ಕೊರೊನಾವೈರಸ್ ಕಾರಣ: ಯೂರೋ 2020 ಒಂದು ವರ್ಷ ಮುಂದಕ್ಕೆ

ಬೆಂಗಳೂರು, ಮಾರ್ಚ್ 17: ಯುರೋಪಿಯನ್ ಫುಟ್ಬಾಲ್ ಚಾಂಪಿಯನ್‌ಶಿಪ್ ಯೂರೋ 2020 ಮುಂದಿನ ವರ್ಷಕ್ಕೆ ಮುಂದೂಡಲ್ಪಟ್ಟಿದೆ. ಕೊರೊನಾವೈರಸ್‌ನಿಂದಾಗಿ ಪ್ರತಿಷ್ಠಿತ ಟೂರ್ನಿ ಮುಂದೂಡಲ್ಪಟ್ಟಿದೆ. ನಾರ್ವೆ ಮತ್ತು ಸ್ವೀಡನ್ ಫುಟ್ಬಾಲ್ ಅಸೋಸಿಯೇಷನ್ ಮಂಗಳವಾರ (ಮಾರ್ಚ್ 17) ಈ ವಿಚಾರವನ್ನು ತಿಳಿಸಿದೆ.

'ಯೂರೋ 2020 ಟೂರ್ನಿ, 11/6 - 11/7 2021ಕ್ಕೆ ಮುಂದೂಡಲ್ಪಟ್ಟಿದೆ. ಸಭೆಯ ಬಳಿಕ ಮುಂದಿನ ಮಾಹಿತಿಯನ್ನು ನಿಮಗೆ ನೀಡುತ್ತೇವೆ,' ಎಂದು ಸ್ವೀಡನ್ ಫುಟ್ಬಾಲ್ ಅಸೋಸಿಯೇಷನ್‌ನ ಮುಖ್ಯಸ್ಥ ಕಾರ್ಲ್-ಎರಿಕ್ ನಿಲ್ಸನ್ ಹೇಳಿದ್ದಾರೆ. ಅಂದ್ಹಾಗೆ ಅಂತಿಮ ಹಂತದಲ್ಲಿದ್ದ ಯೂರೋ 2020 ಟೂರ್ನಿ ಮುಂದೂಡಲ್ಪಟ್ಟಿದ್ದು ಟೂರ್ನಿಯ ಇತಿಹಾಸದಲ್ಲೇ ಇದೇ ಮೊದಲ ಬಾರಿ.

ನಾರ್ವೇಯನ್ ಫುಟ್ಬಾಲ್ ಅಸೋಸಿಯೇಷನ್ ಕೂಡ ಇದೇ ವಿಚಾರವನ್ನು ತನ್ನ ಅಧಿಕೃತ ಟ್ವಿಟರ್ ಖಾತೆಯಲ್ಲಿ ಹೇಳಿದೆ. ಇದರೊಂದಿಗೆ ಯೂನಿಯನ್ ಯುರೋಪಿಯನ್ ಫುಟ್ಬಾಲ್ ಅಸೋಸಿಯೇಷನ್ (ಯುಇಎಫ್‌ಎ) ಚಾಂಪಿಯನ್ಸ್ ಲೀಗ್‌ನ ಪಂದ್ಯಗಳೂ ಮುಂದೂಡಲ್ಪಟ್ಟಿವೆ.

ವಿಶ್ವದಾದ್ಯಂತ ಸುಮಾರು 180,000 ಮಂದಿ ಈಗಾಗಲೇ ಮಾರಕ ಕೊರೊನಾವೈರಸ್‌ಗೆ ತುತ್ತಾಗಿದ್ದಾರೆ. ಸುಮಾರು 7000 ಮಂದಿ ಸಾವಿಗೀಡಾಗಿದ್ದಾರೆ. ಇದರಿಂದಾಗಿ ಕ್ರೀಡಾಸ್ಪರ್ಧೆಗಳನ್ನೇ ನಡೆಸಲು ಆಯೋಜಕರು ಹೆದರುತ್ತಿದ್ದಾರೆ. ಇದೇ ಕಾರಣಕ್ಕೆ ಎಲ್ಲಾ ಕ್ರೀಡಾಕೂಟಗಳೂ ರದ್ದಾಗುತ್ತಿವೆ, ಮುಂದೂಡಲ್ಪಡುತ್ತಿವೆ.