ಆದಿ ಕೈಲಾಸ ಪರ್ವತವನ್ನು ಯಶಸ್ವಿಯಾಗಿ ಏರಿದ CBTS ತಂಡ; 60 ಮೀಟರ್ ಕೆಳಗೆ ತ್ರಿವರ್ಣ ಧ್ವಜ ಹಾರಿಸಿದ್ದು ಏಕೆ?

ಮೇ 21 ಮಂಗಳವಾರ, ಎತ್ತರದ ಹಿಮಾಲಯ ಪ್ರದೇಶದಲ್ಲಿ ಸಮುದ್ರ ಮಟ್ಟದಿಂದ 5,925 ಮೀಟರ್ ಎತ್ತರದಲ್ಲಿರುವ ಪಿಥೋರಗಢದ ಧಾರ್ಚುಲಾ ಡೆವಲಪ್‌ಮೆಂಟ್ ಬ್ಲಾಕ್‌ನ ವ್ಯಾಸ್ ಕಣಿವೆಯಲ್ಲಿರುವ ಆದಿ ಕೈಲಾಸ ಪರ್ವತವನ್ನು ಏರುವಲ್ಲಿ ಕ್ಲೈಂಬಿಂಗ್ ಬಿಯಾಂಡ್ ದಿ ಸಮ್ಮಿಟ್ (CBTS) ತಂಡ ಯಶಸ್ವಿಯಾಗಿದೆ.

ಆದರೆ CBTS ತಂಡವು ಅಂತಿಮ ಶಿಖರದಿಂದ 60 ಮೀಟರ್ ಕೆಳಗೆ ತ್ರಿವರ್ಣ ಧ್ವಜವನ್ನು ಹಾರಿಸಿದೆ. ಏಕೆಂದೆರೆ ಆದಿ ಕೈಲಾಸ ಪರ್ವತದ ಪವಿತ್ರತೆಗೆ ಸಂಬಂಧಿಸಿದಂತೆ, ತಂಡವು ಶಿಖರದ ಕೊನೆಯವರೆಗೂ ಏರಲಿಲ್ಲ. ಯಶಸ್ವಿ ಆರೋಹಣಕ್ಕಾಗಿ ಪರ್ವತಾರೋಹಿಗಳು ತಂಡದ ಸದಸ್ಯರನ್ನು ಅಭಿನಂದಿಸಿದ್ದಾರೆ.

ಮೇ 7 ರಂದು, ಪರ್ವತಾರೋಹಿಗಳ ಆರು ಸದಸ್ಯರ ತಂಡವು ಧಾರ್ಚುಲಾದಿಂದ ದಂಡಯಾತ್ರೆಯನ್ನು ಪ್ರಾರಂಭಿಸಿತು. ಮೇ 10 ರಂದು, ತಂಡವು 4,600 ಮೀಟರ್‌ನಲ್ಲಿ ಬೇಸ್ ಕ್ಯಾಂಪ್ ಅನ್ನು ಸ್ಥಾಪಿಸಿತು. ಮೇ 13 ರಂದು, 5,100 ಮೀಟರ್ ಎತ್ತರದಲ್ಲಿ ಮುಂಗಡ ಮೂಲ ಶಿಬಿರವನ್ನು ಸ್ಥಾಪಿಸಲಾಯಿತು.

ಇದರ ನಂತರ, ಮೂವರು ಸದಸ್ಯರ ಪರ್ವತಾರೋಹಣ ತಂಡವು ಮೇ 17 ರಂದು ಮುಂಜಾನೆ 3 ಗಂಟೆಗೆ ಮುಂಗಡ ಬೇಸ್ ಕ್ಯಾಂಪ್‌ನಿಂದ ಆಲ್ಪೈನ್ ಶೈಲಿಯಲ್ಲಿ ಆದಿ ಕೈಲಾಸ ಶಿಖರಕ್ಕೆ ತೆರಳಿತು. ತಂಡವು ಆದಿ ಕೈಲಾಸ ಪರ್ವತದ ಶಿಖರದ ಕೊನೆಯ 60 ಮೀಟರ್‌ಗಳನ್ನು ಬೆಳಿಗ್ಗೆ 10.40 ಕ್ಕೆ ತಲುಪಿತು.

ಬಳಿಕ ಆದಿ ಕೈಲಾಸ ಪರ್ವತದ ಪಾವಿತ್ರ್ಯತೆಯನ್ನು ಗೌರವಿಸಿ, ತಂಡವು ಮುಂದೆ ಏರದಿರಲು ನಿರ್ಧರಿಸಿತು. ಈ ಸ್ಥಳದಲ್ಲಿ ತ್ರಿವರ್ಣ ಧ್ವಜವನ್ನು ಹಾರಿಸಿ ಆದಿ ಕೈಲಾಸ ದರ್ಶನ ಪಡೆದಿದ್ದಾರೆ.

ಪರ್ವತಾರೋಹಣ ಮಾಡಿದರ ಬಗ್ಗೆ ತಮ್ಮ ಅನುಭವವನ್ನು ಮೂವರ ಸದಸ್ಯರಿದ್ದ ತಂಡದ ನಾಯಕ ಯೋಗೇಶ್ ಗಾರ್ಬ್ಯಾಲ್ ಹಂಚಿಕೊಂಡಿದ್ದಾರೆ. ಆದಿ ಕೈಲಾಸ ಪರ್ವತದ ಸುರಕ್ಷಿತ ಕ್ಲೈಂಬಿಂಗ್ ಮಾರ್ಗಗಳನ್ನು ಕಂಡುಹಿಡಿಯುವಲ್ಲಿ ತಂಡವು ಯಶಸ್ವಿಯಾಗಿದೆ.

