KIWG 2026: ಲಡಾಖ್‌ನಲ್ಲಿ ಖೇಲೋ ಇಂಡಿಯಾ ವಿಂಟರ್ ಗೇಮ್ಸ್–2026ಕ್ಕೆ ಅದ್ಧೂರಿ ಚಾಲನೆ

ಲಡಾಖ್‌ನಲ್ಲಿ ಖೇಲೋ ಇಂಡಿಯಾ ವಿಂಟರ್ ಗೇಮ್ಸ್‌-2026ರ (KIWG 2026) ಆರನೇ ಆವೃತ್ತಿಯು ಭರ್ಜರಿ ಉದ್ಘಾಟನೆಯೊಂದಿಗೆ ಆರಂಭಗೊಂಡಿದೆ. ಲೇಹ್‌ನ ನಾವಾಂಗ್ ದೋರ್ಜೆನ್ ಸ್ಟೋಬ್ಡಾನ್ (ಎನ್‌ಡಿಎಸ್‌) ಸ್ಟೇಡಿಯಂನಲ್ಲಿ ಮಂಗಳವಾರ ನಡೆದ ವೈಭವೋಪೇತ ಸಮಾರಂಭದಲ್ಲಿ ಲಡಾಖ್‌ ಕೇಂದ್ರಾಡಳಿತ ಪ್ರದೇಶದ ಲೆಫ್ಟಿನೆಂಟ್ ಗವರ್ನರ್ ಕವಿಂದರ್ ಗುಪ್ತಾ ಅವರು ಕ್ರೀಡಾಕೂಟವನ್ನು ಅಧಿಕೃತವಾಗಿ ಉದ್ಘಾಟಿಸಿದರು.

ಈ ಬಾರಿ ಲಡಾಖ್‌ ಹಂತದಲ್ಲಿ ಐಸ್‌ ಸ್ಕೇಟಿಂಗ್‌ ಹಾಗೂ ಐಸ್‌ ಹಾಕಿ ಸೇರಿದಂತೆ ಐಸ್‌ ಕ್ರೀಡೆಗಳು ನಡೆಯಲಿದ್ದು, ಈ ಮೊದಲ ಹಂತವು ಜನವರಿ 26ರಂದು ಮುಕ್ತಾಯಗೊಳ್ಳಲಿದೆ. ಬಳಿಕ ಫೆಬ್ರವರಿಯಲ್ಲಿ ಜಮ್ಮು-ಕಾಶ್ಮೀರದ ಗುಲ್ಮಾರ್ಗ್‌ನಲ್ಲಿ ಹಿಮ ಕ್ರೀಡೆಗಳ ಹಂತ ನಡೆಯಲಿದೆ. ಇದು ಲಡಾಖ್‌ನಲ್ಲಿ ನಡೆಯುತ್ತಿರುವ ಮೂರನೇ ಖೇಲೋ ಇಂಡಿಯಾ ವಿಂಟರ್ ಗೇಮ್ಸ್ ಆಗಿದೆ.

ಕ್ರೀಡಾ ಸಚಿವರಿಂದ ಲಡಾಖ್‌ಗೆ ಅಭಿನಂದನೆ

ಕೇಂದ್ರ ಯುವಜನ ವ್ಯವಹಾರ ಮತ್ತು ಕ್ರೀಡಾ ಸಚಿವ ಡಾ.ಮನ್ಸುಖ್ ಮಾಂಡವಿಯಾ ಅವರು ಲಡಾಖ್‌ಗೆ ಅಭಿನಂದನೆ ಸಲ್ಲಿಸಿದ್ದು, "ಖೇಲೋ ಇಂಡಿಯಾ ವಿಂಟರ್ ಗೇಮ್ಸ್ ಅನ್ನು ಮತ್ತೊಮ್ಮೆ ಯಶಸ್ವಿಯಾಗಿ ಆಯೋಜಿಸುವ ಮೂಲಕ ಲಡಾಖ್‌ ತನ್ನ ಸಾಮರ್ಥ್ಯ ಮತ್ತು ಆತ್ಮವಿಶ್ವಾಸವನ್ನು ಸಾಬೀತುಪಡಿಸಿದೆ. ಪ್ರಧಾನಿ ನರೇಂದ್ರ ಮೋದಿ ಅವರ ದೂರದೃಷ್ಟಿಯ ಕ್ರೀಡಾ ನೀತಿಯ ಫಲವಾಗಿ, ಭಾರತದ ವಿಂಟರ್ ಸ್ಪೋರ್ಟ್ಸ್ ಭವಿಷ್ಯ ಹಿಮಾಲಯಗಳಿಂದ ರೂಪುಗೊಳ್ಳುತ್ತಿದೆ" ಎಂದು ಹೇಳಿದರು.

