ಐಎಸ್‌ಎಲ್: ನಾರ್ಥ್‌ಈಸ್ಟ್‌ಗೆ ಸೋಲುಣಿಸಿದ ಎಟಿಕೆ ಮೋಹನ್ ಬಾಗನ್

ಕುತೂಹಲದ ಪಂದ್ಯ

ಹೀರೋ ಇಂಡಿಯನ್ ಸೂಪರ್ ಲೀಗ್ ನ ಸೂಪರ್ ಸಂಡೆಯಲ್ಲಿ ಎಟಿಕೆ ಮೋಹನ್ ಬಾಗನ್ ಮತ್ತು ನಾರ್ಥ್ ಈಸ್ಟ್ ಯುನೈಟೆಡ್ ತಂಡಗಳು ಮುಖಾಮುಖಿಯಾದವು. ಇಲ್ಲಿ ಜಯ ಗಳಿಸಿದರೆ ಎಟಿಕೆ ಅಂಕಪಟ್ಟಿಯಲ್ಲಿ ಅಗ್ರಸ್ಥಾನ ತಲುಪಲಿದೆ. ಚೆನ್ನೈಯಿನ್ ಎಫ್ ಸಿ ವಿರುದ್ಧ ಗೋಲಿಲ್ಲದ ಡ್ರಾ ಕಂಡ ಬಳಿಕ ಎಟಿಕೆ ಈ ಪಂದ್ಯಕ್ಕೆ ಪ್ರವೇಶಿಸಿತು.

ಗೋಲ್‌ಕೀಪಿಂಗ್‌ನಲ್ಲಿ ಅರಿಂದಂ ಭಟ್ಟಾಚಾರ್ಯ ಮಿಂಚು

ಆಂಟೋನಿಯೋ ಹಬ್ಬಾಸ್ ಪಡೆ 6 ಪಂದ್ಯಗಳಲ್ಲಿ ಕ್ಲೀನ್ ಶೀಟ್ ಸಾಧನೆ ಮಾಡಿದೆ. ಇದರೊಂದಿಗೆ ಭಾರತದ ಗೋಲ್ ಕೀಪರ್ ಅರಿಂದಂ ಭಟ್ಟಾಚಾರ್ಯ ಗೋಲ್ಟನ್ ಗ್ಲೋವ್ ಪ್ರಶಸ್ತಿಗೆ ಮುಂಚೂಣಿಯಲ್ಲಿದ್ದಾರೆ. ಕಳೆದ ಎರಡು ಪಂದ್ಯಗಳಲ್ಲಿ ತಂಡದ ಸ್ಟಾರ್ ಆಟಗಾರ ರಾಯ್ ಕೃಷ್ಣ ಗೋಲು ಗಳಿಸುವಲ್ಲಿ ವಿಫಲರಾಗಿದ್ದಾರೆ. ಆದರೆ ತಂಡ ಗಳಿಸಿರುವ 8 ಗೋಲುಗಳಲ್ಲಿ ಕೃಷ್ಣ ಅವರು 5 ನ್ನು ತಮ್ಮ ಹೆಸರಿನಲ್ಲಿ ದಾಖಲಿಸಿಕೊಂಡಿದ್ದಾರೆ. ಎಟಿಕೆ ಮೋಹನ್ ಬಾಗನ್ ಪಡೆ ಪ್ರತಿದಾಳಿ ನೀಡುವಲ್ಲಿ ನಿಸ್ಸೀಮರು. ಆವೇಶದ ಆಟ ಮತ್ತೊಂದು ಅಸ್ತ್ರ.

ನಾರ್ಥ್‌ಈಸ್ಟ್ ಯುನೈಟೆಡ್ ಆಕ್ರಮಣಕಾರಿ ಆಟ

ನಾರ್ಥ್ ಈಸ್ಟ್ ಯುನೈಟೆಡ್ ಕೂಡ ಆಕ್ರಮಣಕಾರಿ ಆಟಕ್ಕೆ ಹೆಸರಾಗಿದೆ. ಪರ್ವತಪ್ರದೇಶದ ತಂಡ ಈ ಬಾರಿ ಲೀಗ್ ನಲ್ಲಿ ಉತ್ತಮ ಆರಂಭ ಕಂಡು ಸ್ಥಿರ ಪ್ರದರ್ಶನ ನೀಡುತ್ತಿದೆ. ತಂಡವು ಇದುವರೆಗೂ ಐದು ಪಂದ್ಯಗಳಲ್ಲಿ ಡ್ರಾ ಸಾಧಿಸಿದೆ. ಯಾವುದೇ ತಂಡವು ಈ ಮೈಲಿಗಲ್ಲನ್ನು ತಲುಪಿಲ್ಲ. ಗೆರಾರ್ಡ್ ನಸ್ ಪಡೆ ಕಳೆದ ನಾಲ್ಕು ಪಂದ್ಯಗಳಲ್ಲಿ ಜಯ ಕಂಡಿಲ್ಲ.

ಅವಕಾಶ ಉಪಯೋಗಿಸಲು ವಿಫಲ

ಅವಕಾಶಗಳನ್ನು ಸದುಪಯೋಗಪಡಿಸಿಕೊಳ್ಳುವಲ್ಲಿ ವಿಫಲವಾಗಿರುವುದು ಮತ್ತು ಪೆನಾಲ್ಟಿಯನ್ನು ಕೈ ಚೆಲ್ಲಿರುವುದು ತಂಡದ ದೌರ್ಬಲ್ಯವಾಗಿದೆ. 4 ಪಂದ್ಯಗಳಲ್ಲಿ 5 ಗೋಲುಗಳನ್ನು ಗಳಿಸಲು ಎದುರಾಳಿ ತಂಡಕ್ಕೆ ನೀಡಿರುವುದು ನಸ್ ಅವರಿಗೆ ಚಿಂತೆಯನ್ನುಂಟು ಮಾಡಿದೆ. ಡಿಫೆನ್ಸ್ ವಿಭಾಗ ನೈಜ ಸಾಮರ್ಥ್ಯ ತೋರಿದರೆ ಎಟಿಕೆಯನ್ನು ಸೋಲಿಸುವುದು ಕಷ್ಟವಲ್ಲ ಎಂಬ ಆತ್ಮವಿಶ್ವಾಸದೊಂದಿಗೆ ತಂಡ ಅಂಗಣಕ್ಕಿಳಿಯಿತು.