ಶಿಖರದಿಂದ ಪಾರ್ವತಿ ತಾಳದ ಸುಂದರ ನೋಟವಿದೆ. ಈ ಶ್ರೇಣಿಯ ಚಿಪೆಡಾಂಗ್, ರಾಜೇಜು, ಬ್ರಹ್ಮ ಪರ್ವತ, ಈಶಾನ್ ಪರ್ವತ, ನಾಮ, ಆಪಿ ಮತ್ತು ಕೈಲಾಸ ಪರ್ವತಗಳನ್ನು ಸಹ ಕಾಣಬಹುದು ಎಂದು ಯೋಗೇಶ್‌ ಹೇಳಿದ್ದಾರೆ. ಯೋಗೇಶ್ ಗಾರ್ಬ್ಯಾಲ್ ಜೊತೆಗೆ ಕಲಾ ಬಾದಲ್ ಮತ್ತು ಮೀನಾಕ್ಷಿ ರಾವತ್ ಎಂಬುವವರು ತಂಡದಲ್ಲಿದ್ದರು.

2021 ರಲ್ಲಿ, CBTS ನ ಮಹಿಳಾ ತಂಡವು ಆದಿ ಕೈಲಾಶ್ ಪ್ರದೇಶದ ಸೇಲಾ ಬಳಿಯಿರುವ ಚಿಪೆಂಡ್ ಶಿಖರದಲ್ಲಿ ತ್ರಿವರ್ಣ ಧ್ವಜವನ್ನು ಹಾರಿಸಿತ್ತು ಎಂದು ಕಲಾ ಬಾದಲ್ ತಿಳಿಸಿದ್ದಾರೆ. ಈ ತಂಡ 6,120 ಮೀಟರ್ ಎತ್ತರ ಏರಿತ್ತು. ಆದರೇ ಭಾರತೀಯರೊಬ್ಬರು ಈ ಶಿಖರವನ್ನು ಯಶಸ್ವಿಯಾಗಿ ಏರಿದ್ದು ಇದೇ ಮೊದಲು ಎಂದು ಕಲಾ ಬಾದಲ್‌ ಹೇಳಿದ್ದಾರೆ.

ಈ ಹಿಂದೆಯೂ ಸಹ, CBTS ತಂಡವು ವ್ಯಾಪಾರ ಮಾರ್ಗಗಳಾದ ಸಯಾನೋ ಲಾ ಪಾಸ್ (5,495 ಮೀ) ಮತ್ತು ಸೆಲಾ ಪಾಸ್ (5,100 ಮೀ) ಮೂಲಕ ಕೈಲಾಶ ಪರ್ವತದ ದರ್ಮಾ ಕಣಿವೆಯಿಂದ ವ್ಯಾಸ್ ಕಣಿವೆಗೆ ಸಂಪರ್ಕಿಸುವ ಸುರಕ್ಷಿತ ಮಾರ್ಗವನ್ನು ಕಂಡು ಹಿಡಿದಿದೆ.

ಆದಿ ಕೈಲಾಶ ಪರ್ವತದ ಮೊದಲ ಯಶಸ್ವಿ ಆರೋಹಣವನ್ನು 2004ರ ಅಕ್ಟೋಬರ್ 8 ರಂದು ಇಂಗ್ಲೆಂಡ್‌, ಅಮೆರಿಕಾ ಮತ್ತು ಸ್ಕಾಟ್ಲೆಂಡ್‌ ಒಳಗೊಂಡ ತಂಡವು ಮಾಡಿತ್ತು.

ಆಂಡಿ ಪರ್ಕಿನ್ಸ್ (ಇಂಗ್ಲೆಂಡ್‌), ಟಿಮ್ ವುಡ್‌ವರ್ಡ್ (ಇಂಗ್ಲೆಂಡ್‌), ಜ್ಯಾಕ್ ಪಿಯರ್ಸ್ (ಇಂಗ್ಲೆಂಡ್‌), ಜೇಸನ್ ಹಬರ್ಟ್ (ಸ್ಕಾಟ್ಲೆಂಡ್‌) ಮಾರ್ಟಿನ್ ವೆಲ್ಚ್ (ಸ್ಕಾಟ್ಲೆಂಡ್), ಡೈರ್ಮಿಡ್ ಹರ್ನ್ಸ್ (ಸ್ಕಾಟ್ಲೆಂಡ್), ಅಮಂಡಾ ಜಾರ್ಜ್ (ಸ್ಕಾಟ್ಲೆಂಡ್) ಮತ್ತು ಪಾಲ್ ಜುಚೋಸ್ಕಿ (ಯುಎಸ್‌ಎ) ತಂಡದಲ್ಲಿದ್ದವರು. ಇವರು ಕೂಡ ಶಿಖರದ ಪವಿತ್ರ ಸ್ವರೂಪದ ಗೌರವದಿಂದ ಕೊನೆಯ ಕೆಲವು ಮೀಟರ್‌ಗಳನ್ನು ಏರಲಿಲ್ಲ.