ಎಂಎಸ್ ಧೋನಿ ಹೆಸರಿನಲ್ಲಿದ್ದ ದಾಖಲೆ ಸರಿಗಟ್ಟಿದ ವಿರಾಟ್ ಕೊಹ್ಲಿ

ಧೋನಿ ದಾಖಲೆ ಬದಿಗೆ

ಟೆಸ್ಟ್‌ ಕ್ರಿಕೆಟ್‌ನಲ್ಲಿ ಭಾರತೀಯ ತಂಡವನ್ನು ಅತೀ ಹೆಚ್ಚು ಬಾರಿ ಮುನ್ನಡೆಸಿದ ಅಪರೂಪದ ದಾಖಲೆ ಎಂಎಸ್ ಧೋನಿ ಹೆಸರಿನಲ್ಲಿತ್ತು. ಒಟ್ಟು 60 ಸಾರಿ ಟೆಸ್ಟ್ ತಂಡದ ನಾಯಕತ್ವ ವಹಿಸಿದ್ದ ಧೋನಿ ಈ ದಾಖಲೆ ನಿರ್ಮಿಸಿದ್ದರು. ಆದರೆ ವಿರಾಟ್ ಕೊಹ್ಲಿ ಶನಿವಾರ ಮೈದಾನಕ್ಕಿಳಿಯುತ್ತಲೇ ಅವರು ಭಾರತೀಯ ಟೆಸ್ಟ್ ತಂಡಕ್ಕೆ 61 ಬಾರಿ ನಾಯಕತ್ವ ವಹಿಸಿಕೊಂಡಂತಾಗಿದೆ. ಹೀಗಾಗಿ ಧೋನಿ ದಾಖಲೆ ಬದಿಗೆ ಸರಿದಿದೆ. 2014ರಲ್ಲಿ ಧೋನಿ ಟೆಸ್ಟ್‌ನಿಂದ ನಿವೃತ್ತಿಯಾಗುವಾಗ 60 ಪಂದ್ಯಗಳಲ್ಲಿ ತಂಡ ಮುನ್ನಡೆಸಿದ್ದರು.

ಸ್ಮಿತ್ ಹೆಸರಲ್ಲಿ ವಿಶ್ವ ದಾಖಲೆ

ಟೆಸ್ಟ್‌ ಕ್ರಿಕೆಟ್‌ನಲ್ಲಿ ಅತೀ ಹೆಚ್ಚು ಸಾರಿ ತಂಡವನ್ನು ಮುನ್ನಡೆಸಿದ ವಿಶ್ವ ದಾಖಲೆ ದಕ್ಷಿಣ ಆಫ್ರಿಕಾದ ದಂತಕತೆ ಗ್ರೇಮ್‌ ಸ್ಮಿತ್ ಹೆಸರಿನಲ್ಲಿದೆ. ಸ್ಮಿತ್ ದಕ್ಷಿಣ ಆಫ್ರಿಕಾ ಟೆಸ್ಟ್ ತಂಡವನ್ನು ಒಟ್ಟು 109 ಸಾರಿ ಮುನ್ನಡೆಸಿದ್ದರು. ಟೆಸ್ಟ್‌ ತಂಡವೊಂದಕ್ಕೆ 100ಕ್ಕೂ ಸಾರಿ ನಾಯಕತ್ವ ವಹಿಸಿದ ಒಬ್ಬನೇ ಒಬ್ಬ ಆಟಗಾರ ಸ್ಮಿತ್. ಅದು ಬಿಟ್ಟರೆ ಆಸ್ಟ್ರೇಲಿಯಾದ ಅಲನ್ ಬಾರ್ಡರ್ 93 ಸಾರಿ, ಕೊಹ್ಲಿ 61 ಸಾರಿ, ಧೋನಿ 60 ಸಾರಿ, ಪಾಕಿಸ್ತಾನ ಮಿಸ್ಬಾ ಉಲ್ ಹಕ್ ಮತ್ತು ಶ್ರೀಲಂಕಾದ ಅರ್ಜುನ ರಣತುಂಗ 56 ಬಾರಿ ನಾಯಕತ್ವ ವಹಿಸಿಕೊಂಡಿದ್ದರು.

ಭಾರತದ ಪ್ರಮುಖ ವಿಕೆಟ್‌ಗಳು ಪತನ

ಟೆಸ್ಟ್ ಚಾಂಪಿಯನ್‌ಶಿಪ್‌ ಫೈನಲ್ ಪಂದ್ಯ ಅಸಲಿಗೆ ಜೂನ್ 18ರ ಶುಕ್ರವಾರ ಆರಂಭವಾಗಬೇಕಿತ್ತು. ಆದರೆ ಆ ದಿನ ಸೌತಾಂಪ್ಟನ್‌ನಲ್ಲಿ ವಿಪರೀತ ಮಳೆಯಾಗಿದ್ದರಿಂದ ಪಂದ್ಯ ಶುರುವಾಗಿರಲಿಲ್ಲ. ಶನಿವಾರ ಪಂದ್ಯ ಶುರುವಾಗಿದ್ದು, ಟಾಸ್ ಗೆದ್ದಿರುವ ನ್ಯೂಜಿಲೆಂಡ್ ಬೌಲಿಂಗ್ ಆಯ್ದುಕೊಂಡಿದೆ. ಭಾರತ 56 ಓವರ್‌ ಮುಕ್ತಾಯದ ವೇಳೆಗೆ ಪ್ರಮುಖ ಮೂರು ವಿಕೆಟ್‌ಗಳನ್ನು ಕಳೆದು ಆಡುತ್ತಿತ್ತು.