ಐಎಸ್‌ಎಲ್: ಸೋತವರ ನಡುವೆ ಗೆಲುವಿಗಾಗಿ ಪೈಪೋಟಿ, ಬಿಎಫ್‌ಸಿಗೆ ನಾರ್ತ್‌ ಈಸ್ಟ್‌ ಸವಾಲು

ಇದು ಹೊಸ ಆರಂಭ

ಕಳೆದ ಬಾರಿ ಈ ಎರಡೂ ತಂಡಗಳು ಮುಖಾಮುಖಿಯಾದ ಸಂದರ್ಭದಲ್ಲಿ ನಾರ್ತ್‌ಈಸ್ಟ್‌ ತಂಡ ಅತ್ಯುತ್ತಮ ಪ್ರದರ್ಶನ ನೀಡುವ ಮೂಲಕ 2-2 ಗೋಲ್‌ಗಳಿಂದ ಪಂದ್ಯವನ್ನು ಡ್ರಾ ಮಾಡಿಕೊಂಡಿತ್ತು. ಟೂರ್ನಿಯಲ್ಲಿ ಒಟ್ಟು 2 ಗೋಲ್‌ಗಳ ಹಿನ್ನಡೆಯಲ್ಲಿದ್ದರೂ ನಾರ್ತ್‌ಈಸ್ಟ್‌ ತಂಡ ಪುಟಿದೇಳಲಿದೆ ಎಂದು ಸಹಾಯಕ ಕೋಚ್ ಅಲಿಸನ್ ಖಾರ್ಸಿನ್ಟೀವ್ ತಿಳಿಸಿದ್ದಾರೆ. "ಬಹುಮುಖ್ಯ ಸಂಗತಿ ಎಂದರೆ ನಾವು ಕೇವಲ ಋಣಾತ್ಮಕ ಸಂಗತಿಗಳ ಕಡೆಗಷ್ಟೇ ಅಲ್ಲ ಧನಾತ್ಮಕ ಸಂಗತಿಗಳ ಬಗ್ಗೆಯೂ ಗಮನ ನೀಡುತ್ತೇವೆ. ಟೂರ್ನಿಯ ಎರಡನೇ ಹಂತದಲ್ಲಿ ನಮ್ಮ ಮೊದಲ ಪಂದ್ಯವನ್ನು ಆಡಲು ಎದುರು ನೋಡುತ್ತಿದ್ದೇವೆ. ಇದು ನಮಗೆ ಹೊಸ ಆರಂಭ. ಆಟಗಾರರು ಒಂದು ತಂಡವಾಗಿ ಉತ್ತಮ ಪ್ರದರ್ಶನ ನೀಡುತ್ತಾರೆ ಎಂಬ ವಿಶ್ವಾಸ ನಮಗಿದೆ," ಎಂದು ಅಲಿಸನ್ ಹೇಳಿದ್ದಾರೆ.

ಕೋಚ್ ಬದಲಾದರೂ ಸೋಲು

ಬಿಎಫ್‌ಸಿ ಹ್ಯಾಟ್ರಿಕ್‌ ಸೋಲುಂಡ ಬಳಿಕ ಕೋಚ್‌ ಕಾರ್ಲೋಸ್‌ ಕೌಡಾರ್ಟ್‌ ತಮ್ಮ ಸ್ಥಾನದಿಂದ ಕೆಳಗಿಳಿದರು. ಹೀಗಾಗಿ ಎಸ್‌ಸಿ ಈಸ್ಟ್‌ ಬೆಂಗಾಲ್‌ ವಿರುದ್ಧದ ಪಂದ್ಯಕ್ಕೆ ಬಿಎಫ್‌ಸಿ ಮಧ್ಯಂತರ ಕೋಚ್‌ ನೌಶದ್‌ ಮೂಸಾ ಅವರ ಮಾರ್ಗದರ್ಶನದಲ್ಲಿ ಕಣಕ್ಕಿಳಿದಿತ್ತು. ಆದರೆ, 0-1 ಗೋಲ್‌ಗಳ ಸೋಲು ಎದುರಾಯಿತು. ಆದರೂ ಧನಾತ್ಮಕ ಸಂಗತಿ ಎಂದರೆ ಮೂಸಾ ತಂಡದ ಆಟಗಾರರಲ್ಲಿ ತಮ್ಮ ರಣತಂತ್ರದ ಬಗ್ಗೆ ಸರಿಯಾದ ಮಾಹಿತಿ ನೀಡಿರುವುದು.

