ಹಾಂಕಾಂಗ್ ಟ್ವೆಂಟಿ–20 ಕ್ರಿಕೆಟ್ ಲೀಗ್‌ಗೆ ಯುಸೂಫ್ ಪಠಾಣ್ ಎಂಟ್ರಿ

ನವದೆಹಲಿ, ಫೆಬ್ರವರಿ. 12 : ಐಪಿಎಲ್ ಮಾದರಿಯಲ್ಲಿ ಮುಂದಿನ ತಿಂಗಳು ಹಾಂಕಾಂಗ್ ನಲ್ಲಿ ನಡೆಯಲಿರುವ ಟ್ವೆಂಟಿ-20 ಕ್ರಿಕೆಟ್ ಲೀಗ್‌ನಲ್ಲಿ ಭಾರತದ ಯುಸೂಫ್ ಪಠಾಣ್ ಆಡಲಿದ್ದಾರೆ.

ಇದರಿಂದ ಅವರು ವಿದೇಶಿ ಲೀಗ್‌ನಲ್ಲಿ ಆಡಲಿರುವ ಭಾರತದ ಮೊದಲ ಕ್ರಿಕೆಟಿಗ ಎನ್ನುವ ಕೀರ್ತಿಗೆ ಭಾಜನರಾಗಲಿದ್ದಾರೆ. ಆ ಟೂರ್ನಿ ಮಾರ್ಚ್‌ 8ರಿಂದ 12ರ ವರೆಗೆ ನಡೆಯಲಿದೆ.

ಈ ಬಗ್ಗೆ ಪ್ರತಿಕ್ರಿಯಿಸಿರುವ ಯೂಸಫ್ ಪಠಾಣ್, 'ವಿದೇಶಿ ಲೀಗ್‌ನಲ್ಲಿ ಆಡಲು ಅನುಮತಿ ಕೊಟ್ಟ ಭಾರತ ಕ್ರಿಕೆಟ್‌ ನಿಯಂತ್ರಣ ಮಂಡಳಿ (ಬಿಸಿಸಿಐ) ಮತ್ತು ಬರೋಡ ಕ್ರಿಕೆಟ್‌ ಸಂಸ್ಥೆಗೆ ಧನ್ಯವಾದಗಳು. ಮುಂಬರುವ ಐಪಿಎಲ್ ಟೂರ್ನಿಗೆ ಸಜ್ಜಾಗಲು ಹಾಂಕಾಂಗ್ ನಲ್ಲಿ ನಡೆಯಲಿರುವ ಟೂರ್ನಿ ವೇದಿಕೆಯಾಗಲಿದೆ. ಆ ಲೀಗ್ ಅನ್ನು ಕುತೂಹಲದಿಂದ ಎದುರು ನೋಡುತ್ತಿದ್ದೇನೆ'ಎಂದು ಹೇಳಿದ್ದಾರೆ.

ಇತ್ತೀಚಿಗೆ ನಡೆದ ಸೈಯದ್ ಮುಷ್ತಾಕ್ ಅಲಿ ಟ್ರೋಫಿ ಟೂರ್ನಿಯಲ್ಲಿ ಮಹಾರಾಷ್ಟ್ರ ವಿರುದ್ಧದ ಪಂದ್ಯದಲ್ಲಿ ಗಮನಾರ್ಹ ಸಾಮರ್ಥ್ಯ ನೀಡಿದ್ದರು. 35 ಎಸೆತಗಳಲ್ಲಿ 56 ರನ್‌ ಹೊಡೆದು ಗಮನ ಸೆಳೆದಿದ್ದರು.

ಟ್ವೆಂಟಿ-20 ಮಾದರಿಯಲ್ಲಿ ಪಠಾಣ್ ಹಲವು ದಾಖಲೆಗಳ ಒಡೆಯರಾಗಿದ್ದಾರೆ. ಐಪಿಎಲ್ ನಲ್ಲಿ ವೇಗದ ಅರ್ಧಶತಕ ಗಳಿಸಿದ ದಾಖಲೆ ಹೊಂದಿದ್ದಾರೆ.

ಇನ್ನು ಈ ಹಾಂಕಾಂಗ್ ಟ್ವೆಂಟಿ-20 ಲೀಗ್‌ನಲ್ಲಿ ಶ್ರೀಲಂಕಾದ ಕುಮಾರ್ ಸಂಗಕ್ಕಾರ, ತಿಲಕರತ್ನೆ ದಿಕ್ಷ್ಯಾನ್, ವೆಸ್ಟ್ ಇಂಡೀಸ್ ನ ಡೆರೇನ್ ಸಮಿ, ನ್ಯೂಜಿಲೆಂಡ್ ನ ಜೇಮ್ಸ್ ಫ್ರಾಂಕ್ಲಿನ್ ಮತ್ತು ದಕ್ಷಿಣ ಆಫ್ರಿಕಾದ ಮಾಜಿ ಆಪ್ ಸ್ಪಿನ್ನರ್ ಜೋಹನ್ ಬೋಥ ಆಡಲಿದ್ದಾರೆ.