ಐಎಸ್‌ಎಲ್‌: ಗೋವಾಕ್ಕೆ ಆಘಾತವಿತ್ತ ಬೆಂಗಳೂರು ಅಗ್ರ ಸ್ಥಾನಕ್ಕೆ ಲಗ್ಗೆ!

ಅವಕಾಶ ವಂಚಿತ ಛೆಟ್ರಿ

ಸುನಿಲ್ ಛೆಟ್ರಿಗೆ ಎರಡು ಬಾರಿ ಗೋಲು ಗಳಿಸುವ ಅವಕಾಶ ಸಿಕ್ಕಿತಾದರೂ ಹೊಂದಾಣಿಕೆಯ ಆಟಗಾರ ಮಿಕು ಇಲ್ಲದಿರುವುದು ಅಲ್ಲಿ ಸ್ಪಷ್ಟವಾಗಿತ್ತು. ಬಹಳ ದಿನಗಳ ಬಿಡುವಿದ್ದ ಕಾರಣ ಆಟಗಾರರು ಪಂದ್ಯಕ್ಕೆ ಹೊಂದಿಕೊಳ್ಳಲು ಕೆಲವು ಸಮಯ ಬೇಕಾಯಿತು. ಗೋವಾ ಆರಂಭದಲ್ಲೇ ಮುನ್ನಡೆಯ ಅವಕಾಶ ಕಂಡಿತ್ತು. ಗುರ್‌ಪ್ರೀತ್ ಸಿಂಗ್ ಸಂಧೂ ಅವರು ಗೋಲ್‌ಕೀಪಿಂಗ್‌ನಲ್ಲಿ ಮಿಂಚದೇ ಇರುತ್ತಿದ್ದರೆ ಗೋವಾ ಎರಡು ಗೋಲುಗಳನ್ನು ನಿರಾಯಾಸವಾಗಿ ಗಳಿಸಿರುತ್ತಿತ್ತು. 28ನೇ ನಿಮಿಷದಲ್ಲಿ ಸುನಿಲ್ ಛೆಟ್ರಿಗೆ ಗೋಲು ಗಳಿಸುವ ಅವಕಾಶ ಉತ್ತಮವಾಗಿತ್ತು. ಆದರೆ ಅವಕಾಶ ಕೈ ತಪ್ಪಿತು.

ಬಲಿಷ್ಠರ ಮುಖಾಬಲ

ಇಂಡಿಯನ್ ಸೂಪರ್ ಲೀಗ್‌ನ 36ನೇ ಪಂದ್ಯದಲ್ಲಿ ಲೀಗ್‌ನ ಬಲಿಷ್ಠ ತಂಡಗಳಾದ ಗೋವಾ ಹಾಗೂ ಬೆಂಗಳೂರು ತಂಡಗಳು ಮುಖಾಮುಖಿಯಾದವು. ಈ ಪಂದ್ಯದ ಬಗ್ಗೆ ಇಂಡಿಯನ್ ಸೂಪರ್ ಲೀಗ್‌ನಲ್ಲಿ ಸಾಕಷ್ಟು ಕುತೂಹಲ ಮನೆ ಮಾಡಿದೆ. ಅಂಕಪಟ್ಟಿಯಲ್ಲಿ ಅಗ್ರ ಸ್ಥಾನದಲ್ಲಿರುವ ಎರಡು ತಂಡಗಳ ಮುಖಾಮುಖಿ ಇದಾಗಿತ್ತು. ಇದು ಅಂಕಪಟ್ಟಿಯಲ್ಲಿ ಅಗ್ರ ಸ್ಥಾನಕ್ಕೇರಲು ನಡೆಯುತ್ತಿರುವ ಹೋರಾಟ.

ಬೆಂಗಳೂರು ಸಂಘಟಿತ ಹೋರಾಟ

ಗೋವಾ ಈಗಾಗಲೇ ಅಗ್ರ ಸ್ಥಾನದಲ್ಲಿದ್ದರೆ, ಬೆಂಗಳೂರು ಇಲ್ಲಿ ಗೆದ್ದು ಅಗ್ರ ಸ್ಥಾನಕ್ಕೇರುವ ಗುರಿ ಹೊಂದಿತ್ತು. ಫೆರಾನ್ ಕೊರೊಮಿನಾಸ್ ಅವರನ್ನೇ ನಂಬಿರುವ ಗೋವಾ, ಅವರ ಅನುಪಸ್ಥಿತಿಯಲ್ಲಿ ಹೀನಾಯ ಸೋಲನುಭವಿಸಿರುವುದನ್ನು ಮರೆಯುವಂತಿಲ್ಲ. ಬೆಂಗಳೂರು ತಂಡ ಸಂಘಟಿತ ಹೋರಾಟ ನೀಡುತ್ತಿದ್ದು, ಯಾವುದೇ ಒಬ್ಬ ಆಟಗಾರನ ಮೇಲೆ ಅವಲಂಬಿಸಿಲ್ಲ. ಬೆಂಗಳೂರಿನ ಡಿಫೆನ್ಸ್ ವಿಭಾಗ ಇತ್ತೀಚಿನ ಪಂದ್ಯಗಳಲ್ಲಿ ಸಡಿಲವಾಗಿರುವುದು ಸ್ಪಷ್ಟವಾಗಿತ್ತು.

ಮಿಕು ಗೈರು ಅಚ್ಚರಿ

ಮಿಕು ಅವರು ಪಂದ್ಯದಲ್ಲಿ ಗೈರಾಗಿರುವುದು ಅಚ್ಚರಿ ಮೂಡಿಸಿತ್ತು. ಸುನಿಲ್ ಛೆಟ್ರಿ ಹಾಗೂ ಮಿಕು ಅವರ ಹೊಂದಾಣಿಕೆಯ ಆಟ ಬೆಂಗಳೂರು ತಂಡದ ಜಯಕ್ಕೆ ಪ್ರಮುಖ ಕಾರಣವಾಗಿತ್ತು. ಗೋವಾ ತಂಡದ ರಕ್ಷಣಾಕೋಟೆಯನ್ನು ಮುರಿಯಲು ಹಾಗೂ ಆಕ್ರಮಣಕಾರಿ ಆಟವನ್ನು ನಿಯಂತ್ರಿಸಲು ಮಿಕು ಅವರ ಜಾಣ್ಮೆಯ ಆಟದ ಅಗತ್ಯವಿದೆ. ಅವರ ಅನುಪಸ್ಥಿತಿ ತಂಡದ ಲಿತಾಂಶದ ಮೇಲೆ ಪರಿಣಾಮ ಬೀರದಂತೆ ಬೆಂಗಳೂರು ಆಡಬೇಕಾಗಿದೆ.