶಕದ ಬರ; ಕೌಶಲ್ಯವಲ್ಲ, ಮನಸ್ಥಿತಿ ಬದಲಾಗಬೇಕಿದೆ; ಮ್ಯಾಥ್ಯೂ ಹೇಡನ್

ಕ್ರಿಕೆಟ್ ಜಗತ್ತು ಭಾರೀ ಕುತೂಹಲದಿಂದ ಕಾಯುತ್ತಿರುವ ವಿಶ್ವ ಟೆಸ್ಟ್ ಚಾಂಪಿಯನ್‌ಶಿಪ್ (ಡಬ್ಲ್ಯುಟಿಸಿ) 2021-23ರ ಫೈನಲ್‌ ಪಂದ್ಯಕ್ಕೆ ದಿನಗಣನೆ ಆರಂಭವಾಗಿದ್ದು, ಇಂಗ್ಲೆಂಡ್‌ನ ಓವಲ್‌ನಲ್ಲಿ ಜೂನ್ 7ರಿಂದ 11ರ ವರೆಗೆ ಭಾರತ ಮತ್ತು ಆಸ್ಟ್ರೇಲಿಯಾ ನಡುವೆ ಫೈನಲ್ ಪಂದ್ಯ ನಡೆಯಲಿದೆ.

ಇದೀಗ ಆಸ್ಟ್ರೇಲಿಯಾದ ಶ್ರೇಷ್ಠ ಕ್ರಿಕೆಟಿಗ ಮ್ಯಾಥ್ಯೂ ಹೇಡನ್ ಅವರು ದಶಕದಿಂದ ಭಾರತದ ಐಸಿಸಿ ಪ್ರಶಸ್ತಿ ಬರದ ಕುರಿತು ಮಾತನಾಡಿದ್ದಾರೆ.

"ಕಳೆದ ಒಂದು ದಶಕದಲ್ಲಿ ಐಸಿಸಿ ಪಂದ್ಯಾವಳಿಗಳಲ್ಲಿ ಭಾರತದ ಪ್ರಶಸ್ತಿ ಬರವನ್ನು ಆಟಗಾರರ ಮನಸ್ಥಿತಿಗೆ ಇಳಿಸಬೇಕು. ಏಕೆಂದರೆ ಇದು ಕೌಶಲ್ಯದ ಪ್ರಶ್ನೆಯಲ್ಲ, ಬದಲಿಗೆ ಮನಸ್ಥಿತಿಯ ಪ್ರಶ್ನೆ. ಹೀಗಾಗಿ ಆಸ್ಟ್ರೇಲಿಯಾ ವಿರುದ್ಧದ ವಿಶ್ವ ಟೆಸ್ಟ್ ಚಾಂಪಿಯನ್‌ಶಿಪ್ ಫೈನಲ್‌ಗೆ ಹೋಗುವ ಮುನ್ನ ಫಲಿತಾಂಶವನ್ನು ಮರೆತು ಆಡಿ," ಎಂದು ಮ್ಯಾಥ್ಯೂ ಹೇಡನ್ ಸಲಹೆ ನೀಡಿದ್ದಾರೆ.

ಭಾರತದ ಕೊನೆಯ ಐಸಿಸಿ ಪ್ರಶಸ್ತಿಯು 2013ರಲ್ಲಿ ಎಂಎಸ್ ಧೋನಿ ನಾಯಕತ್ವದಲ್ಲಿ ಬಂದಿತ್ತು. ಅಂದಿನಿಂದ ಭಾರತ ತಂಡವು ಪಾಕಿಸ್ತಾನದ ವಿರುದ್ಧದ 2017 ಚಾಂಪಿಯನ್ಸ್ ಟ್ರೋಫಿ ಫೈನಲ್, ನ್ಯೂಜಿಲೆಂಡ್ ವಿರುದ್ಧ 2019ರ ಏಕದಿನ ವಿಶ್ವಕಪ್ ಸೆಮಿಫೈನಲ್ ಸೇರಿದಂತೆ ಹೆಚ್ಚಿನ ಒತ್ತಡದ ನಾಕ್-ಔಟ್ ಪಂದ್ಯಗಳಲ್ಲಿ ಸೋತಿದೆ. ಕಳೆದ ವರ್ಷ ಇಂಗ್ಲೆಂಡ್ ವಿರುದ್ಧ ಟಿ20 ವಿಶ್ವಕಪ್ ಸೆಮಿಫೈನಲ್‌ನಲ್ಲಿಯೂ ಸೋಲು ಕಂಡಿದೆ.

