ISSF World Cup: ವಿಶ್ವ ದಾಖಲೆಯೊಂದಿಗೆ ಚಿನ್ನ ಗೆದ್ದ ಸೌರಭ್ ಚೌಧರಿ

ನವದೆಹಲಿ, ಫೆಬ್ರವರಿ 24: ನವದೆಹಲಿಯಲ್ಲಿರುವ ಡಾ. ಕರ್ಣಿ ಸಿಂಗ್ ಶೂಟಿಂಗ್ ರೇಂಜ್‌ನಲ್ಲಿ ನಡೆಯುತ್ತಿರುವ ಇಂಟರ್ ನ್ಯಾಷನಲ್ ಶೂಟಿಂಗ್ ಸ್ಪೋರ್ಟ್ಸ್ ಪೆಡರೇಷನ್ (ಐಎಸ್‌ಎಸ್‌ಎಫ್‌) ವಿಶ್ವಕಪ್ ಕೂಟದ ಪುರುಷರ 10 ಮೀ. ಏರ್ ಪಿಸ್ತೂಲ್ ಸ್ಪರ್ಧೆಯಲ್ಲಿ ಭಾರತದ ಯುವ ಶೂಟರ್ ಸೌರಭ್ ಚೌಧರಿ ವಿಶ್ವದಾಖಲೆಯೊಂದಿಗೆ ಚಿನ್ನ ಗೆದ್ದಿದ್ದಾರೆ.

ಶನಿವಾರ (ಫೆಬ್ರವರಿ 23) ಅಪೂರ್ವಿ ಚಂದೇಲಾ ಬಂಗಾರ ಗೆದ್ದ ಬಳಿಕ ಭಾರತಕ್ಕೆ ಲಭಿಸಿದ ಕೂಟದ ಎರಡನೇ ಬಂಗಾರದ ಪದಕವಿದು. ಕಳೆದ ವರ್ಷ ಯೂತ್ ಒಲಿಂಪಿಕ್ಸ್ ನಲ್ಲಿ ಬಂಗಾರ ಗೆದ್ದಿದ್ದ 16ರ ಹರೆಯದ ಸೌರಭ್ ಸರ್ಬಿಯಾದ ದಮೀರ್ ಮಿಕೆಕ್ ಅವರನ್ನು ಹಿಮ್ಮೆಟ್ಟಿಸಿ ಬಂಗಾರಕ್ಕೆ ಕೊರಳೊಡ್ಡಿದರು.

ಒಟ್ಟು 245 ಪಾಯಿಂಟ್ ಗಳಿಸಿದ ಚೌಧರಿ ಅಗ್ರ ಸ್ಥಾನ ಕಾಯ್ದುಕೊಂಡರು. ಸೌರಭ್ ಈ ಸಾಧನೆ ವಿಶ್ವದಾಖಲೆಗೂ ಕಾರಣವಾಗಿದೆಯಲ್ಲದೆ 2020ರ ಟೋಕಿಯೋ ಒಲಿಂಪಿಕ್‌ಗೆ ಅರ್ಹತೆಯನ್ನೂ ತಂದುಕೊಟ್ಟಿದೆ. 239.3 ಅಂಕ ಕಲೆ ಹಾಕಿದ ಮಿಕೆಕ್ ದ್ವಿತೀಯ ಸ್ಥಾನ ಪಡೆದುಕೊಂಡರೆ, ಚೀನಾದ ವೈ ಪಾಂಗ್ (215) ಕಂಚಿನ ಪದಕ ತನ್ನದಾಗಿಸಿಕೊಂಡರು.