ಪ್ರೊ ಕಬಡ್ಡಿ ಲೀಗ್ 2023: ಈ ಬಾರಿ ಕಣದಲ್ಲಿರುವ ಕನ್ನಡಿಗ ಆಟಗಾರರು; ಬೆಂಗಳೂರು ಬುಲ್ಸ್‌ನಲ್ಲಿ ಯಾರು?

ಕಳೆದ ಒಂದೂವರೆ ತಿಂಗಳ ಕಾಲ 2023ರ ಏಕದಿನ ಕ್ರಿಕೆಟ್ ವಿಶ್ವಕಪ್​ನ ಮನರಂಜನೆ ಅನುಭವಿಸಿದ ಕ್ರೀಡಾಭಿಮಾನಿಗಳಿಗೆ, ಇದೀಗ ದೇಸಿ ಕ್ರೀಡೆ ಕಬಡ್ಡಿಯನ್ನು ಕಣ್ತುಂಬಿಕೊಳ್ಳುವ ಅವಕಾಶ ಬಂದಿದೆ.

ಡಿಸೆಂಬರ್ 2ರಿಂದ 10ನೇ ಆವೃತ್ತಿಯ 2023ರ ಪ್ರೊ ಕಬಡ್ಡಿ ಲೀಗ್ ಪಂದ್ಯಾವಳಿಗೆ ಅಹಮದಾಬಾದ್‌ನಲ್ಲಿ ಚಾಲನೆ ಸಿಕ್ಕಿದ್ದು, ಪ್ರತಿ ವರ್ಷದಂತೆ ಈ ವರ್ಷವೂ ರೋಚಕ ಪೈಪೋಟಿ ನೀಡಲು ಸಜ್ಜಾಗಿ ಬಂದಿದೆ.

ಡಿಸೆಂಬರ್ 2ರಿಂದ 2024ರ ಫೆಬ್ರವರಿ 21ರವವರೆಗೂ ಅಂದರೆ, ಬರೊಬ್ಬರಿ ಮೂರು ತಿಂಗಳ ಕಾಲ ನಡೆಯಲಿರುವ ಕಬಡ್ಡಿ ಲೀಗ್​ ಭರಪೂರ ಮನರಂಜನೆ ಹೊತ್ತು ತಂದಿದೆ. ಇದರ ಜೊತೆಗೆ ಸಾಕಷ್ಟು ಕುತೂಹಲ ಮೂಡಿಸಲಿದೆ. ಕೊರೊನಾ ಬಳಿಕ ಒಂದೇ ಸ್ಥಳದಲ್ಲಿ ಆಯೋಜಿಸಲಾಗಿದ್ದ ಟೂರ್ನಿ, ಕಳೆದ ಬಾರಿ ಮೂರು ತಾಣಗಳಲ್ಲಿ ಆಯೋಜಿಸಲಾಗಿತ್ತು.

ಈ ಬಾರಿಯ ಪಂದ್ಯಾವಳಿ ತವರು ಮತ್ತು ಎದುರಾಳಿ ತಂಡದ ಅಂಗಳದಲ್ಲಿ ಆಡಲು ಮರಳಲಿದೆ. 12 ಫ್ರಾಂಚೈಸಿಗಳು ತಮ್ಮ ತವರಿನ ಮೈದಾನಗಳಲ್ಲಿ ಸೆಣಸಾಟ ನಡೆಸಲಿವೆ.

12 ತಂಡಗಳು ಡಬಲ್ ರೌಂಡ್ ರಾಬಿನ್ ಮಾದರಿಯಲ್ಲಿ ತಲಾ 22 ಪಂದ್ಯಗಳನ್ನು ಆಡಲಿವೆ. ಅಂಕಪಟ್ಟಿಯ 6 ತಂಡಗಳು ಪ್ಲೇ ಆಫ್​ಗೆ ಅರ್ಹತೆ ಪಡೆಯಲಿವೆ.

ಈ ಬಾರಿಯ ಕಬಡ್ಡಿ ಲೀಗ್​ನಲ್ಲಿ 7 ಕನ್ನಡಿಗರು ಆಡುತ್ತಿದ್ದು, ರಾಜ್ಯದ ವಿವಿಧ ಭಾಗದ ನಿವಾಸಿಗಳಾದ ಇವರೆಲ್ಲರೂ ದಕ್ಷಿಣ ಕನ್ನಡದಲ್ಲಿ ತರಬೇತಿ ಪಡೆದು, ಅಭ್ಯಾಸ ಮಾಡಿದ್ದಾರೆ.

