Asian Games: ಸ್ಕ್ವಾಷ್ ಫೈನಲ್‌ನಲ್ಲಿ ಭಾರತಕ್ಕೆ ಚಿನ್ನದ ಪದಕ: ಪಾಕಿಸ್ತಾನದ ವಿರುದ್ಧ ರೋಚಕ ಗೆಲುವು

ಪುರುಷರ ಸ್ಕ್ವಾಷ್ ತಂಡ ವಿಭಾಗದ ಫೈನಲ್ ಪಂದ್ಯದಲ್ಲಿ ಭಾರತ ಹಾಗೂ ಪಾಕಿಸ್ತಾನ ತಂಡಗಳು ಮುಖಾಮುಖಿಯಾಗಿದ್ದವು. ಈ ಪಂದ್ಯದಲ್ಲಿ ಭಾರತ ಬದ್ಧ ಎದುರಾಳಿ ಪಾಕಿಸ್ತಾನವನ್ನು ಭರ್ಜರಿಯಾಗಿ ಮಣಿಸಿದ್ದು ಚಿನ್ನದ ಪದಕವನ್ನು ಗೆದ್ದುಕೊಂಡಿದೆ. ಸೌರವ್ ಘೋಷಾಲ್, ಅಭಯ್ ಸಿಂಗ್ ಮತ್ತು ಮಹೇಶ್ ಮಂಗಾವ್‌ಂಕರ್ ಅವರನ್ನು ಒಳಗೊಂಡ ತಂಡ ರೋಚಕ ಸೆಣೆಸಾಟದಲ್ಲಿ ಗೆದ್ದು ಬೀಗಿದೆ.

ಮೊದಲ ಗೇಮ್‌ನಲ್ಲಿ ಸೋಲು ಅನುಭವಿಸಿದ ಭಾರತೀಯ ತಂಡ 0-1 ಅಂತರದಿಂದ ಹಿನ್ನಡೆಯಲ್ಲಿತ್ತು. ಆದರೆ ಸೌರವ್ ಘೋಷಾಲ್ ಭಾರತದ ಕಮ್‌ಬ್ಯಾಕ್‌ಗೆ ಕಾರಣವಾದರು. ಇನ್ನು ನಿರ್ಣಾಯಕ ಘಟ್ಟದಲ್ಲಿ ಅದ್ಭುತ ಆಟವನ್ನು ಪ್ರದರ್ಶಿಸಿದ ಅಭಯ್ ಸಿಂಗ್ ಗೇಮ್‌ಅನ್ನು 3-2 ಅಂತರದಿಂದ ಗೆದ್ದುಕೊಂಡರು. ಈ ಗೆಲುವಿನಿಂದ ಭಾರತ 2-1 ಅಂಕಗಳ ಅಂತರದಿಂದ ಚಿನ್ನದ ಪದಕ ಗೆದ್ದುಕೊಂಡಿದೆ.

ಮೊದಲ ಗೇಮ್‌ನಲ್ಲಿ ಸೋತ ಭಾರತ ಎರಡನೇ ಗೇಮ್ ಗೆದ್ದು ಸಮಬಲ ಸಾಧಿಸಿತು. ನಂತರ ನಿರ್ಣಾಯಕ ಮೂರನೇ ಗೇಮ್‌ನಲ್ಲಿ ಅಭಯ್ ಸಿಂಗ್ ಪಾಕಿಸ್ತಾನದ ನೂರ್ ಜಮಾನ್ ಅವರನ್ನು ಎದುರಿಸಿದರು. ಈ ಮುಖಾಮುಖಿಯಲ್ಲಿ ಅಭಯ್ ಸಿಂಗ್ 11-7, 9-11, 7-11, 11-9, 12-10 ಗೆದ್ದುಕೊಂಡು ಚಿನ್ನದ ಪದಕವನ್ನು ಖಚಿತಪಡಿಸಿದರು.

ಮೊದಲ ಪಂದ್ಯವನ್ನು 11-8, 11-3, 11-2 ರಲ್ಲಿ ಗೆದ್ದುಕೊಂಡ ನಾಸಿರ್ ಇಕ್ಬಾಲ್ ಭಾರತದ ಮಹೇಶ್ ಮಂಗಾಂವ್ಕರ್ ವಿರುದ್ಧ ಪ್ರಾಬಲ್ಯ ಸಾಧಿಸಿದ್ದರಿಂದ ಆರಂಭಿಕ ಹಿನ್ನಡೆಗೆ ಒಳಗಾಗಿತ್ತು. ನಂತರ ಭಾರತದ ಸೌರವ್ ಘೋಷಲ್ ಪಾಕ್‌ನ ಮುಹಮ್ಮದ್ ಅಸಿಮ್ ಖಾನ್ ಅವರನ್ನು 11-5, 11-1, 11-3 ಅಂತರದಿಂದ ಸೋಲಿಸಿ ಸ್ಪರ್ಧೆಯಲ್ಲಿ 1-1 ಅಂತರದ ಸಮಬಲ ಸಾಧಿಸುವ ಮೂಲಕ ಕಮ್‌ಬ್ಯಾಕ್‌ಗೆ ಕಾರಣವಾದರು.