2020ರ ಐಪಿಎಲ್‌ನ ಪ್ರಮುಖ ಸಂಗತಿಗಳು, ಇಣುಕು ನೋಟಗಳು

ಬಯೋ ಬಬಲ್‌ನಲ್ಲಿ ಐಪಿಎಲ್

ಬಯೋಬಬಲ್ ಅನ್ನೋ ಪರಿಕಲ್ಪನೆ ಬಂದಿದ್ದೇ ಕೊರೊನಾವೈರಸ್‌ನಿಂದ. 2020ರ ಐಪಿಎಲ್ ನಡೆದಿದ್ದು ಬಯೋ ಬಬಲ ಒಳಗೆ. ಅಂದರೆ ಈ ಜೈವಿಕ ಪರದೆಯೊಳಗೆ ಹೋಗಿ ಬರೋದಕ್ಕೆ ನಿರ್ಬಂಧವಿರತ್ತೆ. ಅಲ್ಲದೆ ಬಯೋ ಬಬಲ್ ಪ್ರವೇಶಕ್ಕೂ ಮುನ್ನ ಪ್ರತ್ಯೇಕವಾಗಿದ್ದು ಕ್ವಾರಂಟೈನ್ ಪಾಲಿಸಬೇಕಿರುತ್ತದೆ.

ಚೆನ್ನೈ ಸೂಪರ್‌ ಕಿಂಗ್ಸ್‌ನಲ್ಲಿ ಕೊರೊನಾ

2020ರ ಐಪಿಎಲ್ ಶುರುವಾಗೋಕೆ ಕೆಲವೇ ದಿನ ಇರುವಾಗ ಸಿಎಸ್‌ಕೆ ತಂಡದ ಆಟಗಾರರಿಗೆ ಕೊರೊನಾ ತಗುಲಿತ್ತು. ಬಳಿಕ ಎಲ್ಲಾ ಆಟಗಾರರು ಸೋಂಕಿನಿಂದ ಗುಣಮುಖರಾದರು. ಸಿಎಸ್‌ಕೆಯಿಂದ ಆಲ್ ರೌಂಡರ್ ಸುರೇಶ್ ರೈನಾ, ಹರ್ಭಜನ್ ಸಿಂಗ್‌ ಆಡದೆ ದೂರ ಉಳಿದರು.

ಸಿಎಸ್‌ಕೆ ಪ್ಲಾಪ್‌ ಶೋ

ಐಪಿಎಲ್‌ ಬಲಿಷ್ಠ ತಂಡಗಳಲ್ಲಿ ಒಂದಾಗಿದ್ದ ಎಂಎಸ್ ಧೋನಿ ನಾಯಕತ್ವದ ಸಿಎಸ್‌ಕೆ, ಈ ಬಾರಿ ಅತೀ ಕೆಟ್ಟ ಪ್ರದರ್ಶನ ನೀಡಿ ಟೂರ್ನಿಯಲ್ಲಿ ಎಲ್ಲಾ ತಂಡಗಳಿಗಿಂತ ಮೊದಲು ಹೊರ ಬಿತ್ತು. ಸಿಎಸ್‌ಕೆ ತಂಡ ಪ್ಲೇ ಆಫ್‌ಗೆ ಪ್ರವೇಶಿಸದೆಯೂ ಐಪಿಎಲ್‌ನಿಂದ ಹೊರ ಬಿದ್ದಿದ್ದು ಇದೇ ಮೊದಲು.

ಡೆಲ್ಲಿ ಕ್ಯಾಪಿಟಲ್ಸ್ ಸಾಧನೆ

ಒಂದು ಬಾರಿಯೂ ಫೈನಲ್‌ಗೆ ಪ್ರವೇಶಿಸದ ತಂಡವೆಂದು ಗುರುತಿಸಿಕೊಂಡಿದ್ದ ಡೆಲ್ಲಿ ಕ್ಯಾಪಿಟಲ್ಸ್ ತಂಡ ಈ ಬಾರಿ ಫೈನಲ್‌ಗೆ ಪ್ರವೇಶಿಸಿ ದಾಖಲೆ ನಿರ್ಮಿಸಿತು. ಆದರೆ ಫೈನಲ್‌ನಲ್ಲಿ ಮುಂಬೈ ವಿರುದ್ಧ ಸೋತಿತು.

ಮುಂಬೈ ಮಡಿಲಿಗೆ 5ನೇ ಟ್ರೋಫಿ

ಹಿಟ್‌ಮ್ಯಾನ್ ರೋಹಿತ್ ಶರ್ಮಾ ಮುಂದಾಳತ್ವದ ಐಪಿಎಲ್ ಮುಂಬೈ ಇಂಡಿಯನ್ಸ್ ತಂಡ 2020ರ ಫೈನಲ್‌ನಲ್ಲಿ ಗೆದ್ದು ಐದನೇ ಟ್ರೋಫಿ ಮುಡಿಗೇರಿಸಿಕೊಂಡಿತು. ಆ ಬಳಿಕ ರೋಹಿತ್ ಶರ್ಮಾ ಅವರ ಗಾಯದ ಸಮಸ್ಯೆ, ಭಾರತ-ಆಸ್ಟ್ರೇಲಿಯಾ ಸರಣಿಯಲ್ಲಿ ರೋಹಿತ್ ಅವರನ್ನು ಹೊರಗಿಟ್ಟ ಸಂಗತಿ ಸದ್ದು ಮಾಡಿತು.