ಎರಡು ವರ್ಷಗಳ ಹಿಂದೆ ನಡೆದ ಚೊಚ್ಚಲ ವಿಶ್ವ ಟೆಸ್ಟ್ ಚಾಂಪಿಯನ್‌ಶಿಪ್ ಫೈನಲ್‌ನಲ್ಲಿ ಭಾರತ ತಂಡ ನ್ಯೂಜಿಲೆಂಡ್ ವಿರುದ್ಧ ಸೋತು ರನ್ನರ್‌ಅಪ್‌ ಸ್ಥಾನ ಗಳಿಸಿತು.

ಆರ್ಥಿಕ ಮತ್ತು ಪ್ರತಿಭೆಯ ಸಂಪನ್ಮೂಲಗಳ ವಿಷಯದಲ್ಲಿ ಭಾರತವು ದೀರ್ಘಕಾಲದವರೆಗೆ ಕ್ರೀಡೆಯ ಶಕ್ತಿ ಕೇಂದ್ರವಾಗಿದೆ. ಆದರೆ ದೊಡ್ಡ ಪ್ರಶಸ್ತಿಗಳು ಅವರನ್ನು ತಪ್ಪಿಸಿವೆ ಎಂದು ಆಸ್ಟ್ರೇಲಿಯಾ ಮಾಜಿ ಕ್ರಿಕೆಟಿಗ ಮ್ಯಾಥ್ಯೂ ಹೇಡನ್ ಹೇಳಿದರು.

ಓವಲ್‌ನಲ್ಲಿ ಜೂನ್ 7ರಿಂದ ನಡೆಯುವ ವಿಶ್ವ ಟೆಸ್ಟ್ ಚಾಂಪಿಯನ್‌ಶಿಪ್ ಫೈನಲ್‌ನಲ್ಲಿ ಆಸ್ಟ್ರೇಲಿಯಾ ವಿರುದ್ಧ ಭಾರತ ಗೆದ್ದು ಪ್ರಶಸ್ತಿ ಮುಡಿಗೇರಿಸಿಕೊಳ್ಳಬಹುದೇ? ಎಂಬ ಪ್ರಶ್ನೆಗೆ, ""ಇದು ನಿಸ್ಸಂಶಯವಾಗಿ ಕೌಶಲ್ಯದ ಪ್ರಶ್ನೆಯಲ್ಲ. ಆದ್ದರಿಂದ, ಇದು ಕೇವಲ ಅವಕಾಶ ಮತ್ತು ಮನಸ್ಥಿತಿಯ ಪ್ರಶ್ನೆಯಾಗಿರಬೇಕು,'' ಎಂದಿದ್ದಾರೆ.

"ನನ್ನ ಪ್ರಕಾರ, ಭಾರತದಲ್ಲಿ ಕ್ರಿಕೆಟ್ ಜೀವನವಾಗಿದೆ, ಬೇರೆ ಯಾವುದೇ ಪ್ರತಿಸ್ಪರ್ಧಿ ದೇಶಕ್ಕಿಂತ ಇದು ಕ್ರೀಡೆಯ ಡಿಎನ್‌ಎ ಆಗಿದೆ. ಭಾರತದಲ್ಲಿ ಕ್ರಿಕೆಟ್‌ನ ಜನಪ್ರಿಯತೆಗೆ ಸರಿಸಾಟಿಯಿಲ್ಲ. ಆದ್ದರಿಂದ ಇದು ಆಟಗಾರರ ಸುತ್ತ ಹೆಚ್ಚಿನ ಒತ್ತಡವನ್ನು ಸೃಷ್ಟಿಸುತ್ತದೆ," ಎಂದು ಆಸೀಸ್ ಮಾಜಿ ಆರಂಭಿಕ ಬ್ಯಾಟ್ಸ್‌ಮನ್ ಮ್ಯಾಥ್ಯೂ ಹೇಡನ್ ತಿಳಿಸಿದರು.

