ಫ್ರೆಂಚರನ್ನು ಬಗ್ಗುಬಡಿದು ಉಪಾಂತ್ಯಕ್ಕೆ ಜರ್ಮನ್ನರು ಎಂಟ್ರಿ

ಆರಂಭಿಕ ಮುನ್ನಡೆ ಪಡೆದ ಜರ್ಮನ್ನರು

ಪಂದ್ಯದ 13ನೇ ನಿಮಿಷದಲ್ಲಿ ಜರ್ಮನಿ ಮುನ್ನಡೆ ಗಳಿಸಿತು. ಟೋನಿ ಕ್ರೂಸ್‌ ಫ್ರೀ ಕಿಕ್‌ನಲ್ಲಿ ನಿಖರವಾಗಿ ಒದ್ದ ಚೆಂಡನ್ನು ಮ್ಯಾಟ್ಸ್‌ ಹಮೆಲ್ಸ್‌ ಹೆಡ್‌ ಮಾಡಿ ಗೋಲು ಬಾರಿಸಿದರು. ಫ್ರಾನ್ಸ್ ಗೋಲ್‌ಕೀಪರ್‌ ಹ್ಯೂಗೊ ಲಾರಿಸ್‌ ಮೇಲಕ್ಕೆ ನೆಗೆದರೂ ಚೆಂಡು ಗುರಿ ಸೇರಿತು.

ಹಿನ್ನೆಡೆಯಿಂದ ಫ್ರಾನ್ಸ್ ಕಂಗಾಲು

ಫ್ರಾನ್ಸ್‌ ತಾನಾಡಿದ ಕಳೆದ 20 ಪಂದ್ಯಗಳಲ್ಲಿ 19ರಲ್ಲೂ ಮೊದಲ ಅವಧಿಯಲ್ಲಿ ಎದುರಾಳಿಗೆ ಗೋಲು ಬಿಟ್ಟುಕೊಟ್ಟಿರಲಿಲ್ಲ. ಆದರೆ ಜರ್ಮನಿಗೆ ಆರಂಭದಲ್ಲೇ ಗೋಲು ಬಿಟ್ಟುಕೊಟ್ಟು ನಿರಾಸೆ ಅನುಭವಿಸಿತು. ಲೀಗ್ ಹಂತದಲ್ಲಿ ಫ್ರಾನ್ಸ್ ಆರಂಭಿಕ ಮುನ್ನಡೆ ಹೆಚ್ಚಿನ ಗೋಲು ಗಳಿಕೆ ಮೂಲಕ ಗಮನ ಸೆಳೆದಿತ್ತು. ಆದರೆ, ಈ ಪಂದ್ಯದಲ್ಲಿ ಜರ್ಮನ್ನರ ಮುಂದೆ ಮಂಕಾದರು.

ಉತ್ತಮ ಅವಕಾಶ ಕಳೆದು ಕೊಂಡ ಫ್ರಾನ್ಸ್

ಫ್ರಾನ್ಸ್‌ ಸಮಬಲದ ಗೋಲಿಗಾಗಿ ಸತತ ಪ್ರಯತ್ನ ನಡೆಸಿ ಪದೇ ಪದೇ ದಾಳಿ ನಡೆಸಿತು. ಮೇಲಿಂದ ಮೇಲೆ ಪ್ರಯತ್ನಿಸಿದ ಕಾರಣ ಪಂದ್ಯದ ಕಾವು ಹೆಚ್ಚಿತು. 34ನೇ ನಿಮಿಷ ದಲ್ಲಿ ಫ್ರಾನ್ಸ್‌ಗೆ ಸಮಬಲದ ಗೋಲು ಗಳಿಸುವ ಸೊಗಸಾದ ಅವಕಾಶ ಲಭಿಸಿತ್ತು. ಆದರೆ, ಗೋಲು ಗಳಿಸುವಲ್ಲಿ ವಿಫಲವಾಯಿತು.

ಗೋಲು ಗಳಿಸಲು ವಿಫಲರಾದ ಬೆಂಜೆಮಾ

ಗ್ರಿಜ್‌ಮನ್‌ ನೀಡಿದ ಪಾಸ್‌ನಲ್ಲಿ ವಲ್ಬುಯೆನಾ ಚೆಂಡನ್ನು ಗುರಿಯತ್ತ ಒದ್ದರು. ಜರ್ಮನಿ ಗೋಲ್‌ಕೀಪರ್‌ ಮ್ಯಾನುಯೆಲ್‌ ನುಯೆರ್‌ ತಮ್ಮ ಎಡಭಾಗಕ್ಕೆ ನೆಗೆದು ಆಕರ್ಷವಾಗಿ ತಡೆದರು. ರಿಬೌಂಡ್‌ ಆಗಿ ಬಂದ ಚೆಂಡನ್ನು ಮತ್ತೆ ಗೋಲು ಬಾರಿಸಲು ಬೆಂಜೆಮಾ ವಿಫಲರಾದರು.

ಮತ್ತೆ ತಡೆಗೋಡೆಯಾದ ಮ್ಯಾನುಯೆಲ್ ನುಯೆರ್

44ನೇ ನಿಮಿಷದಲ್ಲಿ ಬೆಂಜೆಮಾ ನಡೆಸಿದ ಪ್ರಯತ್ನಕ್ಕೆ ಫಲ ಕಾಣಲಿಲ್ಲ. ಪಾಲ್‌ ಪೋಗ್ಬಾ ನೀಡಿದ ಪಾಸ್‌ನಲ್ಲಿ ಚೆಂಡನ್ನು ನಿಯಂತ್ರಣಕ್ಕೆ ಪಡೆದು ಅಂಗಳದ ಎಡಭಾಗದಿಂದ ನುಗ್ಗಿದ ಬೆಂಜೆಮಾ ಇಬ್ಬರು ಡಿಫೆಂಡರ್‌ಗಳನ್ನು ತಪ್ಪಿಸಲು ಯಶಸ್ವಿಯಾದರು. ಆದರೆ ಗೋಲ್‌ಕೀಪರ್‌ ನುಯೆರ್‌ ಅವರನ್ನು ವಂಚಿಸಲು ವಿಫಲರಾದರು. ಪಂದ್ಯದ ಮೊದಲ ಅವಧಿ ಕೊನೆಗೊಂಡಾಗ ಜರ್ಮನಿ ಗೋಲಿನ ಮುನ್ನಡೆ ಪಡೆದು ಗೆಲುವು ಸಾಧಿಸಿತು.

ವಿಶ್ವಕಪ್ ನಲ್ಲಿ ಜರ್ಮನಿ ಭರ್ಜರಿ ಸಾಧನೆ

ವಿಶ್ವಕಪ್ ನಲ್ಲಿ ಒಟ್ಟಾರೆ 13 ನೇ ಬಾರಿ ಹಾಗೂ 2002ರಿಂದ ಸತತ ನಾಲ್ಕನೇ ಬಾರಿ ಜರ್ಮನಿ ತಂಡ ಸೆಮಿಸ್ ಪ್ರವೇಶಿಸಿದೆ. ಜು.8 ರಂದು ಬ್ರೆಜಿಲ್ ತಂಡವನ್ನು ಎದುರಿಸಲಿದೆ.