ಒಟ್ಟು 7 ಕನ್ನಡಿಗ ಕಬಡ್ಡಿ ಆಟಗಾರರು ಪಿಕೆಎಲ್ ಕಣದಲ್ಲಿ

ಬಹು ನಿರೀಕ್ಷಿತ ಪ್ರೊ ಕಬಡ್ಡಿ ಲೀಗ್​ನಲ್ಲಿ ಒಟ್ಟು 7 ಕರ್ನಾಟಕದ ಆಟಗಾರರು ಕಣಕ್ಕಿಳಿಯಲು ಸಜ್ಜಾಗಿದ್ದಾರೆ. ಅವರೆಂದರೆ,

ಪ್ರಪಂಚನ್ - ಹರಿಯಾಣ ಸ್ಟೀಲರ್ಸ್
ರಕ್ಷಿತ್ - ಬೆಂಗಳೂರು ಬುಲ್ಸ್ - ರೈಟ್ ಕವರ್ ಡಿಫೆಂಡರ್
ಶಶಾಂಕ್ - ಜೈಪುರ್ ಪಿಂಕ್ ಪ್ಯಾಂಥರ್ಸ್ - ರೈಡರ್
ಅಭಿಷೇಕ್ - ಜೈಪುರ್ ಪಿಂಕ್ ಪ್ಯಾಂಥರ್ಸ್ - ಲೆಫ್ಟ್ ಕವರ್ ಡಿಫೆಂಡರ್
ರಂಜಿತ್ - ಪಾಟ್ನಾ ಪೈರೆಟ್ಸ್ - ರೈಡರ್
ವಿಶ್ವಾಸ್ - ಬೆಂಗಾಲ್ ವಾರಿಯರ್ಸ್ - ರೈಡರ್
ಗಗನ್ - ಯುಪಿ ಯೋಧಾಸ್ - ರೈಡರ್

ಇನ್ನು ಕರ್ನಾಟಕದ ಬಿಸಿ ರಮೇಶ್ ಅವರು ಪುಣೇರಿ ಪಲ್ಟಾನ್ ತಂಡದ ಮುಖ್ಯ ಕೋಚ್ ಆಗಿದ್ದಾರೆ. ಜೀವಕುಮಾರ್ ಯು ಮುಂಬಾ ತಂಡದ ಸಹಾಯಕ ಕೋಚ್​ ಸೇವೆ ಸಲ್ಲಿಸುತ್ತಿದ್ದಾರೆ.

ಬೆಂಗಳೂರು ಬುಲ್ಸ್ ತಂಡವು ಭಾನುವಾರ, ಡಿಸೆಂಬರ್ 4ರಂದು ನಡೆದ ನಾಲ್ಕನೇ ಪಂದ್ಯದಲ್ಲಿ ಆತಿಥೇಯ ಗುಜರಾತ್ ಜೈಂಟ್ಸ್ ತಂಡದ ವಿರುದ್ಧ 34-31 ಅಂತರದಿಂದ ಸೋಲು ಕಂಡು ಅಭಿಯಾನ ಆರಂಭಿಸಿತು.

ಪಿಕೆಎಲ್ 10: ಒಟ್ಟು 12 ಚರಣಗಳು

ಅಹಮದಾಬಾದ್: ಡಿಸೆಂಬರ್ 2ರಿಂದ 7ರವರೆಗೆ

ಬೆಂಗಳೂರು: ಡಿಸೆಂಬರ್ 8ರಿಂದ 13ರವರೆಗೆ

ಪುಣೆ: ಡಿಸೆಂಬರ್ 15ರಿಂದ 20ರವರೆಗೆ

ಚೆನ್ನೈ: ಡಿಸೆಂಬರ್ 22ರಿಂದ 27ರವರೆಗೆ

ನೋಯ್ಡಾ: ಡಿಸೆಂಬರ್ 29ರಿಂದ ಜನವರಿ 3ರವರೆಗೆ

ಮುಂಬೈ: ಜನವರಿ 5ರಿಂದ 10ರವರೆಗೆ

ಜೈಪುರ: ಜನವರಿ 12ರಿಂದ 17ರವರೆಗೆ

ಹೈದರಾಬಾದ್: ಜನವರಿ 19ರಿಂದ 24ರವರೆಗೆ

ಪಾಟ್ನಾ: ಜನವರಿ 26ರಿಂದ 31ರವರೆಗೆ

ದೆಹಲಿ: ಫೆಬ್ರವರಿ 2ರಿಂದ 7ರವರೆಗೆ

ಕೋಲ್ಕತ್ತಾ: ಫೆಬ್ರವರಿ 9ರಿಂದ 14ರವರೆಗೆ

ಪಂಚಕುಲ: ಫೆಬ್ರವರಿ 16ರಿಂದ 21ರವರೆಗೆ