"ಹಿಮ ಕ್ರೀಡೆಗಳು ಲೇಹ್‌ನಲ್ಲಿ ಹಾಗೂ ಹಿಮ ಕ್ರೀಡೆಗಳು ಗುಲ್ಮಾರ್ಗ್‌ನಲ್ಲಿ ನಡೆಯುವಂತೆ ಎರಡು ಹಂತಗಳ ವಿನ್ಯಾಸ ಮಾಡಿರುವುದು ಕ್ರೀಡಾಪಟುಗಳಿಗೆ ವಿಭಿನ್ನ ಪರಿಸ್ಥಿತಿಗಳಲ್ಲಿ ಸ್ಪರ್ಧಿಸುವ ಅವಕಾಶ ನೀಡುತ್ತದೆ. ಇದು ಅಂತರರಾಷ್ಟ್ರೀಯ ಮಟ್ಟದ ವಿಂಟರ್ ಕ್ರೀಡೆಗಳಿಗೆ ಭಾರತವನ್ನು ತಯಾರಿಸುವ ದಿಕ್ಕಿನಲ್ಲಿ ಮಹತ್ವದ ಹೆಜ್ಜೆ" ಎಂದು ಹೇಳಿದರು.

ಪ್ರಧಾನಿ ಮೋದಿ ಅವರ ಕ್ರೀಡಾ ದೃಷ್ಟಿಕೋನಕ್ಕೆ ಶ್ಲಾಘನೆ

ಉದ್ಘಾಟನಾ ಸಮಾರಂಭದಲ್ಲಿ ಮಾತನಾಡಿದ ಲೆಫ್ಟಿನೆಂಟ್‌ ಗವರ್ನರ್ ಕವಿಂದರ್ ಗುಪ್ತಾ, "ಪ್ರಧಾನಿ ನರೇಂದ್ರ ಮೋದಿ ಅವರ ದೂರದೃಷ್ಟಿಯಿಂದ ದೇಶದ ಕ್ರೀಡಾ ಸಂಸ್ಕೃತಿಗೆ ಹೊಸ ಚೈತನ್ಯ ಬಂದಿದೆ. ಖೇಲೋ ಇಂಡಿಯಾ ಯೋಜನೆಯ ಮೂಲಕ ಯುವ ಸಬಲೀಕರಣ, ದೈಹಿಕ ಫಿಟ್ನೆಸ್ ಹಾಗೂ ಕ್ರೀಡಾ ಶ್ರೇಷ್ಠತೆಯನ್ನು ರಾಷ್ಟ್ರದ ಆದ್ಯತೆಯಾಗಿ ರೂಪಿಸಲಾಗಿದೆ. ಮೂರು ವರ್ಷಗಳಿಂದ ನಿರಂತರವಾಗಿ ಈ ಕ್ರೀಡಾಕೂಟವನ್ನು ಆಯೋಜಿಸುತ್ತಿರುವುದು ಲಡಾಖ್‌ಗೆ ಹೆಮ್ಮೆಯ ವಿಷಯ" ಎಂದು ಹೇಳಿದರು.

ಈ ಬಾರಿ ನಡೆಯುತ್ತಿರುವ KIWG 2026ರಲ್ಲಿ 480 ಕ್ರೀಡಾಪಟುಗಳು ಸೇರಿ ಒಟ್ಟು 1,060 ಮಂದಿ (ಕೋಚ್‌ಗಳು ಸೇರಿದಂತೆ) ಭಾಗವಹಿಸುತ್ತಿದ್ದಾರೆ. ಸ್ಪರ್ಧೆಗಳು ಎನ್‌ಡಿಎಸ್‌ ಸ್ಟೇಡಿಯಂ, ಗುಪುಕ್‌ ಪಾಂಡ್, ಹಾಗೂ ಲಡಾಖ್‌ ಸ್ಕೌಟ್ಸ್ ರೆಜಿಮೆಂಟಲ್ ಸೆಂಟರ್ ರಿಂಕ್ ಸೇರಿ ಮೂರು ಪ್ರಮುಖ ವೇದಿಕೆಗಳಲ್ಲಿ ನಡೆಯಲಿವೆ. ಈ ಆವೃತ್ತಿಯ ಪ್ರಮುಖ ಆಕರ್ಷಣೆಯೆಂದರೆ, ಒಲಿಂಪಿಕ್ ಕ್ರೀಡೆವಾದ ಫಿಗರ್ ಸ್ಕೇಟಿಂಗ್ ಅನ್ನು ಮೊದಲ ಬಾರಿಗೆ ಖೇಲೋ ಇಂಡಿಯಾ ವಿಂಟರ್ ಗೇಮ್ಸ್‌ನಲ್ಲಿ ಸೇರಿಸಲಾಗಿದೆ. ಅಂತರರಾಷ್ಟ್ರೀಯ ಮಟ್ಟದಲ್ಲಿ ಗಮನ ಸೆಳೆಯುತ್ತಿರುವ ಭಾರತದ ಶ್ರೇಷ್ಠ ಸ್ಕೇಟರ್‌ಗಳು ಈ ಸ್ಪರ್ಧೆಯಲ್ಲಿ ಪಾಲ್ಗೊಳ್ಳುತ್ತಿದ್ದಾರೆ.

