ಭಾರತ ಫುಟ್ಬಾಲ್‌ ತಂಡಕ್ಕೆ ನೂತನ ಕೋಚ್‌ ನೇಮಕ, ಛೆಟ್ರಿ ಅಭಿಪ್ರಾಯ ಹೀಗಿದೆ

ಹೊಸದಿಲ್ಲಿ, ಮೇ 15: ಭಾರತ ಫುಟ್ಬಾಲ್‌ ತಂಡದ ಪರ ಸಾರ್ವಕಾಲಿಕ ಅತಿ ಹೆಚ್ಚು ಗೋಲ್‌ ಗಳಿಸಿರುವ ಆಟಗಾರ ಹಾಗೂ ನಾಯಕ ಸುನಿಲ್‌ ಛೆಟ್ರಿ, ಭಾರತ ತಂಡದ ನೂತನ ಕೋಚ್‌ ಇಟಲಿಯ ಇಗೋರ್‌ ಸ್ಟಿಮಾಕ್‌ ಬಗ್ಗೆ ಮೆಚ್ಚುಗೆಯ ಸುರಿಮಳೆ ಹರಿಸಿದ್ದಾರೆ.

ಕ್ರೊಯೇಷ್ಯಾ ಪರ ಆಡಿದ ಅನುಭವ ಹೊಂದಿರುವ ಇಗೋರ್‌ ಸ್ಟಿಮಾಕ್‌ ಬುಧವಾರ ಭಾರತ ತಂಡದ ನೂತನ ಕೋಚ್‌ ಆಗಿ ನೇಮಗೊಂಡಿದ್ದಾರೆ. ಸ್ಟಿಮಾಕ್‌ ಅವರಲ್ಲಿ ಫುಟ್ಬಾಲ್‌ ಕುರಿತಾದ ಅಪಾರ ಜ್ಞಾನವಿದ್ದು, ಆಟಗಾರರು ಇದರ ಪ್ರಯೋಜನ ಹೇಗೆ ಪಡೆದುಕೊಳ್ಳುತ್ತಾರೆ ಎಂಬುದು ಪ್ರಮುಖವಾಗುತ್ತದೆ ಎಂದು ನಾಯಕ ಛೆಟ್ರಿ ಅಭಿಪ್ರಾಯ ಪಟ್ಟಿದ್ದಾರೆ.

"ಇಗೋರ್‌ ನಮ್ಮೆದುರು ಹೆಚ್ಚು ಅನುಭವವನ್ನು ತಂದಿಡುವಂತಹ ಕೋಚ್‌. ಅವರೊಟ್ಟಿಗೆ ಕೆಲಸ ಮಾಡುವುದನ್ನು ಕಾತುರದಿಂದ ಎದುರು ನೋಡುತ್ತಿದ್ದೇನೆ. ಅಂದಹಾಗೆ ರಾಷ್ಟ್ರೀಯ ತಂಡಕ್ಕೆ ಇಂದು ಹಲವು ಯುವ ಪ್ರತಿಭೆಗಳು ಬರುತ್ತಿದ್ದಾರೆ. ಹೀಗಾಗಿ ಕೋಚ್‌ ಅವರಲ್ಲಿನ ಅನುಭವ ನಮ್ಮೆಲ್ಲರ ನೆರವಿಗೆ ಬರಲಿದೆ,'' ಎಂದು ಭಾರತ ತಂಡದ ನಾಯಕ ಹೇಳಿದ್ದಾರೆ.

"ಅವರಲ್ಲಿನ ಅನುಭವವೇ ಎಲ್ಲವನ್ನೂ ಹೇಳುತ್ತದೆ. ಅದರ ಲಾಭ ಪಡೆದುಕೊಳ್ಳುವುದು ನಮ್ಮೆಲ್ಲರ ಮೇಲಿದೆ. ದೊಡ್ಡ ದೊಡ್ಡ ವೇದಿಕೆಗಳಲ್ಲಿ ಅವರು ತಮ್ಮನ್ನು ಗುರುತಿಸಿಕೊಂಡಿದ್ದಾರೆ. ಇದರಿಂದ ನಮ್ಮ ತಂಡ ಪ್ರದರ್ಶನ ಮಟ್ಟ ಹೆಚ್ಚಾಗಲಿದೆ ಎಂಬುದು ಅವರಿಗೆ ತಿಳಿದಿದೆ. ಭಾರತ ತಂಡ ಅವರು ನಿರ್ವಹಿಸಿರುವ ಈ ಹಿಂದಿನ ಎಲ್ಲಾ ತಂಡಗಳಿಗಿಂತಲೂ ವಿಭಿನ್ನವಾದದ್ದು,'' ಎಂದಿದ್ದಾರೆ.

ಇದೇ ವೇಳೆ ಫೆಡರೇಷನ್‌, ಆಟಗಾರರು ಮತ್ತು ಕೋಚ್‌ ಎಲ್ಲರ ಉದ್ದೇಶವು ಭಾರತ ತಂಡವನ್ನು ಪ್ರಗತಿಯ ಹಾದಿಯಲ್ಲಿ ಸಾಗುವಂತೆ ಮಾಡುವುದಾಗಿದೆ ಎಂದು ಸುನಿಲ್‌ ತಮ್ಮ ಅಭಿಪ್ರಾಯ ವ್ಯಕ್ತಪಡಿಸಿದ್ದಾರೆ.

"ಫೆಡರೇಷನ್‌ (ಎಐಎಫ್‌ಎಫ್‌), ಭಾರತ ತಂಡವನ್ನು ಪ್ರಗತಿಯ ಪಥದಲ್ಲಿ ಸಾಗುವಂತೆ ಮಾಡುವ ಉದ್ದೇಶದಿಂದ ನೂತನ ಕೋಚ್‌ ನೇಮಕ ಮಾಡಿದೆ. ಇದು ಫೆಡರೇಷನ್‌ನ, ಆಟಗಾರ ಹಾಗೂ ಕೋಚ್‌ನ ಗುರಿ ಕೂಡ. ನೂತನ ಕೋಚ್‌ನೊಂದಿಗೆ ತಂಡವನ್ನು ಸಾಧ್ಯವಾದಷ್ಟು ಮುಂದಕ್ಕೆ ಕೊಂಡೊಯ್ಯಲು ಪ್ರಯತ್ನಿಸಲಿದ್ದೇವೆ,'' ಎಂದು ಛೆಟ್ರಿ ಹೇಳಿದ್ದಾರೆ.