ಪ್ರೊ ಕಬಡ್ಡಿ 2018: ಪಾಟ್ನಾ ಸೋಲಿಸಿ ಪ್ಲೇ ಆಫ್‌ಗೆ ಪ್ರವೇಶಿಸಿದ ಗುಜರಾತ್

ನವದೆಹಲಿ, ಡಿಸೆಂಬರ್ 4: ದೆಹಲಿಯ ತ್ಯಾಗರಾಜ್ ಸ್ಪೋರ್ಟ್ಸ್ ಕಾಂಪ್ಲೆಕ್ಸ್ ನಲ್ಲಿ ಮಂಗಳವಾರ (ಡಿಸೆಂಬರ್ 4) ನಡೆದ ಪ್ರೊ ಕಬಡ್ಡಿ ಪಂದ್ಯದಲ್ಲಿ ಪಾಟ್ನಾ ಪೈರೇಟ್ಸ್ ವಿರುದ್ಧ ಗುಜರಾತ್ ಫಾರ್ಚೂನ್ ಜೈಂಟ್ಸ್ 45-27ರ ಗೆಲುವು ದಾಖಲಿಸಿದೆ. ಈ ಮೂಲಕ ಗುಜರಾತ್ ಪ್ಲೇ ಆಫ್ ಹಂತಕ್ಕೆ ಪ್ರವೇಶ ಗಿಟ್ಟಿಸಿಕೊಂಡಿದೆ.

ಹಾಲಿ ಚಾಂಪಿಯನ್ ಪಾಟ್ನಾ ಈ ಪಂದ್ಯದಲ್ಲಿ ಉತ್ತಮ ಪೈಪೋಟಿ ಪ್ರದರ್ಶಿಸಲಿಲ್ಲ. ತಂಡದ ಯಾವುದೇ ಆಟಗಾರ 5ಕ್ಕಿಂತ ಹೆಚ್ಚಿನ ಅಂಕ ಕದಿಯಲು ವಿಫಲನಾಗಿದ್ದು ಸೋಲಿಗೆ ಕಾರಣವಾಯಿತು. ಪಾಟ್ನಾ ಪರ ಜವಾಹರ್ ದಾಗರ್ 5 ಅಂಕ ಸೇರಿಸಿದರು. ಅದು ಬಿಟ್ಟರೆ ವಿಕಾಸ್ ಜಗ್ಲಾನ್, ದೀಪಕ್ ನರ್ವಾಲ್, ಮನ್ಜೀತ್, ಮನೀಶ್ ತಲಾ 4 ಅಂಕ ಸೇರಿಸಿದರು.

ಗುಜರಾತ್ ಪರ ಸಚಿನ್ ಭರ್ಜರಿ ಆಟದ ಮೂಲಕ ಮಿಂಚಿದರು. 9 ರೈಡ್ ಮತ್ತು 1 ಟ್ಯಾಕ್ಲ್ ಸೇರಿ ಒಟ್ಟು 10 ಅಂಕಗಳನ್ನು ಸಚಿನ್ ತಂಡದ ಖಾತೆಗೆ ನೀಡಿದರು. ಇನ್ನು ಕೆ ಪ್ರಪಂಜನ್ 9, ಪರ್ವೇಶ್ 8 ಅಂಕಗಳ ಕೊಡುಗೆ ಮೂಲಕ ತಂಡವನ್ನು ಬೆಂಬಲಿಸಿದರು.