ನಿವೃತ್ತಿ ಹಿಂಪಡೆದು ಕ್ರಿಕೆಟ್‌ಗೆ ಮರಳುವಂತೆ ಯುವರಾಜ್ ಸಿಂಗ್‌ ಕರೆ!

ಪ್ಲೇಯರ್, ಮೆಂಟರ್ ಪಾತ್ರಕ್ಕೆ ವಿನಂತಿ

2019ರ ಜೂನ್ 10ರಂದು ಅಂತಾರಾಷ್ಟ್ರೀಯ ಕ್ರಿಕೆಟ್‌ಗೆ ನಿವೃತ್ತಿ ಘೋಷಿಸಿರುವ ಯುವರಾಜ್ ಸಿಂಗ್‌ಗೆ ನಿವೃತ್ತಿ ವಾಪಸ್ ಪಡೆದು ಪ್ಲೇಯರ್ ಕಮ್ ಮೆಂಟರ್ ಆಗುವಂತೆ ವಿನಂತಿಯೊಂದು ಬಂದಿತ್ತು ಎನ್ನಲಾಗಿದೆ. ಪಂಜಾಬ್ ಪ್ರತಿಭೆ ಯುವಿ ಅವರಲ್ಲಿ ಪಂಜಾಬ್ ಸ್ಟೇಟ್ ಕ್ರಿಕೆಟ್ ಅಸೋಸಿಯೇಶನ್ ಹೀಗೆ ಕೋರಿಕೊಂಡಿದೆ ಎಂದು ತಿಳಿದುಬಂದಿದೆ.

ಕ್ರಿಕೆಟ್‌ಗೆ ಮರಳಲು ಕೋರಿದ ಪಂಜಾಬ್

ಈಗಾಗಲೇ ಶುಭ್‌ಮಾನ್ ಗಿಲ್ ಸೇರಿ ಇನ್ನೂ ಕೆಲವರಿಗೆ ಮಾರ್ಗದರ್ಶನ ನೀಡುತ್ತಿರುವ ಯುವಿ ಅವರಲ್ಲಿ ಕಮ್‌ಬ್ಯಾಕ್ ಮಾಡುವಂತೆ, ಆಟಗಾರರಾಗಿ-ಮೆಂಟರ್ ಆಗಿ ರಾಜ್ಯ ಕ್ರಿಕೆಟ್‌ನಲ್ಲಿ ಜವಾಬ್ದಾರಿ ವಹಿಸುವಂತೆ ವಿನಂತಿಸಿದ್ದೇವೆ ಎಂದು ಪಂಜಾಬ್ ಕ್ರಿಕೆಟ್ ಅಸೋಸಿಯೇಶನ್‌ನ ಕಾರ್ಯದರ್ಶಿ ಪುನೀತ್ ಬಲಿ ಶುಕ್ರವಾರ (ಆಗಸ್ಟ್ 14) ಹೇಳಿದ್ದಾರೆ.

'ಪ್ರತಿಕ್ರಿಯೆಗಾಗಿ ಕಾಯುತ್ತಿದ್ದೇವೆ'

'ನಿವೃತ್ತಿ ವಾಪಸ್ ಪಡೆಯುವಂತೆ 5-6 ದಿನಗಳ ಹಿಂದೆ ನಾವು ಯುವರಾಜ್ ಅವರಲ್ಲಿ ಕೋರಿಕೊಂಡಿದ್ದೇವೆ. ಅವರ ಪ್ರತಿಕ್ರಿಯೆಗಾಗಿ ಕಾಯುತ್ತಿದ್ದೇವೆ. ಪಂಜಾಬ್‌ಗೆ ಆಟಗಾರರಾಗಿ ಮತ್ತು ಮೆಂಟರ್ ಆಗಿ ಅವರು ಕಾರ್ಯ ನಿರ್ವಹಿಸುವುದಾದರೆ ನಮಗೆಲ್ಲರಿಗೂ ತುಂಬಾ ಖುಷಿ,' ಎಂದು ಬಲಿ ಪಿಟಿಐ ಜೊತೆ ಹೇಳಿಕೊಂಡಿದ್ದಾರೆ.

ಯುವಕರಿಗೆ ಯುವಿ ಕೋಚಿಂಗ್

ಯುಎಇಯಲ್ಲಿ ಸೆಪ್ಟೆಂಬರ್ 19ರಿಂದ ಆರಂಭವಾಗಲಿರುವ ಐಪಿಎಲ್‌ಗಾಗಿ ಸಿದ್ಧತೆ ನಡೆಸುತ್ತಿರುವ ಶುಭ್‌ಮಾನ್ ಗಿಲ್, ಅನ್ಮೋಲ್‌ಪ್ರೀತ್ ಸಿಂಗ್ ಮತ್ತು ಹರ್‌ಪ್ರೀತ್ ಬ್ರಾರ್ ಇಂಥ ಯುವಕರಿಗೆ ಯುವಿ ಸದ್ಯ ಮಾರ್ಗದರ್ಶನ ನೀಡುತ್ತಿದ್ದರೆ. 40 ಟೆಸ್ಟ್ ಪಂದ್ಯಗಳಲ್ಲಿ 1900 ರನ್, 304 ಏಕದಿನ ಪಂದ್ಯಗಳಲ್ಲಿ 8701 ರನ್, 14 ಶತಕ, 58 ಟಿ20ಐ ಪಂದ್ಯಗಳಲ್ಲಿ 1177 ರನ್, 8 ಅರ್ಧ ಶತಕಗಳ ದಾಖಲೆ ಯುವಿ ಹೆಸರಲ್ಲಿದೆ.