"ಆಸ್ಟ್ರೇಲಿಯಾದಲ್ಲಿ ನಾನು ವಿಶೇಷವಾಗಿ, ಈ ಭಯಾನಕ ಗಡ್ಡ ಮತ್ತು ಟೋಪಿಯೊಂದಿಗೆ ಬೀದಿಯಲ್ಲಿ ನಡೆಯುತ್ತೇನೆ ಮತ್ತು ಗುರುತಿಸಲಾಗದವನಾಗಿರುತ್ತೇನೆ. ಆದರೆ ಆಸ್ಟ್ರೇಲಿಯಾದಲ್ಲಿ ಕ್ರಿಕೆಟ್‌ನ ಜೊತೆಗೆ ಉತ್ತಮ ಸ್ಪರ್ಧಾತ್ಮಕ ಕ್ರೀಡೆಗಳನ್ನು ಸಹ ಹೊಂದಿದೆ. ರಗ್ಬಿ, ಫುಟ್‌ಬಾಲ್, ನಮ್ಮ ಜಲಕ್ರೀಡೆಗಳು, ಸರ್ಫಿಂಗ್, ಹೊರಾಂಗಣ ಕ್ರೀಡೆಗಳು ಇವೆ. ಭಾರತದಲ್ಲಿ ಇದರ ಗುರುತಿಸುವಿಕೆ ಕಡಿಮೆ ಇದೆ ಮತ್ತು ಕ್ರಿಕೆಟಿಗರಿಗೆ ಸಾಕಷ್ಟು ಒತ್ತಡವಿದೆ," ಎಂದರು.

"ಪಾಕಿಸ್ತಾನ ಕ್ರಿಕೆಟ್‌ನಲ್ಲಿಯೂ ಇದೇ ಸಮಸ್ಯೆಯಾಗಿದೆ. ಒಂದು ಕ್ರೀಡೆಯಿದೆ ಮತ್ತು ಅದು ಕ್ರಿಕೆಟ್ ಆಗಿದೆ. ಆದ್ದರಿಂದ ಇದು ಕೇವಲ ಮನಸ್ಥಿತಿಯ ವಿಷಯವಾಗಿದೆ. ಸ್ಕೋರ್‌ಬೋರ್ಡ್‌ನಲ್ಲಿ ರನ್ ಗಳಿಸುವ ಮತ್ತು ಪ್ರಶಸ್ತಿಗಳನ್ನು ಹುಡುಕುವ ಬಗ್ಗೆ ಜಾಗರೂಕರಾಗಿರಿ. ಕೇವಲ ಆಟವಾಡುವುದು ಮತ್ತು ಪ್ರಕ್ರಿಯೆಯ ಭಾಗವಾಗಿರುವುದು ಸೂಕ್ತ," ಎಂದು ಮ್ಯಾಥ್ಯೂ ಹೇಡನ್ ಅಭಿಪ್ರಾಯಪಟ್ಟರು.

"2023ರ ಐಪಿಎಲ್‌ನಲ್ಲಿ ನೀವು ಫ್ರಾಂಚೈಸ್ ತಂಡಗಳನ್ನು ನೋಡಿದಾಗ, ಗುಜರಾತ್ ಟೈಟನ್ಸ್ ಈ ವರ್ಷ ನಿಜವಾಗಿಯೂ ಉತ್ತಮವಾಗಿ ಆಡಿದೆ. ಸಿಎಸ್‌ಕೆ ಪ್ರಶಸ್ತಿ ಗೆದ್ದು ಉತ್ತಮ ಸಾಧನೆ ಮಾಡಿದೆ. ಮುಂಬೈ ಇಂಡಿಯನ್ಸ್ ಕೂಡ ಕಳೆದ ವರ್ಷಕ್ಕಿಂತ ಉತ್ತಮ ಪ್ರದರ್ಶನ ನೀಡಿದೆ," ಎಂದು ಮ್ಯಾಥ್ಯೂ ಹೇಡನ್ ಹೇಳಿದರು.

"ಹೀಗಾಗಿ, ಫಲಿತಾಂಶಗಳನ್ನು ಮರೆತು ಆಡಲು ಭಾರತೀಯ ಕ್ರಿಕೆಟ್‌ಗೆ ಇದು ನನ್ನ ಸಲಹೆಯಾಗಿದೆ. ಆದರೆ ಆಟದ ಪ್ರಕ್ರಿಯೆಯಲ್ಲಿ ಉತ್ತಮ ಪ್ರದರ್ಶನ ನೀಡಿ," ಎಂದು ಆಸ್ಟ್ರೇಲಿಯಾದ ಅಪಾಯಕಾರಿ ಬ್ಯಾಟ್ಸ್‌ಮನ್‌ಗಳಲ್ಲಿ ಒಬ್ಬರಾಗಿರುವ ಮ್ಯಾಥ್ಯೂ ಹೇಡನ್ ತಿಳಿಸಿದರು.