ಬಿಎಫ್‌ಸಿಗೆ ಕಠಿಣ ಪೈಪೋಟಿ

"ಈಸ್ಟ್‌ ಬೆಂಗಾಲ್‌ ವಿರುದ್ಧದ ಪಂದ್ಯಕ್ಕೂ ಮುನ್ನ ಫಲಿತಾಂಶದ ಬಗ್ಗೆ ತಲೆ ಕೆಡಿಸಿಕೊಳ್ಳಬೇಡಿ ಎಂದೇ ಸಂದೇಶ ನೀಡಿದ್ದೆವು. ಅದೇನೇ ಆದರೂ ನಾವು ಶೇ. 100ರಷ್ಟು ಪ್ರಯತ್ನ ಮಾಡಿದ್ದೇವೆ. ಖಂಡಿತಾ ಗೆಲುವು ಬಹಳಾ ಮುಖ್ಯ. ಆದರೆ ಕಳೆದ ಪಂದ್ಯದಲ್ಲಿ ನಮ್ಮ ಯೋಜನೆಗೆ ತಕ್ಕಂತೆ ಆಡುವುದು ಮುಖ್ಯವಾಗಿತ್ತು. ಆಟಗಾರರಲ್ಲಿ ಇದರ ಬಗ್ಗೆ ಆತ್ಮವಿಶ್ವಾಸ ಬರಬೇಕು. ಅದನ್ನು ತರಿಸುವಲ್ಲಿ ಸಫಲನಾಗಿದ್ದೇನೆ. ಇದು ಮುಂದಿನ ಪಂದ್ಯದಲ್ಲಿ ನೆರವಾಗಲಿದೆ," ಎಂದು ಮೂಸಾ ಹೇಳಿದ್ದಾರೆ. ಇದೇ ವೇಳೆ ಹೈಲ್ಯಾಂಡರ್ಸ್‌ ತಂಡ ಬಿಎಫ್‌ಸಿ ತಂಡಕ್ಕೆ ಈ ಬಾರಿ ಕಠಿಣ ಪೈಪೋಟಿ ನೀಡಲಿದೆ ಎಂದು ಮೂಸಾ ಅಭಿಪ್ರಾಯ ಪಟ್ಟಿದ್ದಾರೆ.

ಗೆಲುವಿಗಾಗಿ ಶತಪ್ರಯತ್ನ

"ನಾರ್ತ್‌ಈಸ್ಟ್‌ ತಂಡದ ಪಂದ್ಯಗಳನ್ನು ನೋಡಿದ್ದೇನೆ. ಅವರದ್ದು ಕೆಟ್ಟ ತಂಡವೇನಲ್ಲ. ಅವರ ಎದುರು ಈ ಹಿಂದೆ ನಾವು ಆಡಿದಾಗ 2-2 ಗೋಲ್‌ಗಳ ಡ್ರಾ ಸಾಧಿಸಿದ್ದೆವು. ಆ ತಂಡ ಪ್ರತಿ ಹೋರಾಟ ನಡೆಸುವುದರಲ್ಲಿ ಎತ್ತಿದ ಕೈ. ಹೀಗಾಗಿ ಇಲ್ಲಿ ಹಗುರವಾಗಿ ತೆಗೆದುಕೊಳ್ಳುವ ಪ್ರಶ್ನೆಯೇ ಇಲ್ಲ. ನಮ್ಮ ಆಟಗಾರರಿಗೆ ತಮ್ಮ ಜವಾಬ್ದಾರಿಗಳ ಬಗ್ಗೆ ಅರಿವಿದೆ. ಈಗ ನಮ್ಮ ಕೈಲಿ 10 ಪಂದ್ಯಗಳಿವೆ. ಉತ್ತಮ ಆರಂಭ ಪಡೆಯಲು ನಾರ್ತ್‌ಈಸ್ಟ್‌ ವಿರುದ್ಧ ಗೆಲ್ಲುವ ಪ್ರಯತ್ನ ಮಾಡಲಿದ್ದೇವೆ," ಎಂದಿದ್ದಾರೆ.