ಅಭಿಮಾನಿಗಳಿಗೆ ಆಸ್ಪತ್ರೆಯಿಂದಲೇ ಧನ್ಯವಾದ ಹೇಳಿದ ಕ್ರಿಶ್ಚಿಯನ್ ಎರಿಕ್ಸನ್

ಕೋಪನ್ ಹ್ಯಾಗನ್: ಯೂನಿಯನ್ ಯುರೋಪಿಯನ್ ಫುಟ್ಬಾಲ್ ಅಸೋಸಿಯೇಶನ್ (ಯುಎಎಫ್‌ಸಿಎ) ಯೂರೋ 2020 ಡೆನ್ಮಾರ್ಕ್-ಫಿನ್‌ಲ್ಯಾಂಡ್ ಪಂದ್ಯದ ವೇಳೆ ಡೆನ್ಮಾರ್ಕ್ ಮಿಡ್‌ ಫೀಲ್ಡರ್ ಕ್ರಿಶ್ಚಿಯನ್ ಎರಿಕ್ಸನ್ ಹೃದಯಾಘಾತದಿಂದಾಗಿ ಕುಸಿದುಬಿದ್ದಿದ್ದ ಘಟನೆ ನಡೆದಿತ್ತು. ಈಗ ಎರಿಕ್ಸನ್ ಚೇತರಿಸಿಕೊಂಡಿದ್ದಾರೆ.

ಜೂನ್ 12ರ ಶನಿವಾರ ಯೂರೋ 2020 ಡೆನ್ಮಾರ್ಕ್-ಫಿನ್‌ಲ್ಯಾಂಡ್ ಪಂದ್ಯದಲ್ಲಿ ಕ್ರಿಶ್ಚಿಯನ್ ಎರಿಕ್ಸನ್ ಇದ್ದಕ್ಕಿದ್ದಂತೆ ಕುಸಿದು ಬಿದ್ದಿದ್ದರು. ಈಗ ಎರಿಕ್ಸನ್ ಸಂಪೂರ್ಣವಾಗಿ ಚೇತರಿಸಿಕೊಂಡಿದ್ದು, ಆಸ್ಪತ್ರೆಯಿಂದಲೇ ಅಭಿಮಾನಿಗಳಿಗೆ ತುಂಬು ಮನದ ಧನ್ಯವಾದಗಳನ್ನು ಸಲ್ಲಿಸಿದ್ದಾರೆ.

ಇನ್‌ಸ್ಟಾಗ್ರಾಮ್ ಪೋಸ್ಟ್ ಹಾಕಿಕೊಂಡಿರುವ ಎರಿಕ್ಸನ್, 'ಎಲ್ಲರಿಗೂ ಹಲೋ, ವಿಶ್ವದಾದ್ಯಂತ ಬಂದ ನಿಮ್ಮ ಸಿಹಿಯಾದ ಮತ್ತು ಅದ್ಭುತವಾದ ಪ್ರೀತಿ-ಆದರ-ಪ್ರಾರ್ಥನೆಗೆ ತುಂಬು ಮನದ ಧನ್ಯವಾದಗಳು. ನಿಮ್ಮ ಬೆಂಬಲ ನನಗೆ, ನನ್ನ ಕುಟುಂಬಕ್ಕೆ ಬಹಳ ಅಗತ್ಯವಿತ್ತು. ನಾನೀಗ ಚೆನ್ನಾಗಿದ್ದೇನೆ. ಆಸ್ಪತ್ರೆಯಲ್ಲಿ ಇನ್ನೂ ಕೆಲವು ಪರೀಕ್ಷೆಗಳಿಗೆ ಒಳಪಡಬೇಕಿದೆ. ಆದರೆ ನಾನು ಹುಷಾರಾಗಿದ್ದೇನೆ' ಎಂದು ಬರೆದುಕೊಂಡಿದ್ದಾರೆ.

ಮೈದಾನದಲ್ಲಿ ಎರಿಕ್ಸನ್ ಕುಸಿದು ಬಿದ್ದಾಗ ಡೆನ್ಮಾರ್ಕ್-ಫಿನ್‌ಲ್ಯಾಂಡ್ ಪಂದ್ಯವನ್ನು ಅಮಾನತುಗೊಳಿಸಿ ಕೂಡಲೇ ಅವರನ್ನು ಆಸ್ಪತ್ರೆಗೆ ದಾಖಲಿಸಲಾಗಿತ್ತು. ಆಟದ ವೇಳೆ ಕುಸಿದು ಬಿದ್ದಿದ್ದ ಎರಿಕ್ಸನ್ ಬೇಗ ಗುಣಮುಖರಾಗಲೆಂದು ವಿಶ್ವದಗಲದ ಕ್ರೀಡಾಭಿಮಾನಿಗಳು ಪ್ರಾರ್ಥಿಸಿದ್ದರು.