ಲಡಾಖ್‌ನ ಹೊಸ ಕ್ರೀಡಾ ನೀತಿ

ಲಡಾಖ್‌ನಲ್ಲಿ ಇತ್ತೀಚೆಗೆ ಜಾರಿಗೆ ಬಂದಿರುವ ಮೊದಲ ಕ್ರೀಡಾ ನೀತಿ ಕುರಿತು ಮಾತನಾಡಿದ ಲೆ.ಗವರ್ನರ್ ಗುಪ್ತಾ, ಈ ನೀತಿಯಲ್ಲಿ ಶಾಲಾ ಹಂತದಲ್ಲೇ ಪ್ರತಿಭೆ ಗುರುತಿಸುವಿಕೆ, ಮಹಿಳಾ ಮತ್ತು ದಿವ್ಯಾಂಗ ಕ್ರೀಡಾಪಟುಗಳಿಗೆ ಸಮಾನ ಅವಕಾಶ, ಲಡಾಖ್ ಸ್ಪೋರ್ಟ್ಸ್ ಕೌನ್ಸಿಲ್ ಬಲಪಡಿಕೆ, ಸರ್ಕಾರಿ ಉದ್ಯೋಗಗಳಲ್ಲಿ 4% ಮೀಸಲಾತಿ, ವಿದ್ಯಾರ್ಥಿವೇತನ, ನಗದು ಬಹುಮಾನಗಳು, ಅಂತರರಾಷ್ಟ್ರೀಯ ಮಟ್ಟದ ಕ್ರೀಡಾ ಮೂಲಸೌಕರ್ಯ ಹಾಗೂ ಕ್ರೀಡಾ ಪ್ರವಾಸೋದ್ಯಮ ಉತ್ತೇಜನಕ್ಕೆ ಒತ್ತು ನೀಡಲಾಗಿದೆ ಎಂದರು.

ಉದ್ಘಾಟನಾ ಸಮಾರಂಭದಲ್ಲಿ ಲಡಾಖ್ ಸ್ವಾಯತ್ತ ಪರ್ವತ ಅಭಿವೃದ್ಧಿ ಮಂಡಳಿ-ಕಾರ್ಗಿಲ್‌ನ ಮುಖ್ಯ ಕಾರ್ಯನಿರ್ವಹಣಾಧಿಕಾರಿ ಡಾ. ಮೊಹಮ್ಮದ್ ಜಾಫರ್ ಅಖೂನ್, ಮುಖ್ಯ ಕಾರ್ಯದರ್ಶಿ ಆಶೀಷ್ ಕುಂದ್ರಾ, ಕ್ರೀಡಾ ಪ್ರಾಧಿಕಾರದ ಹಿರಿಯ ಅಧಿಕಾರಿಗಳು ಸೇರಿದಂತೆ ಹಲವರು ಉಪಸ್ಥಿತರಿದ್ದರು. ಖೇಲೋ ಇಂಡಿಯಾ ವಿಂಟರ್ ಗೇಮ್ಸ್-2026 ಲಡಾಖ್‌ನ ಕ್ರೀಡಾ ಸಾಮರ್ಥ್ಯವನ್ನು ರಾಷ್ಟ್ರಮಟ್ಟದಲ್ಲಿ ಮತ್ತೊಮ್ಮೆ ಸಾಬೀತುಪಡಿಸಿದ್ದು, ಭಾರತದ ವಿಂಟರ್ ಸ್ಪೋರ್ಟ್ಸ್ ಭವಿಷ್ಯಕ್ಕೆ ಹೊಸ ದಿಕ್ಕು ನೀಡಿದೆ.